Colossians 4

Kamba (Mbivilia) 1956

← Chapter 3 Jump to:

1Mavwana, nengai ngombo syenyu kĩla kyaĩle na kĩla kya katĩ; mwĩsĩ kana inyw’ĩ nenyu mwĩna Vwana ĩtunĩ.

2Ĩkalai mũlũlũmĩle mboyanĩ, voyai mũkĩsyaĩĩsya vamwe na kũtũnga mũvea;

3na vamwe na ũu mũkĩtũvoyea ithyĩ, nĩ kana Ngai atũvingũĩe mũomo kwondũ wa ĩla ndeto, kũneena nzama ya Klĩsto, nayo kwondũ wayo nĩ mwove;

4nĩ kana nĩmyonan’ye, o tondũ naĩlwe nĩ kũneena.

5Endaai na ũĩ kwa ala me ũtee, mũkĩtangĩĩa ĩvinda.

6Ndeto syenyu syĩthĩwe na mumo mavinda onthe, isamae mũnyũ, nĩ kana mũmanye ũndũ mwaĩlwe nĩ ũsũngĩa kĩla mũndũ.

7Maũndũ makwa onthe Tikiko akamũmanyĩthya, nake nĩ mwana‐a‐asa mwendwa, na mũthũkũmi wĩ na kĩthito, na ngombo vamwe nakwa nthĩnĩ wa Mwĩaĩi:

8nake nĩmũtũmĩte oke kwenyu kwondũ wa ũndũ o ũsu, nĩ kana mũmanye ũndũ tũilyĩ, na nĩ kana amũkiakisye ngoo syenyu;

9vamwe na Onesimo, ũla mwana‐a‐asa wĩ na kĩthito na mwendwa, nake nĩ ũmwe wenyu. Makamũtavya maũndũ onthe ala mekawa kũũ.

10Alisitaliko mwovwa vamwe nakwa nĩmwamũkethya, na Maliko, mwĩvae wa Valanava (ũla mwoosie mĩao ũndũ wake; ethĩwa akooka kwenyu mũthokyei),

11na Yesũ, ũla wĩtawa Yusito, nao nĩ andũ ala maĩkawa: asu me oka nĩ atethya ma wĩa vamwe nakwa kwondũ wa ũsumbĩ wa Ngai, andũ ala mangiakiisye.

12Evavila, nake nĩ ũmwe wenyu, ngombo ya Klĩsto Yesũ, nĩwamũkethya, aithetheesya kũvoya kwondũ wenyu mavinda onthe, nĩ kana mũũngame mwĩ ethĩanu na mwĩthĩwe mũte na nzika nongi kwendanĩ kw’onthe kwa Ngai.

13Nũndũ nĩngũmũkũsĩĩa, e na wĩa mwingĩ kwondũ wenyu, na kwondũ wa ala ma Laotisia, na kwondũ wa ala ma Ielavoli.

14Luka, mũiiti ũla mwendwa, na Ndema nĩmamũkethya.

15Ngethesyai ana‐a‐asa ala me Laotisia, na kethyai Nimba, na ĩkanisa yĩla yĩ nyũmbanĩ yake.

16Na valũa ũũ wasomwa kwenyu, twaai ũsomwe naw’o ĩkanisanĩ ya Alaotisia; na inyw’ĩ nenyu mwĩsoma valũa ũla wĩuma Laotisia.

17Na mwĩe Alikivo atĩĩ, Sũvĩa mũno ũthũkũmi ũla wosete nthĩnĩ wa Mwĩaĩi, nĩ kana ũwĩanĩsye.

18Ngethi yakwa, nyie Vaulo nĩngũandĩka na kw’oko kwakwa mwene. Lilikanai kwovwa kwakwa. Mumo nĩwĩthĩwe nenyu.

← Chapter 3 Jump to: