Jonah 3

Институт перевода Библии, 2022

← Chapter 2 Jump to: Chapter 4 →

1Jaratqan Iyeden Yunusqa ekinshi márte mınaday sóz tústi:

2Qánekey, ullı Nineviya qalasına bar da, saǵan aytatuǵınlarımdı xalıqqa járiyala.

3Yunus Jaratqan Iyeniń sózine boysınıp, Nineviyaǵa ketti. Nineviya sonday úlken qala bolıp, onı basıp ótiw ushın úsh kúnlik jol júriw kerek edi.

4Solay etip, Yunus qalaǵa kirip, bir kúnlik joldı basıp ótkennen soń: «Qırıq kúnnen keyin Nineviya qıyratıladı», – dep jar saldı.

5Sonda Nineviya xalqı Qudayǵa isendi hám olar oraza tutıwdı járiyalap, ullısınan kishisine deyin aza kiyimin kiydi.

6Bul xabar Nineviya patshasına jetip barǵanda, ol taxtınan túsip, ústindegi patshalıq kiyimlerin sheshti hám aza kiyimin kiyip, kúlge otırdı.

7Sońınan ol Nineviyada óziniń hám aqsúyekleriniń atınan mına buyrıqtı járiyalattı: «Hesh bir adam da, haywan da, iri mal da, mayda mal da hesh nárse jemesin, jaylawǵa barmasın hám suw ishpesin.

8Adamlar da, haywanlar da aza kiyiminde bolsın. Hár bir adam Qudayǵa bar kúshi menen jalbarınıp, ózleriniń jaman jollarınan hám jawızlıq islewden waz keshsin.

9Kim biledi, múmkin, sonda Quday pikirin ózgerter, lawlaǵan ǵázebinen qaytar hám bizler nabıt bolmaspız».

10Sonda Quday nineviyalılardıń qılǵan islerin hám olardıń jaman joldan qaytqanın kórdi. Sonlıqtan olarǵa janı ashıp, jiberemen degen apattı jibermedi.

← Chapter 2 Jump to: Chapter 4 →