Jonah 4

Kamba (Mbivilia) 1956

← Chapter 3 Jump to:

1Ĩndĩ ũndũ ũsu wamwĩw’ĩthya Yona woo mũno, na aĩ mũthatu.

2Nake avoya Yeova, na asya, Nĩngũkũvoya, ame Yeova, ũndũ ũũ tiw’o naisye, o yĩla naĩ nthĩ yaitũ? Kwondũ wa ũu nĩneekalaatile kũkĩĩa Talisisi; nũndũ nĩneesĩ kana we wĩ Ngai mũseo, na wĩ tei, mũmĩĩsya wa kũthata, na wĩ na ũseo mwingĩ wĩ wendo, na wĩtũngaa ndũkeke ũla ũthũku.

3Kwondũ wa ũu yu, ame Yeova, numya thayũ, nĩngũkwĩsũva; nũndũ nĩ kavaa kwakwa nĩkw’e kwĩ kwĩkala thayũ.

4Na Yeova amũkũlya, Nũkwĩka nesa ũkĩthata?

5Nĩvo ĩndĩ Yona waumie ndũanĩ, na ekala ũtee wa ndũa ngalĩ ya wumĩlonĩ wa syũa, na kũu eeyakĩa kalwanda, na ekala muunyĩnĩ wako, ambe kwona ũndũ ndũa ĩnĩkwĩkĩka.

6Na Yeova Ngai aseũvya wũngũ, na atuma ũtamba ĩũlũ vala ve Yona, kana ũtw’ĩke muunyĩ ĩũlũ wa mũtwe wake, ũmũvonokye mwĩkalĩlenĩ wake mũthũku. Na ĩndĩ Yona aĩ mũtanu mũno nũndũ wa wũngũ.

7Ĩndĩ Ngai aseũvya kĩinyũ kũikya ũnĩ ũsu, na kyaũma ũ wũngũ, na wooma.

8Na kweethĩwa, yĩla syũa yaumie, Ngai aseũvya kĩseve kĩ ĩvyũvĩ kyumĩte wumĩlonĩ wa syũa; na syũa yavĩvya Yona mũtwe, na akwatwa nĩ mũnyalo, na eekũlĩlya nĩ kana akw’e, na asya, Nĩ kavaa kwakwa nĩkw’e kwĩ kwĩkala thayũ.

9Na Ngai akũlya Yona, Nũkwĩka nesa ũkĩthata nũndũ wa wũngũ? Nake asũngĩa, Nĩngwĩka nesa kũthata, o na kũvikĩa kũkw’a.

10Na Yeova amwĩa, We nĩwĩw’ĩe wũngũ tei, ũla ũtaaũthĩnĩa, o na ndwaatuma wĩana; ũla ũnameie ũtukũ na wanangĩka o ũtukũ:

11nakwa ndyaĩlwe nĩ kwĩw’ĩa Nineva tei, ndũa ĩsu nene, ĩla nthĩnĩ wayo ve aingĩ kwĩ andũ ngili ĩana na mĩongo ĩlĩ ala matatonya kũvathũkan’ya katĩ wa kw’oko kwoo kwa aũme na kw’oko kwoo kwa aka; na ĩngĩ yĩ indo mbingĩ?

← Chapter 3 Jump to: