Esther 1

Институт перевода Библии, 2022

Jump to: Chapter 2 →

1Bul waqıya patsha Axashweroshtıń dáwirinde bolǵan edi. Axashwerosh Hindistannan Xabashstanǵa shekem sozılǵan bir júz jigirma jeti wálayattıń ústinen patshalıq etetuǵın edi.

2Sol waqıtta patsha Axashwerosh Suza qorǵan qalasındaǵı taxtında otırıp el basqardı.

3Ol patshalıǵınıń úshinshi jılında óziniń barlıq bekleri hám xızmetshileri ushın zıyapat berdi. Persiya hám Midiya áskerbasıları, aqsúyekler hám bir júz jigirma jeti wálayattıń basshıları onıń aldına keldi.

4Kóp kúnler, yaǵnıy bir júz seksen kún dawamında Axashwerosh óz patshalıǵınıń sheksiz baylıǵın, ullılıǵınıń sulıwlıǵın hám saltanatın kórsetti.

5Sol kúnler tamam bolǵannan keyin, patsha Suza qalasındaǵı xalıqtıń úlken-kishisine arnap, óz sarayınıń baǵ háwlisinde jeti kún zıyapat berdi.

6Háwliniń mármer baqanlarına ornatılǵan gúmis halqalarǵa shım qızıl hám hasıl zıǵır arqanlar menen baylanǵan aq hám qızǵısh kók reńli gezlemeler ildirilgen edi. Mármer hám hár túrli reńdegi taslar tóselgen háwlide altın hám gúmis orınlıqlar ornatılǵan edi.

7Sharaplar bir-birinen ayrıqsha bolǵan hár túrli altın ıdıslarda berildi. Patshanıń baylıǵına jarasa, onıń sharabı da mol boldı.

8Patshanıń buyrıǵı boyınsha, hesh kim qonaqlardı sharap ishiwge májbúrlemedi. Sebebi patsha saray xızmetshilerine hár bir qonaqtıń tilegin orınlawdı buyırǵan edi.

9Sol waqıtta xanbiyke Washtiy de patsha Axashweroshtıń sarayında hayallar ushın zıyapat berip atırǵan edi.

10Jetinshi kúni sharap iship kewli kóterilgen patsha óziniń Mehuman, Bizta, Xarbona, Bigta, Abagta, Zetar hám Karkas atlı jeti aqtasına

11xanbiyke Washtiyge taj kiydirip, aldına alıp keliwdi buyırdı. Patsha xalıqqa hám beklerge onıń qanshelli gózzal ekenin kórsetpekshi boldı. Sebebi xanbiyke Washtiy júdá sulıw edi.

12Biraq xanbiyke Washtiy aqtalardıń patshadan ákelgen buyrıǵın orınlawdan bas tartıp, keliwdi qálemedi. Patshanıń buǵan qattı ashıwı kelip, ǵázebi qaynap ketti.

13Patsha zamannıń baǵıtın biletuǵın danıshpan adamlar menen sóylesti. Óytkeni ol óz islerin nızam hám qaǵıydalardı biletuǵınlardıń hámmesi menen keńesip isleytuǵın edi.

14Sol waqıtta patshanıń jaqınları bolǵan Karshena, Shetar, Admata, Tarshish, Meres, Marsena hám Memuxan atlı Persiya hám Midiyanıń jeti wáziri bar edi. Patshalıqta joqarı mártebege iye bolǵan usı adamlar patsha menen júzbe-júz kórise alatuǵın edi.

15Patsha olardan: – Meniń aqtalarım arqalı aytqan buyrıǵımdı orınlamaǵanı ushın, nızam boyınsha xanbiyke Washtiyge ne islew kerek? – dep soradı.

16Sonda patsha hám wázirlerdiń aldında Memuxan bılay dep juwap berdi: – Xanbiyke Washtiy tek patshaǵa qarsı emes, al barlıq beklerge hám patshanıń qolı astındaǵı pútkil wálayatlardaǵı xalıqlardıń hámmesine qarsı ayıp isledi.

17Sebebi xanbiykeniń islegen isi tuwralı hámme hayallar esitkende: «Patsha Axashwerosh xanbiyke Washtiydi aldına alıp keliwdi buyırǵanda, xanbiyke barmaptı», – dep aytıp júredi hám kúyewlerin mensinbey qoyadı.

18Búgin xanbiykeniń usı isi tuwralı esitken Persiya hám Midiya aqsúyekleriniń hayalları da óz kúyewlerine sonday qatnasta boladı hám ortadaǵı mensinbewshilikler menen kewil qalıspaqlardıń shegi bolmaydı.

19Eger patshamız maqul kórse: «Washtiy endi patsha Axashweroshtıń aldına kelmesin hám onıń xanbiyke degen abırayı onnan góre jaqsıraǵına berilsin», – degen párman shıǵarsın. Bul párman Persiya hám Midiyanıń hesh qashan ózgertilmeytuǵın nızamlarına qosımsha etip jazıp qoyılsın.

20Patshalıqtıń úlken bolıwına qaramastan, patshanıń bul pármanı pútkil patshalıqtıń hámme jerine jetip barǵanda, bay hám kámbaǵal hayallardıń hámmesi óz kúyewlerin húrmet etetuǵın boladı.

21Bul gáp patshaǵa da, wázirlerge de maqul tústi. Patsha Memuxannıń aytqanınday isledi.

22Ol óz qolı astındaǵı barlıq wálayatlarǵa xat jiberdi. Xat hár bir wálayatqa óz jazıwında hám hár bir xalıqqa óz tilinde jazılǵan bolıp, onda: «Hár bir erkek óz úyiniń xojayını bolsın hám óz ana tilinde sóylesin», – dep jazılǵan edi.

Jump to: Chapter 2 →