Jonah 1

Kamba (Mbivilia) 1956

Jump to: Chapter 2 →

1Na ĩndĩ ndeto ya Yeova yamũkĩe Yona mwana wa Amitai, ĩkĩmwĩa,

2Ũkĩla, ũende Nineva, ndũa ĩsu nene, na ũkĩmyũkĩlĩlya wasya; nũndũ ũthũku woo nĩ mwambatu vala nĩĩ.

3Ĩndĩ Yona ookĩla akĩĩe Talisisi aume vala ve Yeova; na atheea Yova, na awĩla ngalawa ĩendete Talisisi: na ĩndĩ aĩva ĩtuvi yayo, na alika nthĩnĩ wayo, kũendan’ya namo Talisisi aume vala ve Yeova.

4Ĩndĩ Yeova aete kĩseve kĩnene ĩũlũ wa ũkanga, na kwaĩ kĩuutani kĩ vinya ĩũlũ wa ũkanga, o na ngalawa yesaa kwanangwa.

5Nĩvo ĩndĩ andũ ma ngalawa meewie w’ĩa, na meekaĩla kĩla mũndũ ngai yake; na mekangya syĩndũ ila syaĩ ngalawanĩ ũkanganĩ, nĩ kana yĩthĩwe mbũthũ kwamo. Ĩndĩ Yona nĩwalikĩte kũndũ kwĩ nthĩnĩ ngalawanĩ; na akakoma, akalĩkwa.

6Na ĩndĩ mũnene wa ngalawa amũkĩa, na amũkũlya, Wĩ na kĩ, we mũkomi? Ũkĩla, wĩkaĩle Ngai waku, no kwĩthĩwa Ngai atũlilikana, tũtikae.

7Na maneenan’ya kĩla mũndũ na ũla ũngĩ, Ũkai, tũlimane, nĩ kana tũmanye nĩ ũndũ waũ ũthũku ũũ wĩ ĩũlũ waitũ. Na ĩndĩ malimana, naw’o wamũvalũkĩla Yona.

8Nĩvo ĩndĩ mamwĩie, Tũtavye, nĩtũũkwĩsũva, nũũ ũla ũtumie ũthũku ũũ wĩthĩwa ĩũlũ waitũ; wĩa waku nĩ mwaũ? Na wumĩte nakũ? Nthĩ yaku nĩ yĩkũ? Na wĩ mũmwaũ?

9Nake amea, Nyie nĩ Mũevelania; na nĩngũkĩa Yeova, Ngai wa ĩtu, ũla wombie ũkanga na nthĩ nyũmũ.

10Nĩvo ĩndĩ andũ meewie w’ĩa mũno, na mamũkũlya, Wĩkĩte ũndũ mwaũ? Nũndũ andũ nĩmamanyie kana nĩwakĩĩte kuma vala ve Yeova, nĩkwĩthĩwa nĩwamatavya.

11Nĩvo ĩndĩ mamwĩie, Twĩkwĩka ata, nĩ kana ũkanga ũtũuĩsye? Nũndũ ũkanga wookĩlangilye itulumo mbee na mbee.

12Nake amea, Mbũkĩlyai, na mũimbĩkya ũkanganĩ; na ĩndĩ ũkanga ũkamũuĩsya: nũndũ nĩnĩsĩ kana nũndũ wakwa kĩuutani kĩĩ kĩnene kĩ ĩũlũ wenyu.

13Ĩndĩ andũ matwaa na vinya masyoke nthĩ; ĩndĩ matyaatonya; nũndũ ũkanga wamokĩlangĩlye itulumo mbee na mbee.

14Kwondũ wa ũu mamwĩkaĩla Yeova, na masya, Nĩtũũkwĩsũva, ame Yeova, nĩtũũkwĩsũva, tũikae nũndũ wa thayũ wa mũndũ ũũ, na ndũkatũtalĩle nthakame ĩte ĩvĩtyo; nũndũ we, ame Yeova, nĩweeka ũla wakwendeesya.

15Na ĩndĩ mamũkĩlya Yona, na mamwĩkya ũkanganĩ; na ũkanga waeka kũkĩlangan’ya.

16Nĩvo ĩndĩ andũ makĩie Yeova mũno; na mathembea Yeova nthembo, na meava.

17Na Yeova aseũvĩtye ĩkũyũ ya kũmũmelya Yona; na Yona aĩ ĩvunĩ ya ĩkũyũ mĩthenya ĩtatũ na matukũ atatũ.

Jump to: Chapter 2 →