Jonah 2

Институт перевода Библии, 2022

← Chapter 1 Jump to: Chapter 3 →

1Sol waqıtta Jaratqan Iye Yunustı jutıwı ushın úlken bir balıqtı jiberdi. Yunus úsh kún, úsh tún usı balıqtıń ishinde boldı.

2Yunus balıqtıń ishinde óziniń Qudayı Jaratqan Iyege bılay dep duwa etti:

3«Awır jaǵdayǵa túskenimde, Seni shaqırdım Jaratqan Iye! Juwap berdiń Sen maǵan. Óliler mákanınıń túpkirinen, Járdem sorap baqırdım, Esittiń Sen dawısımdı meniń.

4Tereńlikke, teńiz túbine ılaqtırdıń meni, Qorshadı suw aǵısları átirapımdı. Pútkil suwlarıń da, qutırǵan tolqınlarıń da, Basıp ótti ústimnen meniń.

5Sonda men bılay dedim: „Quwılǵanman Seniń aldıńnan, Biraq kóremen jáne muxaddes Ibadatxanańdı“.

6Suwlar meni tunshıqtırdı, Qorshap aldı túpsizlik te, Basıma shırmaldı teńiz shópleri.

7Tústim tawlar túbine, Qamaldım qapıları máńgige ilingen jerge. Biraq Sen, Qudayım, Jaratqan Iye, Shuqırdan qutqardıń janımdı meniń.

8Janım alqımıma taqalǵanda, Eske aldım Jaratqan Iyeni, Meniń duwam Saǵan, Jetip bardı muxaddes Ibadatxanańa.

9Jaramsız butlarǵa tabınıwshılar, Opasızlıq etken bolar.

10Biraq alǵıs-maqtaw aytıp men, Saǵan qurbanlıq shalaman. Ózimniń bergen wádemdi orınlayman, Qutqarılıw keledi Jaratqan Iyeden!»

11Jaratqan Iye balıqqa buyrıq berdi hám ol Yunustı qurǵaqlıqqa qusıp shıǵarıp jiberdi.

← Chapter 1 Jump to: Chapter 3 →