Esther 5

Институт перевода Библии, 2022

← Chapter 4 Jump to: Chapter 6 →

1Úshinshi kúni Ester patshalıq kiyimlerin kiyip, saraydıń ishki háwlisine, patshanıń taxtı turǵan bólmeniń aldına kelip turdı. Sol waqıtta patsha háwliniń kirer awzına tuwrı qarap turǵan óz taxtında otırǵan edi.

2Patsha háwlide turǵan xanbiyke Esterdi kórgende, oǵan miyrimi tústi hám qolındaǵı altın hasanı Esterge qaray sozdı. Ester patshaǵa jaqınlap kelip, altın hasanıń ushına qolın tiygizdi.

3Patsha oǵan: – Xanbiyke Ester, ne qáleyseń? Qanday tilegiń bar? Hátte, patshalıqtıń yarımın sorasań da, beriledi, – dedi.

4Ester oǵan: – Eger patshamız maqul kórse, búgin meniń ol ushın tayarlaǵan zıyapatıma Haman menen birge kelsin, – dedi.

5Patsha: – Esterdiń ótinishin orınlaw ushın tez barıp, Hamandı tawıp kelińler, – dep buyırdı. Solay etip, patsha hám Haman Ester tayarlaǵan zıyapatqa keldi.

6Patsha sharap iship otırıp Esterge jáne: – Ayt, qanday tilegiń bar? Tilegiń orınlanadı. Qanday ótinishiń bar? Patshalıqtıń yarımın sorasań da beriledi, – dedi.

7Ester juwap berip: – Meniń tilegim hám ótinishim mınaday:

8eger patshamızdıń maǵan kewli tolǵan bolsa, patshamız meniń tilegimdi orınlap, ótinishimdi qanaatlandırıwdı maqul kórse, erteń meniń olar ushın tayarlaytuǵın zıyapatıma Haman menen birge kelsin. Sonda patshamızdıń sorawına juwap beremen, – dedi.

9Sol kúni Haman zıyapattan kewli kóterilip, shad bolıp qayttı. Biraq ol patsha sarayında Mordoxaydı kórgende, Mordoxay ornınan da turmadı, oǵan húrmet te kórsetpedi. Sonda Haman ashıwdan tútep ketti.

10Degen menen, ol ózin tutıp, úyine ketti. Ol úyine kelip, dosların hám hayalı Zereshti shaqırttı.

11Olarǵa óziniń sheksiz baylıǵı, ullarınıń kópligi, patshanıń ózin qanshelli húrmet etetuǵınlıǵı hám barlıq wázirler menen xızmetshilerden ústin qoyǵanı haqqında aytıp berdi.

12Keyin Haman sózin dawam etip: – Xanbiyke Ester zıyapat tayarlap, patsha menen tek meni ǵana mirát etti. Erteń de men patsha menen birge shaqırılǵanman.

13Biraq sarayda yahudiy Mordoxaydı kórgenimde, bulardıń hámmesi men ushın shıbın shelli kórinbeydi, – dedi.

14Sonda hayalı Zeresh hám barlıq dosları Hamanǵa bılay dedi: – Biyikligi eliw shıǵanaq bolǵan dar qurdır. Azanda patshadan Mordoxaydı sol darǵa asıwdı soran. Sońınan shad bolıp, patsha menen zıyapatqa bar. Bul keńes Hamanǵa unadı hám ol dar qurdırıp qoydı.

← Chapter 4 Jump to: Chapter 6 →