Colossians 3

Kamba (Mbivilia) 1956

← Chapter 2 Jump to: Chapter 4 →

1Ethĩwa ĩndĩ mwathayũũkiw’e vamwe na Klĩsto, manthai maũndũ ala me ĩũlũ, vala Klĩsto ũĩ, ailyi nthĩ ngalĩ ya kw’oko kwa aũme kwa Ngai.

2Mosũanĩo menyu malũme maũndũnĩ ala me ĩũlũ, na ti maũndũnĩ ala me nthĩ.

3Nĩkwĩthĩwa nĩmwakwie, na thayũ wenyu ũvithĩtwe vamwe na Klĩsto nthĩnĩ wa Ngai.

4Yĩla Klĩsto ũkonanw’a, nake nĩwe thayũ witũ, nĩvo ĩndĩ nenyu mũkonanw’a vamwe nake ũtheunĩ mũtisu.

5Kwondũ wa ũu, ũaai mamutha menyu ala me kũũ nthĩ: ũlaalai, na ũvuku, na mĩmeo mĩthũku, na kwenda maũndũ mathũku, na ĩtomo, nayo nĩ kũthaitha mĩvw’anano;

6kwondũ wa maũndũ asu ũthatu wa Ngai wũkaa kwa ana ala matew’aa:

7nenyu tene mwaendaa nthĩnĩ wamo, yĩla mwatwĩe maũndũnĩ asu;

8ĩndĩ yu vetai kũasa nenyu maũndũ asu onthe: ũthatu, na ũthilĩku, na kĩmena, na kũumana, ndeto mbathe itikethĩwe makanyw’anĩ menyu:

9mũikaneene ũvũngũ ene kwa ene; nĩkwĩthĩwa nĩmumĩtye mũndũ ũla wa tene na meko make,

10na nĩmwĩvw’ĩkĩte mũndũ mweũ, ũla ũtũngawa mweũ kũvikĩa ũmanyi kũatĩĩa mũvw’ano wa ũla wamũmbie:

11vala vatatonyeka kwĩthĩwa Mũkiliki kana Mũyuti, kwaĩkwa kana kũlea kwaĩkwa, ũla ũte na ũmanyi kana Mũsithiani, ngombo kana ũla ũte ngombo; ĩndĩ Klĩsto nĩ onthe, na e nthĩnĩ wa onthe.

12Ĩndĩ tondũ mwĩ anyuve ma Ngai, atheu na endwa, ĩvw’ĩkei ngoo yĩ na ĩnee ya kwĩw’anĩa tei, wĩnyivyo, ũuu, wũmĩĩsyo;

13kũmĩĩasya ũmwe kwa ũla ũngĩ, na kũekeanĩa ene kwa ene, ethĩwa mũndũ o na wĩva e na ũndũ na ũngĩ; o tondu Mwĩaĩi wamũekeie, inyw’ĩ nenyu ĩkaai o ta ũu:

14na mbee wa maũndũ aa onthe ĩvw’ĩkei wendo, naw’o nĩ wovano wa wĩanĩu.

15Na mũuo wa Klĩsto ũsumbĩke ngoonĩ syenyu, ũla kwondũ waw’o nenyu mweetiwe nthĩnĩ wa mwĩĩ ũmwe; na ĩthĩwai na mũvea.

16Ndeto ya Klĩsto yĩkalae na ũthwii mwingĩ nthĩnĩ wenyu; nthĩnĩ wa ũĩ w’onthe mũimanyĩan’ya na kũtaana inyw’ĩ kwa inyw’ĩ na savuli na mbathi sya kũmũkumya Ngai na mbathi sya veva, mũkĩmwinĩa Ngai na mumo ngoonĩ syenyu.

17Na ũndũ o na wĩva mwĩkaa, kwa ndeto kana kwa meko, ĩkaai w’onthe syĩtwanĩ ya Mwĩaĩi Yesũ, mũimũnenga Ngai Asa mũvea kwondũ wake.

18Iveti, ĩnyivĩsyei aũme menyu ũndũ waĩle nthĩnĩ wa Mwĩaĩi.

19Aũme, endai iveti syenyu, na mũikasyĩw’ĩe woo.

20Syana mew’ei asyai menyu maũndũnĩ onthe, nũndũ ũu nĩwendeeasya nthĩn ĩ wa Mwĩaĩi.

21Aasa, mũikathatye syana syenyu, itikakw’e ngoo.

22Ngombo, mew’ei mavwana menyu kwondũ wa mwĩĩ maũndũnĩ onthe; ti na ũthũkũmi wa kũsyaĩĩwa, ta endeesya ma andũ, ĩndĩ na ũthalĩku wa ngoo, mũkĩmũkĩa Mwĩaĩi:

23ũndũ mũkwĩka o na wĩva, wĩkei kuma ngoonĩ, ta kũmũthũkũma Mwĩaĩi, na ti andũ:

24mwĩsĩ kana mũkoosa kuma kwa Mwĩaĩi ĩtuvi ya ũla ũtiĩwa: nũndũ nĩmũthũkũmaa Mwĩaĩi Klĩsto.

25Nũndũ ũla wĩkaa ũthũku akoosa ĩngĩ kwondũ wa ũthũku ũla wekie: na kũi wendeesyo wa andũ.

← Chapter 2 Jump to: Chapter 4 →