Judges 19

Mien Bible (Thai Script) © Thailand Bible Society, 2007

← Chapter 18 Jump to: Chapter 20 →

1วั้ว จ๋า ลู่ง เดี๊ย อิสะลาเอน เมี่ยน หธ่อ ไม้ ม่าย ฮู่ง เตี๋ย วั้ว หฒั่น, ม่าย เต้า เลวี เมี่ยน เยียม เอฟาอิม บง-ไอ๊, เยียม นอม โก เญย ต๋อง. นิ่น หล่ง เต้า ยูดา เต่ย, เบดเลเฮม มู้ง เญย เซียะ โหฒว จ๊า-เฒ่ย เอ๊า.

2มป่า น้าย เต้า จ๊า-เฒ่ย เอ๊า เหฮยียน โหฆ, นิ่น ฯฒฯ กวั่ง เจี๊ยน นิ่น เญย โหฆ เปย๋า หฑวน ยูเดีย แซ้ง, เบดเลเฮม มู้ง, นิ่น เญย เตีย เญย เปย๊า วั้ว, เยียม เปยย หฮลา เหญียะ เญย ต๋อง.

3นิ่น เญย โหฆ ฯฒฯ เจี์ย ต้าย ต้อ เหยียด เต้า โปว เหธา อี เต้า ล่อ มี่ง ล์อ นิ่น, อ๋อย หล่ง หว่า หลง เญย ขวิน นิ่น หฑวน ต้าย. วั้ว เต้า มเซียะ ตอน ต้อ นิ่น เปียะ นิ่น เญย เตีย เญย เปย๊า. นิ่น เญย เตีย ปวัด น้าย เต้า เมี่ยน ฯฒฯ อะเฮน้ย ฒิบ.

4น้าย เต้า เมี่ยน เญย อง-ตา, เซ น้าย เต้า เซียะ เญย เตีย, เลี่ยว นิ่น เยียม, นิ่น ฯฒฯ เยียม วั้ว ปัว ฮนอย. นิ่น บัว หญั่น หย่า ฮบ แอ๋ง ฮิด เจี๊ยน วั้ว.

5เถา ตะเฝย ฮนอย น้าย เต้า เลวี เมี่ยน เจี์ย ซิน เฑี้ยว เญย, อ๋อย หฑวน เปย๊า อ๊ะ. มป่า วั้ว เต้า เซียะ เญย เตีย ก๊อง บั๋ว นิ่น เญย เซียะ-ล่าง, “หญั่น ตั้ง หฮนาง ปุน เฮญี้ยว คู่ เยียม เต๋ย หมั่น ต้าย มี่ง.”

6นิ่น บัว อี อง-ตา ล่าง ฯฒฯ เฒว์ย เหฌี่ย หญั่น หย่า ฮบ. เซียะ เญย เตีย ก๊อง บั๋ว นิ่น เญย ล่าง, “โท้ แอ๋ง เปว๋ย ม์วน ปุน เฮญี้ยว คู่ เยียม เต๋ย.”

7น้าย เต้า เมี่ยน เจี์ย ซิน อ๋อย ธ้วด เจ๊า วั้ว หฒั่น, นิ่น เญย อง-ตา แอ๋ง ชะ เลี่ยว เหฌี่ย. นิ่น ฯฒฯ แอ๋ง ตี้ง เหฌี่ย หน่าย.

8เถา ตะฮม์ ฮนอย นิ่น เจี์ย ซิน เฑี้ยว เญย อ๋อย ธ้วด เจ๊า มี่ง อ๊ะ. เซียะ เญย เตีย ก๊อง, “โท้ หญั่น ตั้ง หฮนาง ปุน เฮญี้ยว คู่ เยียม, ตะเหญ่ย อ๋าน หมั่น ต้าย หฑวน.” นิ่น บัว อี อง-ตา ล่าง ฯฒฯ หญั่น หย่า ฮบ.

9เลวี เมี่ยน เหธา นิ่น เญย จ๊า-เฒ่ย เอ๊า เหธา เจี๊ยน นิ่น เญย โปว เจี์ย ซิน อ๋อย ธ้วด เจ๊า มี่ง อ๊ะ. นิ่น เญย อง-ตา, เซ น้าย เต้า เซียะ เญย เตีย, ก๊อง บั๋ว นิ่น เญย ล่าง, “อี้ หฒั่น ลู่ง ม์าน, อ๊า ลั่ม หฮมวัง อ๊ะ. แอ๋ง เปว๋ย ม์วน น้าย เฌียน-โย่ว เญย เยียม ม่าะ! น้าย นอม ฮนอย อ๊า ลั่ม เต๋ย เจี๋ย อ๊ะ. ฌัง ฮนอย เฑี้ยวๆ เญย เจี์ย ซิน ต้าย ธ้วด เจ๊า หฑวน เปย๊า อ๊ะ.”

10มป่า วั้ว เต้า เมี่ยน ไม้ คั้ง แอ๋ง ฮิด ม์วน. นิ่น ฯฒฯ เจี์ย ซิน ธ้วด เจ๊า มี่ง เถา เยบุด ฒี่ง, เซ เยลูซาเลม, เญย ต๋อย-หง่าน. นิ่น ต้อ เจี๊ยน อี เต้า ปุ่ย เจี๊ยน ออน เญย ล่อ. นิ่น เญย จ๊า-เฒ่ย เอ๊า หย่า เหธา เจี๊ยน มี่ง.

11นิ่น บัว เถา ฟัด เต๋ย เยบุด ฒี่ง วั้ว หฒั่น อ๊า ลั่ม เต๋ย หฮมวัง อ๊ะ. วั้ว เต้า โปว ฯฒฯ ก๊อง บั๋ว นิ่น เญย เฒี้ยว, “บัว เปียะ เยบุด เมี่ยน เญย ฒี่ง ฮิด ม์วน เอาะ?”

12นิ่น เญย เฒี้ยว เตา, “บัว ไม้ เปียะ กั้น ฝีง เมี่ยน เญย ฒี่ง เหว่ย หฒุ นิ่น บัว ไม้ เฒ์ย อิสะลาเอน เมี่ยน. บัว อ๋อย หฒุ แอ๋ง เจี๋ย มี่ง เถา กิเบอา ฒี่ง.”

13นิ่น แอ๋ง ก๊อง บั๋ว นิ่น เญย โปว, “ต้าย ม่าะ! บัว หมั่ง ก๋า ไฮ่ มี่ง ตุ๊ เถา กิเบอา ฒี่ง ไฟ ลามา ฮิด น้าย เต๋ย เญย เหยียด นอม ต๋อง.”

14นิ่น บัว ฯฒฯ เจี๋ย มี่ง เถา ฟัด เต๋ย เบนยามิน เญย กิเบอา ฒี่ง วั้ว หฒั่น บะฮนอย ม้วด หมี่ อ๊ะ.

15นิ่น บัว เปียะ กิเบอา ฒี่ง มี่ง อ๋อย เยียม วั้ว ฮิด ม์วน. นิ่น ฯฒฯ เฒว์ย เจี๊ยน วั้ว ต้ม หฒวัง หฒ่าม เหว่ย หฒุ ไม้ ม่าย หาย เต้า ฒิบ นิ่น บัว เปียะ เปย๊า เปว๋ย.

16โหฒว เกา อ๊า ลั่ม หฮมวัง อ๊ะ, ม่าย เต้า เมี่ยน โก๋ เมี่ยน มี่ง เด่ย โหฒว กง หฑวน. นิ่น เซ เอฟาอิม บง-ไอ๊ ต๋อง เญย เมี่ยน ต้าย เยียม เบนยามิน เมี่ยน เญย กิเบอา ฒี่ง. วั้ว นอม มู้ง เญย เมี่ยน เซ เบนยามิน ฝีง เญย เมี่ยน.

17น้าย เต้า เมี่ยน โก๋ เมี่ยน ปวัด เจี๋ย เจ๊า เญย เมี่ยน เฒว์ย เจี๊ยน ฒี่ง เญย ต้ม หฒวัง หฒ่าม ฯฒฯ หน่าย นิ่น, “เม่ย เยียม หาย ต้าย? เม่ย อ๋อย มี่ง หาย?”

18วั้ว เต้า เลวี เมี่ยน เตา, “เยีย บัว เยียม ยูดา เต่ย, เบดเลเฮม มู้ง ต้าย, อ๋อย หฑวน เอฟาอิม บง-ไอ๊ โก เญย ต๋อง. เยีย มต้าย เยียม วั้ว เญย เมี่ยน, มี่ง ยูดา เต่ย, เบดเลเฮม มู้ง หฑวน, อ๋อย หฑวน กั้น เญย เปย๊า. ต้าย เถา น้าย ไม้ ม่าย หาย เต้า ฒิบ เยีย บัว เปียะ นิ่น บัว เญย เปย๊า.

19เยีย บัว ม่าย เบย้า ฆ้าว เหธา หวุย ล่อ เญย กะน้าย, หย่า ม่าย ฌั้ว เหธา อะหงุ่น ติ๊ว, เซ เหว่ย เยีย เหธา น้าย เต้า เซียะ หย่า เหธา กัน เยีย น้าย เต้า เมี่ยน หลุน เมี่ยน. เยีย บัว ไม้ ธา เหยียด หญู่ง.”

20วั้ว เต้า เมี่ยน โก๋ เมี่ยน ก๊อง, “โท้ ปุน เม่ย แป้ง ออน อ๊ะ. เม่ย บัว เฉียม หล่ง เญย หาย หญู่ง โท้ ปุน เยีย หลิ่ว เล์ย ปุน. มป่า โท้ ไม้ ตู๋ง เปว๋ย น้าย ต้ม หฒวัง หฒ่าม.”

21นิ่น ฯฒฯ ต้อ วั้ว เต้า มจั่ง ตอน เปียะ เปย๊า มี่ง, หย่า หวุย นิ่น เญย ล่อ. นิ่น บัว หฑาว ลิ์ว เหฒา ฯฒฯ หญั่น หย่า ฮบ.

22นิ่น บัว อะเฮน้ย เญย หฑย่าว วั้ว หฒั่น, ม่าย เต๋ย วั้ว นอม มู้ง เญย เมี่ยน หว่าย เมี่ยน ต้าย เว่ย เจี๊ยน วั้ว นอม เปย๊า, ชะ แง้ง แก้ง เห่ว เปย๊า-เฒี้ยว, วั้ว เต้า เมี่ยน โก๋ เมี่ยน, “ต้อ ต้ง เปียะ เม่ย เญย เปย๊า วั้ว เต้า เมี่ยน ธ้วด ต้าย ปุน เยีย บัว ธา นิ่น ม่าะ!”

23วั้ว เต้า เปย๊า-เฒี้ยว ธ้วด ต้าย ก๊อง บั๋ว นิ่น บัว, “เยีย เญย ก๋อ-โย์ว อ้า! ไม้ ตู๋ง โหฒว น้าย เต๋ย หว่าย ไห่ เญย เอ๊าะ สี่. น้าย เต้า เมี่ยน ต้าย เยียม เยีย เญย เปย๊า โหฒว แคะ เมี่ยน. ไม้ ตู๋ง โหฒว น้าย เต๋ย หว่าย ไห่ เญย สี่ ปุน นิ่น.

24หมั่ง ม่าะ! เยีย ม่าย เต้า ไม้ แก้ง เปว๋ย เจี๋ย ตอน เญย เซียะ เหธา น้าย เต้า เมี่ยน เญย จ๊า-เฒ่ย เอ๊า. เยีย อี้ หฒั่น อ๋อย ต้อ นิ่น บัว ธ้วด ต้าย ปุน เม่ย บัว. เม่ย บัว กุ๊น หล่ง หย่า เซว่ย เอ๋ย โหฒว ปุน นิ่น บัว. มป่า โท้ เม่ย บัว ไม้ ตู๋ง โหฒว ไล่ ฮลบ เญย เอ๊าะ สี่ ปุน น้าย เต้า เมี่ยน.”

25มป่า วั้ว เต๋ย เมี่ยน ไม้ หมวัง เปย๊า-เฒี้ยว เญย หว่า. วั้ว เต้า เลวี เมี่ยน ฯฒฯ เฒาะ นิ่น เญย จ๊า-เฒ่ย เอ๊า ฟ้ง ธ้วด มี่ง ปุน นิ่น บัว. นิ่น บัว ฯฒฯ เฒี่ยง ม์วน ธา เญย ธา, ห่อย เญย ห่อย, เถา ลู่ง อ๊า ลั่ม ฌัง หธีง ต้าย ปู๋ง นิ่น.

26ลู่ง เบี์ยวๆ ฌัง เญย เฒี่ยง โห่, วั้ว เต้า มเซียะ ตอน หฑวน ต้าย เถา นิ่น เญย เฒี้ยว เยียม วั้ว นอม เปย๊า, ฯฒฯ คีง เหฌี่ย วั้ว แก้ง ด่าง, หย่า เยียม หน่าย เถา ลู่ง ฌัง หลง.

27ลู่ง ดอม-เฑี้ยว วั้ว เต้า มเซียะ ตอน เญย เฒี้ยว เจี์ย ซิน ต้าย คอย แก้ง, อ๋อย ธ้วด เจ๊า มี่ง ฯฒฯ ปวัด นิ่น เญย จ๊า-เฒ่ย เอ๊า เปว๋ย เจี๊ยน วั้ว แก้ง ด่าง, ปั์ว หลอง เจี๊ยน แก้ง แบ๊ะ.

28นิ่น ก๊อง บั๋ว วั้ว เต้า มเซียะ ตอน, “เจี์ย ซิน ต้าย ม่าะ! บัว มี่ง อ๊ะ.” มป่า ไม้ ไฮ์ น้าย เต้า มเซียะ ตอน เตา. นิ่น ฯฒฯ ฮล้อบ นิ่น เญย จ๊า-เฒ่ย เอ๊า ต๊าบ เจี๊ยน ล่อ ติ ต์าน, ฯฒฯ ธ้วด เจ๊า หฑวน นิ่น กั้น เญย เปย๊า อ๊ะ.

29หฑวน เถา เปย๊า วั้ว หฒั่น นิ่น เฒาะ หฑุ ต้าย เฆน นิ่น เญย เอ๊า-ตอน เญย เซย เป๋น เหฒียบ เหญ่ย เต๋ย, ฝูง มี่ง ก๋อม อิสะลาเอน เต่ย-ปูง เญย นอมๆ ต๋อง.

30ตะฟ่าน ตุ๊ ปวัด เญย เมี่ยน ก๊อง, “เยียม อิสะลาเอน เมี่ยน ธ้วด อียิบ เต่ย-ปูง วั้ว ฮนอย เถา อี้ หฒั่น, ไม้ ม่าย เจี๋ย หย่า ไม้ ม่าย หาย เต้า ปวัด เจี๋ย น้าย หญู่ง สี่. อ๋อย หฒุ หลงๆ ฮนั้ม, หย่า ธ่าง ล่าง หมั่ง ก๋า, บัว อ๋อย หฒุ ฮนั้ง หาย นอ โหฒว.”

← Chapter 18 Jump to: Chapter 20 →