John 14

Институт перевода Библии, 2022

← Chapter 13 Jump to: Chapter 15 →

1Iysa shákirtlerine bılay dedi: – Júreklerińiz ǵam shekpesin. Qudayǵa isenińler, Maǵan da isenińler.

2Ákemniń úyinde orın kóp. Eger olay bolmaǵanda, sizlerge aytpas edim. Óytkeni Men sizler ushın orın tayarlawǵa ketip baratırman.

3Men barıp, sizler ushın orın tayarlaǵanımnan soń, sizler de Men bolatuǵın jerde bolıwıńız ushın, jáne kelip, sizlerdi Óz janıma alıp ketemen.

4Men baratuǵın jerge aparatuǵın joldı sizler bilesizler.

5Tomas Iysaǵa: – Iyem, Seniń qayaqqa baratuǵınıńdı bilmeymiz-ǵo. Joldı qalay bile alamız? – dedi.

6Iysa oǵan bılay dedi: – Men jol, haqıyqat hám ómirmen. Men arqalı bolmasa, hesh kim Ákege bara almaydı.

7Eger Meni bilseńler, Ákemdi de bilesizler. Awa, Onı bilesizler, sebebi Onı kórdińler.

8Filip Iysaǵa: – Iyem, bizlerge Ákeni kórset, bizlerge sonıń ózi jetkilikli, – dedi.

9Iysa oǵan bılay dedi: – Filip, Men sonsha waqıttan beri sizler menen birge bolsam da, Meni ele bilmeyseń be? Meni kórgen Ákeni kórgen boladı. Sen ne ushın: «Bizlerge Ákeni kórset», – dep aytıp atırsań?

10Meniń Ákede, Ákeniń Mende ekenine isenbeyseń be? Sizlerge aytqan sózlerimdi Ózligimnen aytıp turǵan joqpan, al Mende jasap atırǵan Áke Óz islerin islep atır.

11Meniń Ákede, Ákeniń Mende ekenine isenińler. Hesh bolmasa, islegen islerim arqalı Maǵan isenińler.

12Sizlerge shının, haqıyqatın aytaman: Maǵan isengen adamnıń ózi de Men islegen islerdi isleydi, hátte, olardan da úlkenirek islerdi isleydi. Sebebi Men Ákeme baratırman.

13Áke Ulı arqalı ullılanıwı ushın, Meniń atım menen ne sorasańlar da, hámmesin orınlayman.

14Meniń atım menen bir nárse sorasańlar, Men onı orınlayman.

15– Eger Meni súyseńler, Meniń buyrıqlarımdı orınlaysızlar.

16Men Ákemnen sorayman hám Ol sizler menen máńgi birge bolıwı ushın basqa Jaqlawshını jiberedi.

17Ol – Haqıyqat Ruwxı. Dúnya Onı qabıl ete almaydı. Óytkeni Onı kórmeydi de, tanımaydı da. Biraq sizler Onı bilesizler. Sebebi Ol sizler menen birge jasaydı, Ol ishińizde boladı.

18Sizlerdi jetim qılıp qaldırmayman, sizlerge qaytıp kelemen.

19Birazdan keyin, dúnya Meni qaytıp kórmeydi. Biraq sizler Meni kóresizler. Óytkeni Men qayta tirilemen, sizler de qayta tirilesizler.

20Sol kúni sizler Meniń Ákemde, sizlerdiń Mende hám Meniń sizlerde ekenimdi bilesizler.

21Meniń buyrıqlarımdı bilip, olardı orınlaǵan adam – Meni súyetuǵın adam. Meni súygen adamdı Ákem de súyedi. Men de onı súyip, oǵan Ózimdi kórsetemen.

22Isqariotlı emes basqa Yahuda Iysaǵa: – Iyem, bul qalay bolǵanı, Ózińdi dúnyaǵa emes, bizlerge kórsetejaqsań ba? – dedi.

23Iysa oǵan bılay dep juwap berdi: – Kim de kim Meni súyse, Meniń sózimdi orınlaydı. Ákem de onı súyedi. Bizler oǵan kelip, onıń menen birge jasaymız.

24Meni súymegen adam sózlerimdi orınlamaydı. Sizler esitip atırǵan sózler Meniki emes, al Meni jibergen Ákemdiki.

25Men ele sizler menen birge bolǵan waqtımda sizlerge bulardı ayttım.

26Ákemniń Meniń atımnan jiberetuǵın Jaqlawshısı, Muxaddes Ruwx sizlerge hámmesin úyretedi. Ol Meniń sizlerge aytqanlarımnıń hámmesin eslerińizge túsiredi.

27Men sizlerge tınıshlıq qaldıraman. Óz tınıshlıǵımdı sizlerge beremen. Men beretuǵın tınıshlıq dúnya beretuǵın tınıshlıqqa uqsamaydı. Júreklerińiz ǵam shekpesin, qorqpańlar.

28Sizler Meniń: «Sizlerden ketemen hám jáne sizlerge qaytıp kelemen», – degenimdi esittińler. Eger sizler Meni súygenińizde: «Ákemniń janına baratırman», – degenime quwanar edińler. Sebebi Ákem Mennen ullı.

29Bular júz bergende iseniwińiz ushın, ele júz bermesten burın, sizlerge házirden ayttım.

30Sizler menen endi kóp sóylespeymen. Óytkeni bul dúnyanıń hákimi kiyatır. Onıń Meniń ústimnen hesh qanday biyligi joq.

31Biraq bul dúnya Meniń Ákemdi súyetuǵınımdı hám Onıń Maǵan buyırǵanlarınıń hámmesin orınlaytuǵınımdı biliwi tiyis. Qáne turıńlar, bul jerden keteyik.

← Chapter 13 Jump to: Chapter 15 →