Daniel 8

Институт перевода Библии, 2022

← Chapter 7 Jump to: Chapter 9 →

1Birinshi ayannan keyin, patsha Belshassardıń húkimdarlıǵınıń úshinshi jılında Danielge, yaǵnıy maǵan jáne bir ayan kórindi.

2Bul ayanda men Elam wálayatınıń Suza qorǵan qalasında, Ulay kanalınıń boyında turǵan ekenmen.

3Men kanal boyında bir qoshqardıń turǵanın kórdim. Onıń uzın eki múyizi bar edi. Onıń múyiziniń biri uzınıraq, sol uzın múyizi ekinshi bolıp shıqqan edi.

4Qoshqar batıs, arqa hám qubla táreplerge ózin urıp atırǵanın kórdim. Hesh bir haywan oǵan qarsı shıǵa almaytuǵın edi hám onıń qolınan hesh nárseni qutqara almaytuǵın edi. Qoshqar qálegenin islep, ózin aybatlı qılıp kórsetti.

5Bunı tamasha qılıp turǵanımda, batıs tárepten bir tekeniń pútkil jer júzin aralap, tuyaqları jerge tiymesten kiyatırǵanın kórdim. Onıń kózleriniń ortasında bir úlken múyizi bar edi.

6Ol bar kúshi hám ǵázebi menen men kórgen kanaldıń boyında turǵan eki múyizli qoshqarǵa qaray taslandı.

7Ǵázep penen qoshqardı súzip, onıń múyizlerin sındırǵanın kórdim. Qoshqardıń tekege qarsı shıǵatuǵın kúshi joq edi. Teke onı jerge qulatıp, basqılap tasladı, qoshqardı onıń qolınan qutqaratuǵın hesh kim bolmadı.

8Teke qattı kúsheyip ketti, biraq kúsh-qúdiretke tolǵan waqıtta, onıń úlken múyizi sınıp tústi hám onıń ornına tórt tárepke qayırılıp, basqa úlken tórt múyiz ósip shıqtı.

9Sol múyizlerdiń birinen jáne bir kishkene múyiz ósip shıqtı. Keyin ol úlkeyip, qublaǵa, shıǵısqa hám gózzal úlkege qaray jayıla berdi.

10Qúdireti kókke jetken bul múyiz aspan láshkerlerine hújim qıldı. Aspan láshkerleri bolǵan juldızlardıń bazıların jerge túsirip, olardı basqılap tasladı.

11Hátteki, aspan láshkerleriniń sárkárdasın mensinbey, oǵan beriletuǵın kúndelikli qurbanlıqlardı toqtattı. Muxaddes mákandı bolsa wayran qıldı.

12Jawızlıq sebepli aspan láshkerleri kúndelikli qurbanlıqlar menen birge oǵan tapsırıldı. Haqıyqattı ayaq astı qılǵan sol múyiz hár bir isinde tabısqa eriser edi.

13Keyin bir perishteniń sóylesip atırǵanın esitip qaldım. Basqa bir perishte onnan bılay dep soradı: – Ayandaǵı bul jawızlıq kúndelikli qurbanlıqlardıń ornın qashanǵa deyin iyeleydi? Qashanǵa deyin Muxaddes orın hám aspan láshkerleri ayaq astı boladı?

14Ekinshi perishte maǵan bılay dedi: – Bunday awhal eki mıń úsh júz kún hám tún dawam etedi. Sonnan keyin, Muxaddes orın páklenip, aldınǵı halına qaytarıladı.

15Men, Daniel kórgen ayannıń mánisin túsiniw ushın, basımdı qatırıp turǵanımda, kútilmegende, aldımda adam súlderindegi birew payda boldı.

16Sol waqıtta men Ulay kanalınan: «Háy, Jabrayıl, bul adamǵa ayannıń mánisin túsindirip ber», – dep aytqan adam dawısın esittim.

17Jabrayıl men turǵan jerge jaqınlasqanda, qorqqanımnan et betimnen jerge jıǵıldım. Biraq ol maǵan: – Háy, insan ulı, bul aqırzaman haqqındaǵı ayan ekenin túsin, – dedi.

18Ol sóylep atırǵanda esten awıp, jerde sozılıp jatırǵan edim. Degen menen, ol qolın sozıp, meni ayaqqa turǵızıp qoydı da,

19maǵan bılay dedi: – Qulaq sal, Quday Óz ǵázebin jer júzine shashıwdı belgilegen waqtında, neler bolatuǵının saǵan bildiremen. Sebebi bul ayan belgilengen aqırzamanǵa baylanıslı.

20Sen kórgen eki múyizli qoshqar – bul Midiya hám Persiya patshaları.

21Júnli teke bolsa – Grek patshası. Eki kóziniń ortasındaǵı úlken múyiz – Grek taxtına otıratuǵın birinshi patsha.

22Sınıp túsken múyizdiń ornına shıqqan tórt múyiz – sol xalıqtan shıǵatuǵın tórt patshalıqtı bildiredi. Taxtqa otırǵan tórt patsha aldınǵı patshaǵa qaraǵanda hálsiz boladı.

23Sol tórt patshanıń húkimdarlıǵınıń aqırı jaqınlap, gúnaları tolıp tasqanda, hiylekerlikke sheber, aybat júzli bir patsha bas kóterip shıǵadı.

24Ol júdá kúsheyip ketedi, biraq óz kúshi menen buǵan erispeydi. Ol hámme nárseni wayran qılıp, barlıq islerinde tabısqa erisedi. Kúshli basshılardı hám muxaddes xalıqtı qırıp taslaydı.

25Ol sumlıǵı menen hiylekerligi arqalı tabısqa erisip, tákabbirlenip ketedi. Kóp adamlardı eskertip otırmay óltiredi, hátteki, eń ullı patshalardıń Patshasına qarsı bas kóteredi. Biraq ol insan qolı tiymey-aq joq qılınadı.

26Saǵan aytılǵan azanǵa hám keshke baylanıslı ayan haqıyqat. Sen ayandı sır tut, óytkeni bul uzaq keleshekke baylanıslı.

27Usı waqıyadan soń, Danieldiń, yaǵnıy meniń mánisim qashıp, bir neshe kún awırıp jattım. Sońınan ornımnan turıp, patshanıń xızmetine qayttım. Degen menen, bul ayan meni pútkilley hawlıqtırıp taslaǵan edi. Men onıń mánisin túsinbegen edim.

← Chapter 7 Jump to: Chapter 9 →