Nehemiah 13

Ilokano (Ti Biblia (1973))

← Chapter 12 Jump to:

1Iti daydi nga aldaw nagbasada idi libro ni Moises iti panagdengngeg dagiti tattao; ket kencuana nasaracan a naisurat, a ti maysa nga Ammonita, ken maysa a Moabita dida sumrec iti gimong ti Dios iti agnanayon,

2Agsipud ta dida insabtan dagiti annac ti Israel iti tinapay ken danum, no di ket tinangdananda ni Balaam a maibusor cadacuada, tapno ilunodna ida: nupay casta ti Diostayo pinagbalinna di lunod a maysa a bendicion.

3Ket naaramid, idi a nangngegda ti linteg, nga insinada iti Israel amin a gampor nga adu unay.

4Iti sacbay daytoy, ni Eliasib a padi, a nadutocan nga agaywan cadagiti sagumbi ti balay ti Diostayo, idinto a naicabagian ken Tobias,

5Nagsagana a maipaay kencuana iti maysa a sagumbi a dackel, isu a nagicabilanda idi casacbayan a tiempo cadagiti datdaton a macan, incienso, ken al-alicamen, ken cadagiti apagcapullo ti trigo, iti baro nga arac, ken iti lana, isuda a naited gapu iti bilin cadagiti Levitas, ken cadagiti cumacanta, ken cadagiti agaywan iti ruangan; ken dagiti datdaton a maitayag a maipaay cadagiti papadi.

6Ngem iti amin cadagitoy a tiempo awanac idi iti Jerusalem: ta idi maicatlopulo ket dua a tawen ni Artaxerxes nga ari ti Babilonia napanac iti ari: ket calpasan dagiti dadduma nga al-aldaw dinawatco ti palubos ti ari,

7Ket immayac iti Jerusalem, ket naawatac di dakes inaramid ni Eliasib a maipaay ken Tobias, iti panangisaganana kencuana iti maysa a sagumbi cadagiti paraangan ti balay ti Dios.

8Ket pinaldaangnac iti napalalo: gapuna nga impalladawco nga inruar iti sagumbi ti amin nga arruaten ti sangcacabbalay ni Tobias.

9Idin nagbilinac, ket dinalusanda dagiti sagumbi: ket impanco manen idiay dagiti al-alicamen ti balay ti Dios, agraman cadagiti datdaton a macan ken incienso.

10Ket naawatac a dagiti apag dagiti Levitas saanda idi a naited cadacuada; iti casta a dagiti Levitas ken dagiti cumacanta, a nagannong iti aramid, nagtalawda idi tunggal maysa napan iti dagana.

11Idin nakisubangac cadagiti turayen, ket kinunac, Apayapay a maidian ti balay ti Dios? Ket inurnongco ida, ket insaadco ida iti yanda.

12Iti casta inyeg ti amin a Juda ti apagcapullo ti trigo ken ti baro nga arac ken ti lana cadagiti paggamengan.

13Ket nangisaadac cadagiti agaywan cadagiti gamgameng, da Selemias a padi, ken Sadoc nga escriba, ken cadagiti Levitas, ni Padaias: ket ti sumaruno cadacuada isu idi ni Hanan nga anac a lalaki ni Zaccur, nga anac a lalaki ni Matanias; ta isuda naibilangda a matalec, ket ti akemda isu idi ti panagpawaras cadagiti cacabsatda.

14Lagipennac, O Diosco, iti maipapan itoy, ket dica punasen dagiti naimbag nga aramidco nga inaramidco a maipaay iti balay ti Diosco, ken maipaay iti pannacasalimetmetna.

15Cadagidi nga al-aldaw nakitac idiay Juda dagiti dadduma a lallaki nga agbadbaddec cadagiti pagpespesan iti uvas iti aldaw a panaginana, ken agyeg cadagiti pinungo, ken ipaawitda cadagiti as-asno dagidi; casta met ti arac, uv-uvas, ken highigos, ken amin a kita dagiti aw-awiten, nga inserrecda idiay Jerusalem iti aldaw a panaginana: ket pinanecnecac iti maibusor cadacuada iti aldaw a panaglacoda cadagiti macmacan.

16Nagnaed met kencuana dagiti tattao ti Tiro, a nagyeg cadagiti ic-ican, ken amin a kita dagiti laclaco, ket naglacoda iti aldaw a panaginana cadagiti annac ti Juda, ken idiay Jerusalem.

17Idin nakisubangac cadagiti natacneng ti Juda, ket kinunac cadacuada, Ania a nagdakes a banag daytoy nga aramidyo, ken barengbarengenyo ti aldaw a panaginana?

18Saan aya a castoy ti inaramid idi dagidi ammayo, ket saan aya nga inyeg ti Diostayo amin daytoy a dakes iti rabawtayo ken iti daytoy nga ili nupay casta iy-iyegyo pay ti pungtot iti rabaw ti Israel gapu iti panangbarengbarengyo iti aldaw a panaginana.

19Ket naaramid nga idi a dagiti ruangan ti Jerusalem nangrugida a masipngetan iti sacbay ti aldaw a panaginana, imbilinco a maripcan dagiti ruangan, ket imbilinco a saan a maluctan agingga iti calpasan ti aldaw a panaginana: ket dadduma cadagiti ad-adipenco insaadco nga agaywan cadagiti ruangan tapno awan ti maiserrec nga awiten iti aldaw a panaginana.

20Iti casta dagiti agbaniaga ken aglaclaco ti amin a kita ti tagtagilaco nagdagusda iti ruar ti Jerusalem iti maminsan wenno mamindua.

21Idin pinanecnecac ti maibusor cadacuada, ket kinunac cadacuada, Apayapay agdagscayo iti ruar ti bacud? no aramidenyo manen, ti casta icabilcontodagiti im-imac cadacayo. Nanipud iti daydi a tiempo ken iti calpasanna dida immayen iti aldaw a panaginana.

22Ket binilinco dagiti Levitas a gugoranda dagiti bagbagida, ket umayda ken bantayanda dagiti ruangan, tapno santificaren ti aldaw a panaginana. Lagipennac, O Diosco, iti daytoy met, ket caasiannac cas mayalubog iti kinadackel ti kinamanagayatmo.

23Cadagidi nga al-aldaw met nakitac dagiti Judios a nangasawa cadagiti babbai ti Asdod, ti Ammon, ken ti Moab:

24Ket dagiti annacda nagsaoda ti caguddua ti pagsasao ti Asdod, ket dida nabalin ti agsao iti pagsasao dagiti Judios, no di laeng mayannurot iti pagsasao ti tunggal ili.

25Ket nakisubangac cadacuada, ket inlunodco ida, ket kinabilco ti dadduma cadacuada, ket pinarutco dagiti bubuocda, ket pinagsapatac ida gapu iti Dios, a kinunac, Dicayto itden dagiti annacyo a babbai cadagiti annacda a lallaki, dicayto alaen dagiti annacda a babbai a maipaay cadagiti annacyo a lallaki, wenno maipaay cadacayo met laeng.

26Saan aya a ni Salomon nga ari ti Israel nacabasol gapu cadagitoy a banbanag? nupay no cadagiti adu a nasnacion awan idi ti ari a cas kencuana, ket isu naayat gapu iti Diosna, ket ti Dios isu ti pinagarina iti amin nga Israel: nupay casta isu ti pinagbasol met laeng dagiti babbai a gangannaet.

27Dacami ngarud ipangagdacayto aya tapno aramiden daytoy dackel a dakes, a paglabsing iti maicaniwas iti Dios iti panangasawa cadagiti babbai a gangannaet?

28Ket maysa cadagiti annac a lallaki ni Joiada, nga anac a lalaki ni Eliasib a nangato a padi, isu idi ti manugang a lalaki ni Sanballat nga Horonita: gapuna nga isu pinagtalawco nga immadayu caniac.

29Lagipem ida, O Diosco, agsipud ta rinugitanda ti kinapadi, ken ti tulag ti kinapadi, ken dagiti Levitas.

30Iti casta dinalusac ida cadagiti gangannaet, ket dinutocac dagiti akem a maipaay cadagiti papadi ken maipaay cadagiti Levitas tunggal maysa iti aramidna;

31Ken maipaay iti daton a cayo, cadagiti natudingan a tiempo, ken maipaay cadagiti umuna a bunga. Lagipennac, O Diosco, a maipaay iti naimbag.

← Chapter 12 Jump to: