Daniel 11 — Институт перевода Библии, 2022

1– Midiyalı Dariydiń húkimdarlıǵınıń birinshi jılında, men oǵan járdem berip, qorǵaw ushın onıń qasında turǵan edim.

2– Endi men saǵan haqıyqattı aytaman. Persiya patshalıǵında jáne úsh patsha húkimdarlıq qıladı. Biraq tórtinshi patsha basqalarına qaraǵanda baylıǵı aytarlıqtay kóp bolıp, baylıǵı arqalı kúsh arttıradı hám hámmeni Grek patshalıǵına qarsı qozǵaydı.

3Keyin taxtqa kúshli bir patsha otıradı, ol ullı húkimdarlıq penen basqarıp, qálegen isin qıladı.

4Degen menen, ol kúsh-qúdiretke tolıp tasqanda, patshalıǵı ıdırap, tórtke bólinip ketedi. Taxt onıń zúryadına berilmeydi hám patshalıqtıń aldınǵı kúsh-qúdireti olarda bolmaydı. Sebebi onıń patshalıǵı túp-tamırı menen julıp taslanıp, onıń zúryadınan bolmaǵan basqa birewlerge beriledi.

5Sol arada qubla patshası kúsheyip ketedi, biraq patshanıń sárkárdarlarınan biri kúsheyip, patshanıń saltanatınan góre úlkenirek bir patshalıqqa húkimdarlıq qıladı.

6Bir neshe jıl ótkennen soń, qubla patshası arqa patshası menen tınıshlıq kelisimin dúzedi. Usı kelisimdi bekkemlew ushın, qubla patshasınıń qızı arqa patshasına baradı. Degen menen, qubla patshasınıń qızı óz kúshin joytadı hám kúshin saqlay almaydı. Qız, onıń menen birge kelgen nókerleri, balası hám onı qollap quwatlaǵan qolǵa tapsırıladı.

7Biraq qubla patshalıǵınıń taxtına qızdıń aǵayinlerinen biri otıradı. Ol arqa patshalıǵınıń láshkerlerine hújim qılıp, qorǵanların qolǵa aladı hám olardıń ústinen jeńiske erisedi.

8Olardıń músin qudayların, quyma butların, gúmis hám altınnan islengen qımbatbaha ıdısların olja qılıp, Mısırǵa alıp ketedi. Keyin bir neshe jıl dawamında arqa patshasınıń tınıshın buzbaydı.

9Sońınan arqa patshası qubla patshasına bastırıp baradı, biraq artqa sheginiwge májbúr bolıp, óz eline qaytıp ketedi.

10Keyin arqa patshalıǵınıń balaları urısqa tayarlanıp, júdá kóp láshker jıynaydı. Láshkerler topan suwday aǵıp, qubla patshalıǵınıń qorǵanına hújim qıladı.

11Ǵázepke mingen qubla patshası arqa patshası menen sawashqa túsedi. Arqa patshasınıń sansız láshkerleri dushpan qolına táslim qılınadı.

12Sansız láshkerdiń ústinen jeńiske erisken qubla patshası tákabbirlenip ketedi hám mıń-mıńlaǵan áskerdi óltirse de, onıń jeńisi uzaqqa sozılmaydı.

13Sebebi bir neshe jıldan keyin arqa patshası aldınǵısınan da kóp hám jaqsı qurallanǵan láshkerleri menen qubla patshalıǵına jáne bastırıp baradı.

14Sol waqıtta kóp adamlar qubla patshasına qarsı bas kóteredi. Ayan ámelge assın, dep xalqıńnıń arasındaǵı bazı qozǵalańshılar da bas kóteredi, biraq tabısqa erise almaydı.

15Sonda arqa patshası kelip, qorǵan qalanı qamal qıladı, ishine kiriw ushın diywalǵa topıraq úyip, onı qolǵa aladı. Qubla patshalıǵınıń láshkerleri arqa patshalıǵınıń kúshine qarsı tura almaydı, hátteki, qubla patshalıǵınıń saylandı láshkerleri de jawdıń láshkerleriniń kúshli hújimin qaytara almaydı.

16Arqa patshası qálegenin isleydi, hesh bir adam oǵan qarsılıq qılıwǵa júreksinbeydi. Ol gózzal Izrail úlkesin qolǵa kirgizip, onı wayran etiw múmkinshiligine iye boladı.

17Aldın arqa patshası óz patshalıǵınıń bar kúshi menen qubla patshalıǵın basıp almaqshı boladı. Ol qubla patshalıǵın jer menen jeksen qılıw maqsetinde onıń patshası menen kelisim dúzip, oǵan qızın uzatadı. Biraq arqa patshasınıń bul jobaları push bolıp, tabısqa erise almaydı.

18Sonnan soń arqa patshası burılıp, teńiz boyındaǵı qalalarǵa hújim qılıp, kóbisin qolǵa aladı. Degen menen, bir sárkárda bul tákabbir patshanı toqtatıp, onıń qılmıslarına jarasa jazasın beredi.

19Sonda arqa patshası sheginip, óz elindegi qorǵanlarǵa qaytadı hám jolda jeńiliske ushırap, izsiz joq boladı.

20Onıń ornına arqa taxtına basqa bir patsha otıradı. Ǵáziynesin toltırmaqshı bolǵan bul patsha salıqshısın jiberip, adamlarǵa kóp salıq saladı. Biraq qısqa waqıt ishinde ol óledi. Onıń ólimi sawashtıń yamasa birewdiń qastıyanshılıǵı nátiyjesinde júz bermeydi.

21Onıń ornına taxtqa otırǵan patsha ońbaǵan bir adam boladı. Patsha zúryadınan bolmaǵan bul adam kútilmegende hiylekerlik penen arqa patshalıǵınıń taxtına otırıp aladı.

22Ol ózine qarsılıq kórsetken júdá kúshli áskeriy ordanı joq qıladı. Hátteki, kelisim dúzgen húkimdardı da usı awhalǵa saladı.

23Ol basqa xalıqlar menen kelisim dúzip, hiylekerlik penen is tutadı. Oǵan ergenlerdiń sanı az bolıwına qaramastan, onıń kúshi barǵan sayın artıp baradı.

24Ol bay wálayatlarǵa kútilmegende bastırıp barıp, ata-babaları hesh qashan qılmaǵan islerge qol uradı. Qolǵa kirgizgen olja hám mal-múliklerdi óziniń izine ergenlerge bólistirip beredi. Qorǵanlardı qolǵa alıw jobaların dúzedi, biraq bul jaǵday uzaqqa sozılmaydı.

25Ol kúsh-qúdiretin jıynap, qubla patshasına úlken bir láshker tartıp baradı. Qubla patshası da oǵada qúdiretli hám kúshli láshkerleri menen urısqa shıǵadı. Biraq oǵan qarsı dúzilgen hiylekerlik sebepli artıq qarsı tura almaydı.

26Qubla patshasınıń óz tabaqlasları oǵan satqınlıq qıladı. Onıń ordası jeńiliske ushırap, kóbisi qırılıp qaladı.

27Sol eki patshanıń júreginde jaman niyet boladı. Olar bir dasturxanda otırıp, bir-birine ótirik sóyleydi. Biraq bunnan nátiyje shıqpaydı. Sebebi belgilengen waqıt ele kelmegen edi.

28Arqa patshası kóp baylıq penen óz eline qaytıp ketedi. Biraq onıń júregi muxaddes kelisimge qarsı boladı. Jolda ol niyetin ámelge asırıp, keyin óz eline qaytadı.

29Belgilengen waqıtta arqa patshası qubla patshalıqqa jáne júris qıladı, biraq bul ret aldınǵıday bolmaydı.

30Batıstan kelgen kemeleri oǵan qarsılıq kórsetedi, ruwxı túsken patsha artqa sheginedi. Biraq qaytıp kelgende, ol ashıwın muxaddes kelisim dúzgen xalıqtan aladı, muxaddes kelisimnen bas tartqanlarǵa bolsa jaqsılıq qıladı.

31Onıń láshkerleri Muxaddes mákannıń qorǵanına bastırıp kirip, Muxaddes orındı haramlaydı. Kúndelikli qurbanlıqlardı toqtatıp, wayran qılatuǵın jerkenishli bir zattı ornatadı.

32Sol patsha hiyle menen kelisimnen bas tartqanlardıń kewlin tawıp, olardı óz tárepine awdırıp aladı. Al Qudayǵa sadıq qalǵanlar bolsa, bar kúshi menen oǵan qarsılıq kórsetedi.

33Xalıqtıń arasındaǵı dana jolbasshılar adamlarǵa aqıllı násiyatlar beredi. Degen menen, bir qansha waqıtqa deyin olardıń bazıları qılıshtan óledi, otta jandırıladı, bazıları zindanǵa taslanadı, talan-taraj boladı.

34Quwǵın waqtında olar azǵantay járdem aladı. Kópler jaǵımpazlıq penen olarǵa qosıladı.

35Quwǵın waqtında bir neshe dana adamlar azap shegedi. Usı arqalı aqırǵı waqıtqa deyin olar usılayınsha páklenip, tazalanadı. Sebebi belgilengen waqıt ele kelmegen.

36Arqa patshası kewli qálegen isti qıladı. Ol ózin kókke kóterip, qudaylardan joqarı qoyadı. Qudaylardıń Qudayına qarsı sóylep, til tiygizedi. Qudaydıń belgilep qoyǵan ǵázep waqtı tawısılǵanǵa deyin, ol tabıslı boladı. Degen menen, Quday óz jobasın sózsiz ámelge asıradı.

37Ol ata-babaları sıyınǵan qudaylardı hám hayallar jaqsı kórgen qudaydı mensinbeydi. Ol ózin olardıń hámmesinen joqarı qoyıp, birde bir qudaydı óz názerine ilmeydi.

38Bulardıń ornına qorǵanlardı qorǵawshı, dep atalǵan qudaydı ullılaydı. Ata-babaları tabınbaǵan bul qudayǵa altın, gúmis, qımbat bahalı taslar hám qımbat sıylardı sadaqa qılıp, húrmet kórsetedi.

39Ol jat qudaydıń járdemi menen qorǵanların qorǵaydı. Onı haqıyqıy húkimdar dep tán alǵanlarǵa húrmet-izzet kórsetip, olardı kóp adamlardıń ústinen basshı etip qoyadı hám olarǵa jerlerdi sawǵa sıpatında bólip beredi.

40Zamannıń aqırında qubla patshası oǵan hújim qıladı. Biraq arqa patshası sawash arbaları, atlıları hám kóp kemeleri menen oǵan quyınday bastırıp barıp, jerlerdi suw tasqını sıyaqlı jaypap ótedi.

41Ol gózzal Izrail úlkesin de qolǵa alıp, kóplegen ellerdiń basına jetedi. Degen menen, edom, moab hám ammon xalqınıń basshıları onıń qolınan qashıp qutıladı.

42Ol basqa ellerge de qol saladı, Mısır da onnan qashıp qutıla almaydı.

43Ol Mısırdıń altın, gúmis qaznalarına hám barlıq baylıqlarına iyelik qıladı. Liviyalılar menen xabashstanlılar da oǵan baǵınıshlı boladı.

44Degen menen, shıǵıs hám arqa tárepten kelgen xabarlar onı tań qaldıradı. Bul xabardan ǵázeplengen patsha jolǵa atlanıp, kóp adamlardı qırıp taslaydı.

45Keyin teńiz hám gózzal muxaddes taw arasındaǵı jerlerge barıp, sol jerge patshalıq shatırların tigedi. Biraq ol sol jerde óledi, oǵan járdem beretuǵın hesh kim bolmaydı.