2 Timothy 4

Kamba (Mbivilia) 1956

← Chapter 3 Jump to:

1Nĩkwĩaĩa mbee wa Ngai, na mbee wa Klĩsto Yesũ, ũla ũkasilĩla ala me thayũ na ala akw’ũ, o na ĩngĩ ũndũ wa kumĩla kwake na ũsumbĩ wake:

2tavan’ya ĩla ndeto; ĩthĩwa wĩ mũthangaau ĩvinda yaĩle, na yĩla yĩtaĩle; onan’ya mavĩtyo, kan’ya, taa, na wũmĩĩsyo w’onthe na kũmanyĩsya.

3Nũndũ ĩvinda yĩkooka yĩla mataketĩkĩla kũtavw’a momanyisyo ma w’o; ĩndĩ, nĩkwĩthĩwa me na matũ meũmanyeea, makeeyũmbanĩsya amanyĩsya o kwĩanana na mĩmeo yoo;

4nao makathyũũa matũ moo maikew’e ũla w’o, na kwathũka kwĩthukĩĩsya mbano.

5Ĩndĩ ĩthĩwa wĩ na kĩlĩko maũndũnĩ onthe, ũmĩĩsya maũndũ maito, tethya wĩa wa mũtavan’ya wa ũvoo mũseo ĩanĩsya ũthũkũmi waku.

6Nũndũ o na yu nĩngũtulũlwa ta nthembo, na ĩvinda yakwa ya kũthi nĩ ĩviku.

7Nĩnũkitĩte kaũ ũla mũseo, nĩnĩminĩte mũendo, nĩnĩsũvĩĩte ũla mũĩkĩĩo:

8kuma yu nĩniĩwe ngovia ya ũsumbĩ ya ũlũngalu, nayo Mwĩaĩi, mũsili ũla mũlũngalu, akanenga mũthenya ũsu; na ti nyie nyioka, ĩndĩ andũ onthe nao ala mendaa kumĩlw’a kwake.

9Thangaaa kũka kwakwa na mĩtũkĩ:

10nũndũ Ndema nĩwandiie, endie nthĩ ĩno ya ĩvinda yĩĩ, na anaendie Thesalonika; na Keliseke anaendie Kalatia, na Tito anaendie Ndalamatia.

11No Luka e weka nĩ nake. Mwose Maliko wũke nake kũũ; nũndũ nĩ na vata nake wianĩ wa ũthũkũmi.

12Ĩndĩ Tikiko nĩnamũtũmie Eveso.

13Ngũa ya ĩũlũ ĩla natiie na Kalivo nthĩ ya Teloa, wĩete ũyũka, vamwe na ala mavuku, na mũno mbee ũka na ala ma mbũa.

14Alesanda ũla mũtwii wa ũthuku nĩwambĩkie ũthũku mwingĩ: Mwĩaĩi akamũĩva kwĩanana na mawĩa make:

15naku mwĩsũvĩe mũno; nũndũ nĩwasiĩĩe mũno ndeto sitũ.

16Ũsũngĩo wakwa wa mbee vai mũndũ waũngamie vamwe nakwa, ĩndĩ onthe nĩmandiie; maikaatalĩlwe ũndũ ũsu.

17Ĩndĩ Mwĩaĩi nĩwaũngamie vamwe nakwa, na anenga vinya; nĩ kana kwondũ wakwa ũla ũtũmane ũtonye kũtavanw’a vyũ, na nĩ kana Andũ‐ma‐mbaĩ‐ingi onthe mew’e: nakwa natangĩĩwe kumw’a kanyw’anĩ wa ũla mũnyambũ.

18Mwĩaĩi akandangĩĩa kĩla ũndũ ũthũku, na akanzũvĩa kũvika ũsumbĩ wake wa ĩtunĩ: ndaĩa nĩyĩthĩwe yake kũvika tene na tene. Ameni.

19Ngethesya Vilisika na Akwila, na nyũmba ya Onesivolo.

20Elasito ekalile Kolintho: ĩndĩ Telovimo namũtiie Mileto e mũwau.

21Thangaa kũka ĩvinda ya mbevo yĩtanavika. Euvulo nĩwaũkethya, na Vuteni, na Leno, na Kilautia, na ana‐a‐asa onthe.

22Mwĩaĩi nĩethĩwe vamwe na veva waku. Mumo nĩwĩthĩwe nenyu.

← Chapter 3 Jump to: