Jonah 1

Институт перевода Библии, 2022

Jump to: Chapter 2 →

1Jaratqan Iyeden Amittay ulı Yunusqa mınaday sóz tústi:

2– Qánekey, ullı Nineviya qalasına bar da, xalqına waz ayt. Sebebi olardıń jawızlıqları Maǵan jetip keldi.

3Biraq Yunus Jaratqan Iyeden Tarshishke qashpaqshı boldı. Ol Yafo qalasına kelip, Tarshishke baratuǵın bir kemeni taptı. Jol haqısın tólep, kemege otırdı da, Jaratqan Iyeniń názerinen qashıw ushın, Tarshishke qaray jolǵa shıqtı.

4Sonda Jaratqan Iye teńizge kúshli samal jiberdi. Teńizde qáhárli dawıl kóterilip, keme shıl-párshe bolıp sınıp keteyin dep qaldı.

5Kemeshilerdi qorqınısh biylep, hár biri óz qudayına dawıslap jalbarına basladı hám kemeni jeńilletiw ushın júklerdi teńizge tasladı. Yunus bolsa, kemeniń tómengi qabatına túsip jatıp, tereń uyqıǵa ketken edi.

6Keme basshısı Yunustıń janına barıp: – Háy! Sen qalay uyıqlap atırsań? Tur, óz qudayıńa jalbarın. Múmkin, ol bizlerdi esine alar hám bizler aman qalarmız, – dedi.

7Sońınan kemeshiler bir-birine: – Kelińler, shek taslayıq hám bul apat basımızǵa kim sebepli túskenin bileyik, – dedi. Olar shek tasladı hám shek Yunusqa tústi.

8Olar Yunustan: – Bizlerge ayt, bul apat bizlerdiń basımızǵa sen sebepli túsken joq pa? Kásip-káriń ne, qayaqtan kiyatırsań? Óziń qay jerliseń hám qaysı milletke tiyisliseń? – dep soradı.

9Yunus: – Men evreymen, teńizdi hám jerdi jaratqan aspannıń Qudayı Jaratqan Iyege sıyınaman, – dep juwap berdi.

10Kemeshilerdi qattı qorqınısh biylep, olar Yunustan: – Nege bulay islediń? – dep soradı. Olar Yunustıń Jaratqan Iyeden qashıp kiyatırǵanın biletuǵın edi. Óytkeni Yunus olarǵa bunı aytıp bergen edi.

11Teńiz qutırıwın kem-kemnen kúsheyte berdi. Olar Yunustan: – Teńizdiń tınıshlanıwı ushın bizler saǵan ne islewimiz kerek? – dep soradı.

12Ol: – Meni kóterip, teńizge ılaqtırıń, sonda ol tınıshlanadı. Sebebi bul kúshli dawılǵa men sebepli duwshar bolǵanıńızdı bilemen, – dep juwap berdi.

13Kemeshiler qurǵaqlıqqa jetiw ushın bar kúshlerin salıp eskek esse de, biraq jete almadı. Óytkeni teńiz olarǵa qarsı qutırıwın kem-kemnen kúsheyte berdi.

14Sonda olar Jaratqan Iyege dawıslap bılay dedi: «O, Jaratqan Iye! Saǵan jalbarınamız, usı adamnıń janı sebepli bizler nabıt bolmayıq. Eger ol ayıpsız bolsa, onıń qanı ushın bizlerdi juwapker qılma. Sebebi Sen, Jaratqan Iye, Ózińe maqul bolǵan isti islediń».

15Sońınan olar Yunustı teńizge ılaqtırıp jiberdi. Sonda qutırıp turǵan teńiz tınıshlandı.

16Bul waqıya sebepli kemeshiler Jaratqan Iyeden qattı qorqıp qaldı hám Oǵan arnap qurbanlıq shalıp, wádeler berdi.

Jump to: Chapter 2 →