Jonah 4

Институт перевода Библии, 2022

← Chapter 3 Jump to:

1Sonda Yunus buǵan qattı renjip, ashıwlandı.

2Ol Jaratqan Iyege bılay dep duwa etti: – O, Jaratqan Iye! Usınday bolatuǵının óz elimde bolǵan waqtımda-aq aytpaǵan ba edim? Sonlıqtan da men Tarshishke qashqan edim. Sebebi Seniń miyrimli, rehimli, sabır-taqatlı, súyispenshiligi ullı hám jazalawdan waz keshetuǵın Quday ekenińdi biletuǵın edim.

3Endi ótinemen, Jaratqan Iye, meniń janımdı al. Sebebi tiri júrgenimnen góre, ólgenim jaqsıraq.

4Jaratqan Iye oǵan: – Seniń ashıwlanıwǵa haqıń bar ma? – dedi.

5Yunus qaladan shıǵıp, onıń shıǵıs tárepindegi bir jerge barıp otırdı. Ol ózine shertek soǵıp alıp, onıń sayasında otırdı hám qalaǵa ne bolatuǵının kóriw ushın kúte basladı.

6Sonda Quday Iye Yunustıń basına sayasın túsirip, qayǵısın jeńilletsin dep, bir ósimlik ósirip shıǵardı. Yunus bul ósimlikke qattı quwandı.

7Biraq kelesi kúni tań atqanda, Quday bir qurttı jiberdi hám ol ósimlikti kemirip, quwratıp tasladı.

8Quyash shıqqanda, Quday shıǵıstıń qapırıq samalın estirdi. Quyash Yunustıń basın qattı qızdırǵanlıqtan, ol hálsizlene basladı hám ózine ólim tilep: «Tiri júrgenimnen góre, ólgenim jaqsıraq», – dedi.

9Biraq Quday oǵan: – Ósimlik ushın ashıwlanıwǵa haqıń bar ma? – dedi. Yunus: – Álbette, hátteki, ólgenshe ashıwlanıwǵa haqım bar, – dedi.

10Sonda Jaratqan Iye oǵan bılay dedi: – Bul ósimlik bir túnde shıǵıp, bir túnde joq boldı. Sen miynet etip, bul ósimlikti ósirmegen bolsań da, oǵan janıń ashıp atır.

11Al Nineviyada bolsa, aq penen qaranı ayıra almaytuǵın bir júz jigirma mıńnan aslam adam hám kóp sanlı haywanlar bar. Usı ullı qala ushın Meniń janım qalay ashımasın?

← Chapter 3 Jump to: