2 Timothy 3

Kamba (Mbivilia) 1956

← Chapter 2 Jump to: Chapter 4 →

1Ĩndĩ manya ũũ, kana mĩthenyanĩ ya mũminũkĩlyo kũkeethĩwa mavinda ma mũisyo.

2Nũndũ andũ makeethĩwa makĩyenda ene, makyenda mbesa, makĩkathĩĩa, na kwĩtaĩa, na kũumana, matew’aa asyai, mate mũvea, mate atheu,

3mate na wendo waĩle, mate na wĩw’ano, ailĩanĩli, mate na wĩting’o, ai, matendete ũseo,

4akaĩi, me na ngũlũ, me na mĩyimbyo, endi ma motanu ma nthĩ mbee wa kũmwenda Ngai;

5me na mũvw’ano wa kĩkĩo kwa Ngai, ĩndĩ nĩmakaĩĩte vinya wakyo: ĩvathane na asu nao.

6Nũndũ andũnĩ asu ve ala melikasya nyũmbanĩ sya andũ na kũtava aka atumanu ala makuaa mũio ya naĩ, matongoew’e nĩ mĩmeo ya mĩthemba mingĩ,

7memanyĩasya mĩthenya yonthe, na maitonya o na ĩndĩĩ kũvikĩa ũmanyi wa ũla w’o.

8Na o tondũ Yane na Yambale mamũsiĩĩe Mose, no ta ũu aa nao nĩmasiĩĩaa ũla w’o; andũ mavukĩtwe ilĩkoni syoo, matetĩkĩlĩka mũĩkĩĩoni.

9Ĩndĩ maikaendeea na mbee: nũndũ ũtumanu woo ũkeethĩwa wenekee kwa andũ onthe, o tondũ wa asu woonekie.

10Ĩndĩ we nĩwavikĩlile ũmanyĩsyo wakwa, na mũendele, na kwenda kwakwa, na mũĩkĩĩo, na wũmĩĩsyo, na wendo, na wĩlũlũmĩlyo,

11na monyamao, na mathĩna; na maũndũ ala mangwatĩe Andiokia, na Ikonio, na Lisitela; monyamao ala neeyũmĩĩsye: na Mwĩaĩi andangĩĩa na kũnumya maũndũnĩ asu onthe.

12Ĩĩ, na onthe ala mendaa kwĩkalya thayũ woo kũmũkĩa Ngai nthĩnĩ wa Klĩsto Yesũ makathĩnw’a.

13Ĩndĩ andũ athe na akengani makaendeea na kwongeleka kũthũka, makĩkengana na kũkengwa.

14Ĩndĩ we, ĩkala maũndũnĩ ala wamanyĩiw’e na ala wamanyie vyũ, nĩkwĩthĩwa nĩwĩsĩ andũ ala weemanyĩisye kwamo;

15na ĩngĩ kuma wĩ kana kanini nĩweesĩ maandĩko matheu, ala matonya ũkũĩvya kũvika ũtangĩĩo ũla wĩ kwondũ wa mũĩkĩĩo wĩ nthĩnĩ wa Klĩsto Yesũ.

16Kĩla Ũandĩko nĩwaveveewe nĩ Ngai, naw’o nĩwaĩle wa kũmanyĩsya, na kũĩkĩĩthya andũ mavĩtyo, na kũmatũngĩĩa, na kũsilĩla kwa ũlũngalu:

17nĩ kana mũndũ wa Ngai atonye kwĩthĩwa e mwĩanĩu, eanĩe kũtethya kĩla wĩa mũseo.

← Chapter 2 Jump to: Chapter 4 →