2 Timothy 2

Kamba (Mbivilia) 1956

← Chapter 1 Jump to: Chapter 3 →

1We ĩndĩ, mwana wakwa, ĩthĩwa ũkyongeleelwa vinya mumonĩ ũla wĩ nthĩnĩ wa Klĩsto Yesũ.

2Na maũndũ ala weewie kwakwa na ngũsĩ nyingĩ, asu maie kwa andũ me na kĩthito, ala makatonya kũmanyĩsya angĩ nao.

3Ũmĩĩsya maũndũ maito vamwe nakwa, ta mũsikalĩ mũseo wa Klĩsto Yesũ.

4Vai mũsikalĩ e kaũnĩ ũvĩndanĩw’a na maũndũ ma thayũ ũũ; nĩ kana amwendeesye ũla wamũandĩkie ethĩwe mũsikalĩ.

5Na ĩngĩ ethĩwa mũndũ etata mathaũnĩ, ndanengawe ngovĩa, ate o akakĩlan’ya ũndũ weeaiwe.

6Nĩkwaĩle mũĩmi ũla watethisye wĩa ethĩwe wa mbee kwosa mosyao.

7Sũanĩa ũndũ ũla ngwasya; nũndũ Mwĩaĩi akakũnenga ũmanyi maũndũnĩ onthe.

8Mũlilikane Yesũ Klĩsto, ũla wathayũũkie kuma akw’ũnĩ, ũla waĩ wa ũsyao wa Ndaviti, kwĩanana na ũvoo mũseo wakwa:

9ũla kwondũ waw’o nĩthĩnaw’a kũvika kwovwa, ta mwĩki wa naĩ; ĩndĩ ndeto ya Ngai ndyovawa.

10Kwondũ wa ũu nũmĩĩasya maũndũ onthe nũndũ wa ala anyuve, nĩ kana nao mose ũtangĩĩo ũla wĩ nthĩnĩ wa Klĩsto Yesũ vamwe na ũtaĩo wa tene na tene.

11Nĩ ndeto ya kũĩkĩĩwa: Nũndũ ethĩwa twakwie vamwe nake, tũkeethĩwa thayũ naw’o vamwe nake;

12Ethĩwa nĩtũkũmĩĩsya, tũkasumbĩka vamwe nake: Ethĩwa tũkamũkaĩa we, nake akatũkaĩa ithyĩ:

13Ethĩwa tũti na kĩthito, we ekalaa na kĩthito; nũndũ ndatonya kwĩkaĩa mwene.

14Malilikan’ye maũndũ asu, ũkĩmeaĩa mbee wa Mwĩaĩi, maikethĩwe na ngananĩo sya ndeto, ila ite na kĩndũ imoneaa, na imaasya ala mew’aa.

15Thangaa kwĩnengane mwene wĩtĩkĩlĩlwe nĩ Ngai, mũtethya wa wĩa ũtasonokw’a, ũivathũkan’ya ũndũ waĩle ndeto ya ũla w’o.

16Ĩndĩ ĩvathane na ndeto sya mana: nũndũ ikaendeea na mbee ũndũnĩ wa kũlea kũmũkĩa Ngai,

17na ndeto yoo ĩkeethĩwa ĩkĩya ta kĩtau kya yaso: asu amwe nĩ Aimenaio na Vileto;

18andũ ala mavĩtĩtye ũla w’o, makyasya kana ũthayũũkyo nĩ mũvĩtu o na yu, na maing’uthũla mũĩkĩĩo wa amwe.

19Ĩndĩ wambĩlĩlyo mũlũmu wa Ngai nũũngeme, wĩ na ũsiĩlo ũũ, Mwĩaĩi nũmesĩ ala make: na, Kĩla mũndũ ũwetaa syĩtwa ya Mwĩaĩi natie ũndũ ũte ũlũngalu.

20Na nyũmbanĩ nene vaiĩthĩawa mĩio ya thaavu na vetha yoka, ĩndĩ o na ya mĩtĩ na ya yũmba; na ĩmwe yĩ na ndaĩa na ĩngĩ ĩte na ndaĩa.

21Ethĩwa ĩndĩ mũndũ etheasya kwa asu, akeethĩwa e mũio wa kwona ndaĩa, ũvathĩtwe ethĩwe mũtheu, waĩle wĩa wa Mwĩaĩi, ũseũvĩtw’e kwa kĩla wĩa mũseo.

22Ĩndĩ kĩa mĩmeo ya wana, na ũkĩatĩĩa ũlũngalu, na mũĩkũo, na wendo, na mũuo, vamwe na ala mamwĩkaĩlaa Mwĩaĩi na ngoo ntheu.

23Ĩndĩ lea mokũlyo ma ũtumanu na ala mate na ũmanyi, ũkĩmanya kana maetae ngandanĩo.

24Na ngombo ya Mwĩaĩi ndyaĩlwe nĩ ũkandanĩa, ĩndĩ nĩyaĩle kwĩthĩwa ĩ nduu kwa andũ onthe, ĩ na ũtonyi wa kũmanyĩsya, ĩ na wũmĩĩsyo:

25ĩkĩmataa na ũuu ala akananĩi; no kwĩthĩwa Ngai emanenga ũalyũlo wa ngoo kũvika ũmanyi wa ũla w’o,

26matonye ũvindũka na kuma mũkwanĩ wa ndevili matavĩtwe nĩ mũthũkũmi wa Mwĩaĩi, kũvika kwĩka kwenda kwa Ngai.

← Chapter 1 Jump to: Chapter 3 →