Colossians 1

Kamba (Mbivilia) 1956

Jump to: Chapter 2 →

1Vaulo mũtũmwa wa Klĩsto Yesũ kwondũ wa kwenda kwa Ngai, na Timotheo mwana‐a‐asa waitũ,

2valũa ũũ witũ ũmavikĩe atheu na ana‐a‐asa nthĩnĩ wa Klĩsto ala me na kĩthito, ala me Kolosai: Mumo nĩwĩthĩwe kwenyu na mũuo kuma kwa Ngai Asa waitũ.

3Nĩtũũtũngĩa Ngai mũvea, Ĩthe wa Mwĩaĩi waitũ Yesũ Klĩsto, tũkĩmũvoyea mavinda onthe,

4nũndũ nĩtwĩw’ĩte ũvoo wa mũĩkĩĩo wenyu nthĩnĩ wa Klĩsto Yesũ, na wendo ũla mũmendaa atheu onthe naw’o,

5nũndũ wa wĩkwatyo ũla mwaiĩwe ĩtunĩ, naw’o nĩmweew’ĩte tene ũvoo waw’o ndetonĩ ya ũla w’o wa ũvoo mũseo,

6ũla wamũvikĩe; o tondũ ũilyĩ nthĩ yonthe ũisyaa ũsyao na kwongeleka, o ũndũ ũilyĩ nthĩnĩ wenyu, kuma mũthenya ũla mweewie na mwamanya ũla mumo wa Ngai katĩ wa w’o;

7o tondũ mũmanyĩĩtw’e nĩ Evavila mwendwa, mũtethya wa wĩa vamwe naitũ, nake nĩ mũthũkũmi wĩ kĩthito wa Klĩsto kwondũ witũ,

8nake nĩwatũtavisye wendo wenyu nthĩnĩ wa Veva.

9Kwondũ wa ũu ithyĩ naitũ, kuma mũthenya ũla tweewie, tũtiekaa kũvoya na kũmũvoyeaa, nĩ kana musũe ũmanyi wa kwenda kwake nthĩnĩ wa ũĩ w’onthe na kũmanya kwa veva,

10mũkinyae ũndũ waĩle Mwĩaĩi kũvikĩa kũmwendeesya vyũ, mũkĩsyaa ũsyao kĩla wĩanĩ mũseo, na kwongeleka kũmũmanya Ngai;

11mũkitonyethw’a na ũtonyi w’onthe, kwĩanana na vinya wa ũtheu wake mũtisu, kũvikĩa kwĩlũĩũmĩlya kw’onthe na kũmĩĩsya mũtanĩte;

12mũkĩmũtũngĩa Asa mũvea, ũla watũtwie aĩlu twĩthĩwe osi ma ũtiĩwa wa atheu nthĩnĩ wa kyeni;

13ũla watũtangĩĩe kuma vinyanĩ wa kĩvindu na kũtũthamya na kũtũlikya ũsumbĩnĩ wa Mwana wake mwendwa;

14nake nthĩnĩ wake twĩ na wovosyo witũ, ũekeo wa naĩ sitũ:

15nake nĩ mũvw’ano wa Ngai ũtonekaa, mũsyawa ũla wĩ mbee wa syũmbe syonthe;

16nĩkwĩthĩwa nthĩnĩ wake syĩndũ syonthe nĩsyoombiwe, sya ĩtunĩ na sya kũũ nthĩ, syĩndũ ila syonekaa na ila itonekaa, ethĩwa nĩ ivĩla sya ũsumbĩ, o na mosumbĩ, o na monene, o na mokũmũ; syĩndũ syonthe nĩsyoombiwe nĩwe, syĩthĩwe syake;

17nake e mbee wa syĩndũ syonthe, na nthĩnĩ wake syĩndũ syonthe nikwatene.

18Nake nĩwe mũtwe wa mwĩĩ, naw’o nĩ ĩkanisa: nake nĩ mwambĩlĩlyo, na mũsyawa wa mbee kuma akw’ũnĩ; nĩ kana maũndũnĩ onthe ethĩwe e mbee.

19Nĩkwĩthĩwa kwaĩ kwenda kũseo kwa Ĩthe atĩ wĩanĩu w’onthe wĩkalae nthĩnĩ wake;

20na kwondũ wake kũsyĩw’anĩthya syĩndũ syonthe nake mwene, aetete mũuo kwondũ wa nthakame ya ngelan’yo yake; kwondũ wake, ethĩwa nĩ syĩndũ sya kũũ nthĩ, kana syĩndũ syĩ ĩtunĩ.

21Na inyw’ĩ, mwekalĩte ĩvinda ya tene mũte na wĩw’ano na mwĩ amaitha ilĩkonĩ syenyu na mĩkĩlenĩ yenyu mĩthũku,

22ĩndĩ yu nũmwĩw’ĩthanĩtye na mwĩĩ wake wa nyama kwondũ wa kũkw’a, nĩ kana amũete inyw’ĩ mbee wake, mwĩ atheu, mũte na ũndũ ũtaĩle na mũtavinganĩĩka:

23ethĩwa nĩ w’o mũkekala mũĩkĩĩonĩ, mwĩ ĩũlũ wa wambĩlĩlyo na mwĩ alũmu, na mũte kũthamwa kũtia wĩkwatyo wa ũvoo mũseo ũla mweewie, ũla watavaniw’e syũmbenĩ syonthe syĩ ĩtheo wa ĩtu; naw’o nyie Vaulo natwĩwe mũthũkũmi waw’o.

24Na yu nĩngũtana mathĩnanĩ makwa kwondũ wenyu, na nĩĩanĩsya mwĩĩnĩ wakwa mathĩna ala matialĩte ma Klĩsto kwondũ wa mwĩĩ wake, naw’o nĩ ĩkanisa;

25nayo nyie natwiwe mũthũkũmi wayo, kwĩanana na walan’yo wa Ngai ũla nanengiwe kwa ngalĩ ĩla yenyu, kwĩanĩsya ndeto ya Ngai,

26nayo nĩ ĩla nzama ĩvithĩtwe kuma tene tene na ĩvithĩtwe nzyawa syonthe: ĩndĩ yu nĩvuanĩtw’e kwa atheu make,

27namo Ngai endeew’e nĩ kũmamanyĩthya ũndũ ũtilyĩ wingĩ wa ndaĩa ya nzama ĩno kwa Andũ‐ma‐mbaĩ‐ĩngĩ, nayo nĩ Klĩsto nthĩnĩ wenyu, wĩkwatyo wa ũtheu mũtisu:

28na nĩwe ũla ithyĩ tũũmũtavan’ya, tũimũtaa kĩla mũndũ na tũkĩmũmanyĩsya kĩla mũndũ na ũĩ w’onthe, nĩ kana tũtonye kũete kĩla mũndũ e mwĩanĩu nthĩnĩ wa Klĩsto;

29nakwa nĩtethasya wĩa nũndũ wa ũu, ngĩthing’ĩĩsya kwĩanana na kwĩka kwake, ũla ũtethasya nthĩnĩ wakwa na vinya.

Jump to: Chapter 2 →