Judges 21

Mien Bible (Thai Script) © Thailand Bible Society, 2007

← Chapter 20 Jump to:

1อิสะลาเอน เมี่ยน เยียม มิดปา โฮ้ว เจี๊ยน หว่า ก๊อง, “เยีย บัว หาย เต้า หย่า ไม้ ปู๋ง เยีย บัว เญย เซียะ ปุน เบนยามิน เมี่ยน หล่ง โหฒว เอ๊า.”

2หฒวัง เมี่ยน ฯฒฯ ต้าย เถา เบดเอน, เฒว์ย เจี๊ยน ทิน-ฮู่ง เญย หฑะเฮมียน เถา ลู่ง ม์าน-หฮมวัง. นิ่น บัว เญี้ยม ตุ๊ เฮญี้ยว มุน ไห่.

3นิ่น บัว ก๊อง, “โอ เฒี้ยว, อิสะลาเอน เมี่ยน เญย ทิน-ฮู่ง อ้า! น้าย หญู่ง สี่ เหว่ย หาย ติ่ว ไฮ่ เยียม อิสะลาเอน ธ้วด ต้าย? อี้ ฮนอย อิสะลาเอน เมี่ยน เหว่ย หาย ติ่ว อ๋อย หฒุ โหฒะ เหยียด ฝีง?”

4ตะเหญ่ย ฮนอย หฒวัง แปะ ฝีง เจี์ย ซิน เฑี้ยว เญย แอ๋ง เยียม วั้ว เหธย นอม เหฒี่ย-ต้อง ฯฒฯ ฝ่ง ห่อ ปั๊ว เหฒี่ย เหธา เหฒี่ย เหว่ย จิว ทง เญย กะน้าย.

5อิสะลาเอน เมี่ยน ล่าน หน่าย ล่าน, “เยียม อิสะลาเอน เญย ฝีงๆ เมี่ยน ม่าย หาย เต้า ไม้ ต้าย เยียม เฒี้ยว เญย หฑะเฮมียน?” เหว่ย หฒุ นิ่น บัว โฮ้ว เจี๊ยน แล์ง เจี๋ย แหง่ง หว่า ก๊อง, “หาย เต้า ไม้ ต้าย เถา มิดปา เยียม เฒี้ยว เญย หฑะเฮมียน นอ, วั้ว เต้า ด่ง หาย ฒู้ง อ๋อย หฒุ ไต๋ ไต่.”

6อิสะลาเอน เมี่ยน ค้อ-เลี่ยน นิ่น บัว เญย โย์ว, เบนยามิน เมี่ยน. นิ่น บัว ก๊อง, “อี้ ฮนอย เยียม อิสะลาเอน เมี่ยน บุด๋ง ธา เหยียด ฝีง หมี่ อ๊ะ.

7บัว อ๋อย หฒุ ฮนั้ง หาย นอ โหฒว ล์อ เอ๊า ปุน เหฒ่ง เหฌี่ย วั้ว เต๋ย เบนยามิน เมี่ยน หล่ง? บัว เฒี้ยง เจี๊ยน เฒี้ยว โฮ้ว หว่า ก๊อง, ‘เยีย บัว หาย เต้า หย่า ไม้ ปู๋ง เยีย บัว เญย เซียะ ปุน เบนยามิน เมี่ยน หล่ง โหฒว เอ๊า.’”

8นิ่น บัว ฯฒฯ ล่าน หน่าย ล่าน, “ม่าย หาย ฝีง อิสะลาเอน เมี่ยน ไม้ ต้าย มิดปา กั๊บ ฒุ้น เยียม เฒี้ยว เญย หฑะเฮมียน? หมั่ง ม่าะ! ไม้ ม่าย เหยียด เต้า ยาเบดกิเลอาด เญย เมี่ยน ต้าย เปียะ เธี้ยง กั๊บ ฒุ้น เญย หวุ่ย.”

9เหว่ย หฒุ ซ้าว เมี่ยน เญย เฒี่ยง โห่ นิ่น บัว ไม้ ม่าย เหยียด เต้า ยาเบดกิเลอาด เญย เมี่ยน เยียม หน่าย.

10กั๊บ ฒุ้น เญย หวุ่ย กะญั์ว เญย เมี่ยน ฯฒฯ พ้าย เหยียด หว่าน อี ธิน เต้า เบ๊าะ จ๋า เฮ้น เญย แปง หย่า จา หว่า นิ่น บัว, “อ๋อย หฒุ หล่ง หฑุ ด๊าว ไต๋ เหฑ่ง ยาเบดกิเลอาด เญย เมี่ยน, เลี่ยม มเซียะ ตอน เหธา ฝุเจว๊ย ไต๋ เหฑ่ง.

11เม่ย บัว อ๋อย หฒุ ฮนั้ง น้าย นอ โหฒว. อ๋อย หฒุ ไต๋ เหยียด ฒู้ง มจั่ง ตอน, หย่า ไต๋ เต้าๆ เหธา มจั่ง ตอน เปว๋ย เจี๋ย เญย มเซียะ ตอน.”

12เยียม ยาเบดกิเลอาด, นิ่น บัว ล์อ ปวัด เฝย แป๊ะ เต้า ไม้ เปว๋ย เจี๋ย ตอน เญย เซียะ-หลุน, ฯฒฯ ต้อ วั้ว เต๋ย เซียะ เถา คานาอัน เต่ย-ปูง, ซีโล เญย เธี้ยง วั้ว.

13เยียม หวุ่ย กั๊บ ฒุ้น เญย เมี่ยน ฯฒฯ พ้าย เมี่ยน มี่ง บั๋ว เยียม ลิมโมน เญย หละเปย๊ย-แบ๋ง วั้ว เต๋ย เบนยามิน เมี่ยน, อิสะลาเอน เมี่ยน อ๋อย เหธา นิ่น บัว โหฒว หลง, ก๊อง หอบ.

14เบนยามิน เมี่ยน ฯฒฯ หฑวน ต้าย. อิสะลาเอน เมี่ยน เฒาะ ต้ง นิ่น บัว เสีย ธ้วด แหม่ง วั้ว เต๋ย เฝย แป๊ะ เต้า ยาเบดกิเลอาด เญย เซียะ ต้าย ปุน เบนยามิน เมี่ยน หล่ง โหฒว เอ๊า, มป่า หธ่อ ไม้ เก๋า นิ่น บัว เต้าๆ หล่ง.

15แปะ ฝีง เหว่ย เบนยามิน เมี่ยน ไฮ์ เฮญี้ยว มุน เหว่ย หฒุ เฒี้ยว โหฒว ปุน เยียม อิสะลาเอน เมี่ยน บุด๋ง โหฒะ เหยียด ฝีง หมี่ อ๊ะ.

16หวุ่ย เญย หฒวัง เมี่ยน โก๋ ก๊อง, “เบนยามิน เมี่ยน เญย มเซียะ ตอน หฒุ เหมียด เหฑ่ง หมี่ อ๊ะ. ฮนั้ง หน่าย, บัว อ๋อย หฒุ ฮนั้ง หาย นอ โหฒว เหว่ย ล์อ เอ๊า ปุน เหฒ่ง เหฌี่ย วั้ว เต๋ย เบนยามิน เมี่ยน หล่ง?”

17นิ่น บัว แอ๋ง ก๊อง, “ตุ๊ ธ้วด สีง แหม่ง วั้ว เต๋ย เบนยามิน เมี่ยน ฮนั้ง หาย ฒู้ง อ๋อย หฒุ ม่าย เมี่ยน หฑิบ นิ่น บัว เญย ป่วน, เหว่ย ปุน เหยียด ฝีง อิสะลาเอน เมี่ยน ไม้ หฒุด เหฑ่ง.

