Colossians 2

Kamba (Mbivilia) 1956

← Chapter 1 Jump to: Chapter 3 →

1Nũndũ nĩenda mũmanye kĩthing’ĩĩsyo kĩla nĩ nakyo kwondũ wenyu, na kwondũ wa ala me Laotisia, na kwondũ wa ala mataawona ũthyũ wakwa wa mwĩĩ;

2nĩ kana ngoo syoo ikiakiw’e, makwatanĩtw’e nĩ wendo, mavikĩe ũthwii w’onthe wa wĩanĩu wa ũmanyi, nĩ kana mamanye ĩla nzama ya Ngai, nayo nĩ Klĩsto,

3ũla nthĩnĩ wake ũthwii w’onthe wa ũĩ na ũmanyi nũvithitwe.

4Nĩneena ũu, nĩ kana mũndũ o na wĩva ndakamũkenge na ndeto nzeũvye.

5Nũndũ o na ethĩwa ndi vamwe nenyu kwa mwĩĩ, kwa veva nĩ vamwe nenyu, ngĩtana na kwona mũseũvĩlye wa maũndũ menyu, na ũlũmu wa mũĩkĩĩo wenyu nthĩnĩ wa Klĩsto.

6Ĩndĩ o tondũ mwamwosie Klĩsto Yesũ Mwĩaĩi, endaai o ũu nthĩnĩ wake,

7mwĩ na mĩi mĩlũmu, na kwakwa nthĩnĩ wake, na kũlũlũmĩlw’a mũĩkĩĩonĩ wenyu, o ũndũ mwamanyĩiw’e, mũkingĩva kũtũnga mũvea.

8Ĩsũvĩei mũndũ o na wĩva ndakamũtave na ũĩ na ũkengani wake wa mana, kũatĩĩa mokũũ ma andũ, na momanyĩsyo ma kwambĩlĩlya ma nthĩ, na ti kũmũatĩĩa Klĩsto:

9nũndũ wĩanĩu w’onthe wa Ũ‐Ngai ũtwĩe nthĩnĩ wake e o na mwĩĩ,

10na inyw’ĩ nĩmwĩanĩw’e nthĩnĩ wake, nake nĩ mũtwe wa monene na mokũmũ onthe:

11na nthĩnĩ wake nĩmwaĩkĩtwe na nzaĩko ĩtaĩkawa na moko, ũndũ wa kũveta mwĩĩ wa nyama, nthĩnĩ wa nzaĩko ya Klĩsto;

12nĩmwathikiwe vamwe nake ũvatisonĩ, na nthĩnĩ waw’o nĩmwathayũũkiw’e vamwe nake kwondũ wa mũĩkĩĩo nthĩnĩ wa kwĩka kwa Ngai, ũla wamũthayũũkisye kũmumya kwa akw’ũ.

13Nenyu yĩla mwaĩ akw’ũ kwondũ wa mavĩtyo menyu na kũlea kwaĩkwa kwa mĩĩ yenyu, inyw’ĩ, nĩwamũtw’ĩkĩthisye kwĩthĩwa thayũ vamwe nake, atũekeete mavĩtyo maitũ onthe;

14amina kwananga ũandĩko ũla waandĩkĩtwe motw’ĩonĩ ũla waĩ ĩũlũ waitũ, ũla waĩ na ũmaitha kwitũ: na ooveta, aiwamba ngelan’yonĩ yake;

15eevetea monene na mokũmũ amaumĩlya ũtheinĩ, akimakĩlya vinya nũndũ wa ngelan’yo ĩsu.

16Kwondũ wa ũu mũndũ o na wĩva ndakamũsilĩle ũndũ wa kya ũya, kana kya ũnyw’a, kana kwondũ wa mũthenya wa mboka, kana mwei mũtisu, kana mũthenya wa savato:

17maũndũ asu nĩ kyuu kya maũndũ ala makoka; ĩndĩ mwĩĩ nĩ wa Klĩsto.

18Mũndũ o na wĩva ndakamũvute mũthĩnzĩo wenyu kwondũ wa kwĩnyivya kwa kwenda kwake mwene, na kũthaitha alaĩka, na kwĩlikya maũndũnĩ ala ũtaamona, akĩkathĩĩa mana kwondũ wa kĩlĩko kyake kya mwĩĩ,

19na ndeũlũmya ũla Mũtwe, ũla kuma kwake mwĩĩ w’onthe, ũinengwa vinya na ũithalanw’a na maleenyũ na malangũ, nĩwĩanaa ũndũ Ngai wianasya.

20Ethĩwa mwakwie vamwe na Klĩsto kwa momanyĩsyo ma kwambĩlĩlya ma nthĩ, nĩkĩ mũsumbĩkĩtwe nĩ motw’ĩo ta mwĩ thayũ kũũ nthĩ,

21atĩĩ, Mũikakwate, kana kũsama, kana kũkiita

22(syĩndũ isu syonthe ila ikanangĩka ĩvinda ya kwĩkaa ũndũ nasyo), kũatĩĩa motao na momanyĩsyo ma andũ?

23Maũndũ asu nĩ w’o me na wonan’yo wa ũĩ kwa kũthaitha kwĩanana na kwenda kwa mũndũ, na wĩnyivyo, na kũthĩn’ya mwĩĩ; ĩndĩ maũndũ asu maitonya kũsiĩĩa mawendi ma mwĩĩ.

← Chapter 1 Jump to: Chapter 3 →