Esther 8

Институт перевода Библии, 2022

← Chapter 7 Jump to: Chapter 9 →

1Sol kúni patsha Axashwerosh yahudiylerdiń dushpanı bolǵan Hamannıń mal-múlkin xanbiyke Esterge berdi. Mordoxay patshanıń aldına kirdi, sebebi Ester Mordoxaydıń ózine kim bolatuǵının aytqan edi.

2Sonda patsha Hamannan qaytarıp alǵan mór júzigin barmaǵınan sheship alıp, Mordoxayǵa berdi. Ester de Mordoxaydı Hamannıń mal-múlki ústinen basqarıwshı etip tayınladı.

3Ester jáne patsha menen sóylesti. Ol jılap, patshanıń ayaǵına jıǵıldı hám Agag áwladınan bolǵan Hamannıń yahudiylerge qarsı rejelestirgen jawız niyetin biykar etiwdi sorap jalındı.

4Patsha altın hasasın Esterge qarap sozǵanda, ol ornınan túrgelip, patshanıń aldında turdı.

5Ol patshaǵa: – Eger patshamızdıń maǵan kewli tolǵan bolsa hám maqul kórse, eger patshamız tilegimdi tuwrı dep bilse hám men oǵan unasam, Agag áwladınan bolǵan Hammedata ulı Hamannıń patshalıqtıń barlıq wálayatlarındaǵı yahudiylerdi qırıp taslawdı buyırıp, qara niyet penen jazdırǵan xatların biykarlap, xatlar jazılsın.

6Sebebi men xalqımnıń basına apatshılıq túsiwine qalay qarap tura alaman? Tuwǵan-tuwısqanlarımnıń qırıp taslanıwına qalay qarap tura alaman? – dedi.

7Patsha Axashwerosh hayalı Esterge hám yahudiy Mordoxayǵa bılay dedi: – Minekey, Hamannıń mal-múlkin Esterge berdim. Al Hamandı yahudiylerdi qırıp taslawdı rejelestirgeni ushın darǵa astırdım.

8Biraq patshanıń atınan jazılıp, onıń júzigi menen mórlengen xattı hesh kim ózgerte almaydı. Sonlıqtan endi ózlerińiz yahudiyler ushın neni maqul kórseńiz, patshanıń atınan sonı jazıp, patshanıń júzigi menen mórleńler.

9Sonda úshinshi ay bolǵan siwan ayınıń jigirma úshinshi kúninde patshanıń xatkerleri shaqırıldı. Mordoxaydıń buyırǵan hár bir nársesi Hindistannan baslap Xabashstanǵa shekemgi bir júz jigirma jeti wálayatta jasaytuǵın yahudiylerge, nayıplarǵa, hákimlerge hám wálayat basshılarına: hár bir wálayatqa óz jazıwında hám hár bir xalıqqa óz tilinde, yahudiylerge de óz jazıwı menen óz tilinde jazıldı.

10Mordoxay patsha Axashweroshtıń atınan jazdırǵan xatların patshanıń júzigi menen mórledi hám patshanıń xızmetinde qollanıw ushın baǵılıp atırǵan shapqır atlarǵa shabarmanlardı mingizdi de, olarǵa xatlardı berip, jolǵa atlandırdı.

11Patshanıń pármanında barlıq qalalardaǵı yahudiylerge bir jerge jıynalıp, ózlerin qorǵawǵa huqıq berilgen edi. Jáne de, ózlerine hújim qılatuǵın barlıq dushpan xalıqlardıń yamasa wálayattıń qurallı kúshlerin, balaların hám hayalların óltirip joq qılıwǵa, qırıp taslawǵa, mal-múlkin talan-taraj qılıwǵa ruxsat berilgen edi.

12Bul is patsha Axashweroshtıń hámme wálayatlarında belgilengen kúni, on ekinshi aydıń, yaǵnıy adar ayınıń on úshinshi kúni isleniwi kerek edi.

13Usı pármannıń kóshirmesi hámme wálayatlarǵa nızam retinde járiyalanıp, barlıq xalıqlarǵa bildirildi. Solay etip, yahudiyler sol kúni dushpanlarınan ósh alıw ushın tayar turıwı tiyis edi.

14Shabarmanlar patshanıń shapqır atlarına minip, onıń buyrıǵı menen asıǵıs jolǵa atlandı. Bul párman Suza qalasında da járiyalandı.

15Mordoxay ústine qızǵısh kók hám aq reńdegi patshalıq kiyimlerdi, basına úlken altın taj kiyip, sırtınan shım qızıl hasıl zıǵır shapan jamılıp, patshanıń aldınan shıqtı. Suza qalası quwanısh hám shadlıqqa bólendi.

16Yahudiyler ushın jaqtı, quwanıshlı, shadlı hám húrmetke tolı kúnler kelgen edi.

17Patshanıń buyrıǵı hám pármanı jetip barǵan hár bir wálayat hám qalada yahudiyler quwanıshqa tolıp, shadlandı. Olar zıyapatlar uyımlastırdı hám bayramladı. Patshalıqtaǵı xalıqlardan kóplegen adamlar yahudiy boldı. Sebebi olardı yahudiylerden qorqıw tuyǵısı biylep alǵan edi.

← Chapter 7 Jump to: Chapter 9 →