2 Timothy 1

Kamba (Mbivilia) 1956

Jump to: Chapter 2 →

1Vaulo, mũtũmwa wa Klĩsto Yesũ kwondũ wa kwenda kwa Ngai, kwĩanana na watho wa thayũ ũla wĩ nthĩnĩ wa Klĩsto Yesũ,

2valũa ũũ wakwa ũmũvikĩe Timotheo, mwana wakwa mwendwa: Mumo, na tei, na mũuo, kuma kwa Ngai Asa na Klĩsto Yesũ Mwĩaĩi waitũ.

3Nĩmũtũngĩa Ngai mũvea, ũla nĩmũthũkũmaa na wasya wa ngoo mũtheu o ta aaũmae makwa, ũndũ ngũlilikanaa vate kũeka mboyanĩ syakwa, ũtukũ na mũthenya;

4ngĩlilikana methoi maku, nĩ na mea ma ũkwona, nĩ kana ũtanu wakwa wusũe;

5nũndũ nĩlilikanĩte mũĩkĩĩo ũte na wangangan’yo ũla wĩ naw’o; ũla tene waĩ na ũsũe waku Loisi, na waĩ na mwenyu Eunike; na nĩnĩtĩkĩlĩte vyũ, kana naku wĩ naw’o.

6Kwondũ wa ũu nĩngũũlilikan’ya wakan’ye ũla mũthĩnzĩo wa Ngai wĩ naw’o kwondũ wa kwilĩĩlwa moko makwa.

7Nũndũ Ngai ndaatũnenga veva wa w’ĩa; ĩndĩ atũnengie veva wa vinya na wa wendo na wa kĩlĩko kĩanĩu.

8Kwondũ wa ũu ndũkawĩw’ĩe nthoni ũkũsĩ wa Mwĩaĩi waitũ, o na ndũkambĩw’ĩe nthonĩ nyie mwovwa wake; ĩndĩ ũmĩĩasya maũndũ maito vamwe na ũvoo mũseo kwĩanana na vinya wa Ngai;

9ũla watũtangĩĩe, na kũtwĩta na wĩtano mũtheu, ti kwĩanana na meko maitũ tondũ mailyĩ, ĩndĩ kwĩanana na kwenda kwake mwene na mumo ũla twanengiwe nthĩnĩ wa Klĩsto Yesũ mbee wa mavinda ma tene tene,

10ĩndĩ yu nĩwonanĩtw’e kwondũ wa kumĩla kwa Mũtangĩĩi waitũ Klĩsto Yesũ, ũla wanangie kĩkw’ũ, na kumĩlya thayũ na kũveta wanangĩko kwondũ wa ũvoo mũseo,

11naw’o kwondũ waw’o nyie naiiwe mũtavan’ya, na mũtũmwa, na mũmanyĩsya.

12Kwondũ wa ũu nĩngũthĩnw’a nĩ maũndũ aa nao: ĩndĩ ndiũsonoka; nũndũ nĩnĩmwĩsĩ we ũla nĩtĩkĩlĩte, na ĩngĩ nĩnĩsĩ vyũ kana we nũtonya kũsũvĩaa kĩla niĩte kwake kũvika mũthenya ũsu.

13Kwata kĩeleelo kya ndeto ila syaĩle ila weewie kwakwa, na mũĩkĩĩo na wendo ũla wĩ nthĩnĩ wa Klĩsto Yesũ.

14Ũndũ ũsu mũseo ũla wiĩtwe kwaku ũsũvĩe kwa nzĩa ya Veva Mũtheu ũla ũtwĩe nthĩnĩ waitũ.

15Nĩwĩsĩ ũũ, kana onthe ala me Asia nĩmaalũkile na mandia; na amwe mao nĩ Vikelo na Elimakane.

16Mwĩaĩi namew’ĩe tei ala ma nyũmba ya Onesivolo: nũndũ nĩwambuũkisye kaingĩ, na ndaawĩw’ĩa nthoni ũla mũnyololo wakwa;

17ĩndĩ, yĩla waĩ Lomi, amanthie na ũthangaau, na ambona

18(Mwĩaĩi namũnenge kwona tei wa Mwĩaĩi mũthenya ũsu); we nĩwĩsĩ nesa nĩ maũndũ meana ata wanthũkũmie namo Eveso.

Jump to: Chapter 2 →