18มป่า บัว ไม้ ไฮ่ ปู๋ง บัว เญย เซียะ ปุน นิ่น บัว หล่ง โหฒว เอ๊า, เหว่ย หฒุ อิสะลาเอน เมี่ยน โฮ้ว เจี๋ย หว่า ก๊อง, ‘หาย เต้า ปู๋ง เซียะ ปุน เบนยามิน เมี่ยน หล่ง โหฒว เอ๊า นอ, วั้ว เต้า ฒู้ง หฒุ เหฒียว อ๊ะ.’”

19นิ่น บัว ฯฒฯ ก๊อง, “ฮนั้ม หมั่ง ก๋า! หฮญังๆ เยียม ซีโล ม่าย นอม โห่ว เฒี้ยว เญย ฒิบ, เซ เยียม เบดเอน เญย ป๊ะ ปูง, เยียม เบดเอน มี่ง เซเคม วั้ว ติ้ว ต้ม เจ๊า เญย ตง ปูง แหมง, เลโบนา เญย น่าม ปูง.”

20นิ่น บัว ฯฒฯ หฌาว เหฒียง เบนยามิน เมี่ยน, “กุ๊น มี่ง ปี๋ง เจี๊ยน อะหงุ่น หฮวีง กะญั์ว.

21ฒั้ว หมั่ง เจี๊ยน, ปวัด ซีโล เมี่ยน เญย เซียะ ธ้วด ต้าย เหธา เจี๊ยน หธัง เหย เญย เมี่ยน หธัง เหย, กุ๊น เยียม อะหงุ่น หฮวีง ธ้วด ต้าย. เม่ย บัว เหยียด เต้า ธ้าง เต้า ซีโล เมี่ยน เญย เซียะ มี่ง โหฒว เอ๊า ฯฒฯ หฑวน เบนยามิน เต่ย อ๊ะ.

22สี ก๊อง วั้ว เต๋ย เซียะ เญย เตีย ไฟ มั์ว-ต่อย ต้าย โก๋ เยีย บัว, เยีย บัว หมั่น ต้าย เถง ก๊อง บั๋ว นิ่น บัว, ‘โท้ หมั่ง เต๋ย เยีย บัว เญย เฮมียน หย่า ฆอย เอ๋ย ปุน นิ่น บัว, เหว่ย หฒุ เบ๊าะ จ๋า เญย เฒี่ยง โห่ เยีย บัว ไม้ ตุ๊ เซียะ เก๋า นิ่น บัว หล่ง โหฒว เอ๊า. หย่า ไม้ เฒ์ย เม่ย บัว ปู๋ง เซียะ ปุน นิ่น บัว. สี ก๊อง ฮนั้ง หน่าย, อี้ หฒั่น อ๋อย หฒุ ฝุน เม่ย บัว ม่าย ฒุ์ย.’”

23เบนยามิน เมี่ยน ฯฒฯ เอย เจี๊ยน โหฒว. หฒิว นิ่น บัว เญย โสว โหม่ว เต้าๆ ตุ๊ หธัง เหย เญย เซียะ ธ้าง ต้าย โหฒว เอ๊า. นิ่น บัว แอ๋ง หฑวน มี่ง เยียม นิ่น บัว กั้น หฑิบ เญย ป่วน เดา, แอ๋ง เซียง-เหธย เจี๋ย ฒี่ง ฯฒฯ เยียม หน่าย ฒี่ง กะญั์ว.

24ต้ง วั้ว หฒั่น อิสะลาเอน เมี่ยน เล่ย ฆอย วั้ว นอม ต๋อง, เก๊าะ-เมี่ยน หฑวน เก๊าะ-เมี่ยน เญย ฝีง เหธา โต้ว ฒง เมี่ยน. เก๊าะ-เมี่ยน หย่า หฑวน เก๊าะ-เมี่ยน หฑิบ เญย ป่วน เดา.

25วั้ว จ๋า ลู่ง เดี๊ย อิสะลาเอน ไม้ ม่าย ฮู่ง เตี๋ย, เก๊าะ-เมี่ยน หฒิว เก๊าะ-เมี่ยน กั้น เญย เฮญี้ยว เซว่ย เอ๋ย โหฒว.

← Chapter 20 Jump to: