Ruth 4

Georgian 2013 (ბიბლია)

← Chapter 3 Jump to:

1გავიდა ბოყაზი კარიბჭესთან, და იქ ჩამოჯდა. და, აჰა, იმ გამომხსნელმა ჩამოიარა, ვისზეც, ლაპარაკობდა ბოყაზი. დაუძახა ბოყაზმა: „მოდი, ჩემო კეთილო, და აქ ჩამოჯექი!“ და ისიც მივიდა და ჩამოჯდა.

2და მოიყვანა ბოყაზმა ათი კაცი ქალაქის უხუცესთაგან და უთხრა მათ: „აქ ჩამოსხედით.“ და დასხდნენ ისინი.

3და უთხრა მან გამომხსნელს: „ნაყომი, რომელიც მოაბის ველებიდან დაბრუნდა, ჰყიდის მინდვრის ნაკვეთს, რომელიც ჩვენს ძმას, ელიმელექს ეკუთვნოდა.

4მე გადავწყვიტე, შენს ყურამდე მომეწვდინა ეს ამბავი და მეკითხა: თუ გინდა მისი გამოხსნა, იყიდე ის ამ მოქალაქეებისა და ჩემი ხალხის უხუცესთა თანდასწრებით. ხოლო თუ არ გინდა მისი გამოხსნა, მაშინ მითხარი მე, რომ ვიცოდე, რადგან შენს მეტს არავის არა აქვს გამოხსნის უფლება, და შენს შემდეგ კი მე ვარ.“ და უთხრა მან: „თანახმა ვარ გამოვიხსნა.“

5და თქვა ბოყაზმა: „იმ დღეს, რა დღესაც მინდორს იყიდი ნაყომისგან, მოაბელი რუთიც, გარდაცვლილის ცოლიც უნდა გამოისყიდო და ცოლად შეირთო, რათა სახელი აღუდგინო გარდაცვლილს თავის სამკვიდროში.“

6და უპასუხა მან: „ვერ გამოვისყიდი, ვაითუ, დავაქციო ჩემი სამკვიდრებელი. უიკეთესია შენ გამოიხსნა, რაც ჩემი გამოსახსნელია, რადგან მე ვერ გამოვიხსნი.“

7ძველთაგან ასეთი ჩვეულება ჰქონდათ ისრაელში: გამოხსნაზე, გაცვლაზე, ან რაიმე საქმის დადასტურებაზე: ერთი გამომხსნელი ან გამცვლელი გაიძრობდა ფეხსაცმელს და მეორეს მისცემდა; ეს მოწმობის ნიშანი იყო ისრაელში.

8და უთხრა იმ გამომხსნელმა ბოყაზს: „შენთვის გამოისყიდე!“ და გაიძრო ფეხსაცმელი.

9და უთხრა ბოყაზმა უხუცესებს და მთელ ხალხს: „დღეს თქვენა ხართ მოწმენი, რომ გამოვისყიდე ნაყომისგან, რაც ელიმელექს, ქილიონს და მახლონს ეკუთვნოდათ.

10ასევე მოაბელი რუთი, მახლონის ქვრივი, გამოვისყიდე ცოლად, რათა სახელი აღვუდგინო გარდაცვლილს თავის სამკვიდრებელში, და რათა არ გაქრეს გარდაცვლილის სახელი მის მოძმეთა შორის და მისი ქალაქის კარიბჭიდან; ამის მოწმენი თქვენა ხართ დღეს.“

11და უთხრეს კარიბჭესთან მდგომმა მთელმა ხალხმა და უხუცესებმა: „მოწმენი ვართ! უფალმა დალოცოს შენს სახლში შემომავალი ქალი, როგორც რახელი და ლეა, რომელთაც ააშენეს ისრაელის სახლი; სიმდიდრე შეგძენოდეს ეფრათაში და ბეთლემში იდიდოს შენმა სახელმა.

12და გახდეს შენი სახლი, როგორც სახლი ფერეცისა, რომელიც უშვა თამარმა იუდას, იმ მოდგმიდან, უფალი რომ მოგცემს ამ ყმაწვილი ქალისგან.“

13და წაიყვანა ბოყაზმა რუთი და გახდა იგი მისი ცოლი. და როცა შევიდა მასთან, მისცა მას უფალმა ორსულობა და შვა ვაჟი,

14და ეუბნებოდნენ დედაკაცები ნაყომის: „კურთხეულია უფალი, რომელმაც არ მოგიშალა გამომხსნელი ნათესავი დღეს! იდიდოს მისმა სახელმა ისრაელში!

15ის იქნება შენი განმაახლებელი და შენი სიბერის მზრუნველი. რადგან იგი გიშვა შენმა რძალმა, რომელსაც უყვარხარ და, რომელიც შვიდ ვაჟიშვილზე მეტია შენთვის.“

16და მიირქვა ნაყომიმ ყმაწვილი, უბით ატარებდა, და გახდა მისი გამდელი.

17და სახელი მეზობლის ქალებმა დაარქვეს და ამბობდნენ: ვაჟი შეეძინაო ნაყომის. და დაარქვეს მათ სახელად ყობედი, რომელიც მამაა იესესი, დავითის მამისა.

18აჰა, შთამომავლობა ფერეცისა: ფერეცმა შვა ხეცრონი,

19ხეცრონმა შვა რამი, რამიმ შვა ყამინადაბი,

20ყამინადაბმა შვა ნახშონი, ნახშონმა შვა სალმონი,

21სალმონმა შვა ბოყაზი, ბოყაზმა შვა ყობედი,

22ყობედმა შვა იესე, იესემ შვა დავითი.

← Chapter 3 Jump to: