Daniel 9

Институт перевода Библии, 2022

← Chapter 8 Jump to: Chapter 10 →

1Babiloniya patshalıǵına otırǵan midiyalı Axashwerosh ulı Dariydiń húkimdarlıǵınıń birinshi jılı edi.

2Men, Daniel Dariydiń húkimdarlıǵınıń dáslepki jılında Muxaddes Jazıwlardı túsiniwge kirisken edim. Jaratqan Iyeniń payǵambar Eremiyaǵa aytqan sózleri boyınsha, Erusalimniń jetpis jıl dawamında wayran bolıp jatatuǵının bilip aldım.

3Sonda men júzimdi Quday Iye tárepke burıp, jalbarınıp duwa ettim, oraza tuttım, aza kiyimin kiyip, kúlge otırdım.

4Qudayım Jaratqan Iyege duwa etip, gúnalarımızdı moyınlap, bılay dedim: «O, Iye, ullı hám aybatlı Quday! Seni súyip, buyrıqlarıńa boysınǵanlar menen dúzgen kelisimińde sadıq qalasań!

5Al bizler gúna islep, jamanlıqqa qol urdıq. Jawız islerdi islep, Saǵan qarsı bas kóterdik, buyrıqlarıńnan hám nızamlarıńnan júz burdıq.

6Bizler Seniń atıń menen patshalarımızǵa, basshılarımızǵa, ata-babalarımızǵa hám elimizdegi barlıq xalıqqa sóylegen xızmetkerleriń bolǵan payǵambarlarǵa qulaq salmadıq.

7Ádalatlıq Sen tárepte, Iye! Al bizler búgin shermende boldıq. Bizler Saǵan qıyanet etkenimiz ushın Yahuda hám Erusalim turǵınların – pútkil Izrail xalqı bolǵan bizlerdi uzaq hám jaqın ellerge tarqatıp jiberdiń.

8Jaratqan Iye, Saǵan qarsı gúna qılǵanımız ushın patshalarımız, basshılarımız, ata-babalarımız, – hámmemiz shermende boldıq.

9Quday Iyemiz, bizler Saǵan qarsı bas kótersek te, Sen gúnalarımızdı keshiriwshi, rehimli Qudaysań.

10Qudayımız Jaratqan Iye, bizler Saǵan qulaq salmadıq! Xızmetkerleriń payǵambarlar arqalı bizlerge bergen nızamlarıńa ámel qılmadıq.

11Pútkil Izrail xalqı Nızamıńdı buzıp, haq joldan azǵırıldı, Saǵan qulaq salıwdı qálemedi. Bizler Saǵan qarsı gúna qılǵanımız ushın, qulıń Muwsanıń Nızamında jazılǵan náletler basımızǵa tústi, ishilgen antlar orınlandı.

12Awa, Sen bizlerge hám basshılarımızǵa eskertip aytqan sózlerińdi júzege asırıp, bizlerdi úlken apatqa duwshar ettiń. Erusalimniń basına túsken awır apat jer júzindegi hesh bir jerde bolmaǵan.

13Muwsanıń Nızamında jazılǵan barlıq apatlar basımızǵa tústi. Al bizler sonda da gúnalarımızdan qaytıp, Qudayımız Jaratqan Iyeniń miyrim-shápáátin izlemedik, Onıń haqıyqat sózin de eske almadıq.

14Jaratqan Iye bizlerdi bul apatlarǵa duwshar qıldı, sebebi Qudayımız Jaratqan Iye islegen hár bir isinde ádalatlı. Al bizler Onıń sózine qulaq salmadıq.

15O, Quday Iyemiz, Sen Óz xalqıńdı Mısırdan qúdiretli qolıń menen alıp shıqtıń hám házirge deyin atıń dańqqa bólengen. Al bizler gúna qıldıq, jawızlıqqa qol urdıq.

16Iye, Sen haqlıǵıń boyınsha Óz qalań Erusalimnen, Ózińniń muxaddes tawıńnan ashıw hám ǵázebińdi alıp taslay gór! Bizlerdiń gúnalarımız hám ata-babalarımızdıń nızamsızlıqları sebepli Erusalim hám Óziń tańlaǵan xalqıń qońsı xalıqlardıń arasında xor bolıp atır.

17Endi Qudayımız, qulıńnıń duwasın hám jalbarınıwın esit. Óziń ushın, Iye, wayran bolǵan Muxaddes mákanıńa nurlı júzińdi qarat.

18Qudayım, qulaq salıp, esit! Kózlerińdi ashıp, bizlerdiń shekken azabımızǵa hám Óz atıń menen atalǵan qalańnıń awhalına qara. Bizler óz haqlıǵımızǵa súyenip emes, al Seniń sheksiz miyrimińe súyenip jalbarınamız.

19Iye, qulaq sal! Iye, bizlerdi keshir! Iye, názer salıp, háreket ete gór! Qudayım, Óziń ushın asıǵa gór, óytkeni bul qala hám xalıq Seniń atıń menen atalǵan».

20Men tınbay duwa etip, ózimniń hám xalqım Izraildıń gúnaların ashıq moyınlap, Qudaydıń muxaddes tawı – Erusalim ushın Qudayım Jaratqan Iyege jalbarınıp atırǵan edim.

21Men ele duwa etip atırǵanımda, aldınǵı ayanımda kórgen adam súlderindegi Jabrayıl jıldam ushıp, qasıma kelip turdı. Bul keshki qurbanlıq usınılatuǵın waqıt edi.

22Ol maǵan túsindirip, bılay dedi: – Daniel, men saǵan danalıq hám túsinik beriw ushın keldim.

23Sen Qudayǵa duwa etip baslaǵanıńda, Ol saǵan juwap bergen edi. Men juwaptı saǵan jetkiziw ushın keldim, sebebi sen Qudaydıń súyikli bendesiseń. Qáne, endi aytatuǵın sózlerime jaqsılap qulaq sal, ayannıń mánisin túsinip al.

24Jınayat islerdi toqtatıp, gúnalarǵa shek qoyıw, ayıplardı páklew hám máńgi ádillikti ornatıw, ayan hám payǵambarlardıń sózleri ámelge asıp, júdá muxaddes Ibadatxana qayta baǵıshlanıp, maylanıwı ushın Quday seniń xalqıń hám muxaddes qalań ushın jetpis hápte belgiledi.

25Mınanı túsinip, bilip al: Erusalimdi qayta qurıw ushın buyrıq berilgennen baslap, maylanǵan húkimdar kelgenge deyin jetpis hápte ótedi. Alpıs eki hápte ótkende, Erusalim qalası, onıń kósheleri hám qorǵanları qayta tiklenedi, biraq bul qıyınshılıq dáwirde júz beredi.

26Alpıs eki hápte ótkende, maylanǵan húkimdar óltiriledi hám ol erisken hár bir nárse joq boladı. Keyingi keletuǵın húkimdardıń áskerleri qalanı da, Ibadatxananı da wayran qıladı. Onıń aqırı topan suwınday bolıp, urıs aqırına deyin dawam etedi. Quday qıyratıwdı qarar etken edi.

27Sol húkimdar kóp xalıqlar menen bir hápte kúshli bir kelisim dúzedi. Sol hápteniń yarımı ótkende, ol qurbanlıq hám sadaqalarǵa shek qoyadı. Jáne de, Ibadatxanaǵa wayran qılatuǵın jerkenishli bir zattı ornatadı. Bul – wayran qılıwshı húkimdardı joq qılıw ushın Quday belgilegen kúnge deyin dawam etedi.

← Chapter 8 Jump to: Chapter 10 →