Jonah 3

Kamba (Mbivilia) 1956

← Chapter 2 Jump to: Chapter 4 →

1Na ndeto ya Yeova yamũkĩa Yona ĩvinda ya kelĩ, ĩkĩmwĩa,

2Ũkĩla, ũende Nineva, ndũa ĩsu nene, na ũmĩtavye ũtavan’yo ũla ngũkwĩa.

3Na ĩndĩ Yona ookĩla, na athi Nineva, kwĩanana na ndeto ya Yeova. Na Nineva yaĩ ndũa nene mũno, mũendo wa mĩthenya ĩtatũ.

4Na Yona ambĩlĩlya kũlika ĩla ndũa mũendo wa mũthenya ũmwe, nake ookĩlya wasya, akyasya, Vatiele o matukũ mĩongo ĩna, na Nineva ĩkĩng’uthũlangwa.

5Na andũ ma Nineva meetĩkĩla Ngai; na matavan’ya kũtĩĩa kũya, na meekĩa makunia, kuma ũla mũnene wamo o na kũvika ũla mũnini wamo.

6Na ũvoo wavikĩa mũsumbĩ wa Nineva, nake ookĩla kuma kĩvĩlanĩ kyake kya ũsumbĩ, na aia ngũa yake ya ũsumbĩ, na eevw’ĩka makunia, na ekala mũunĩ.

7Nake aumya ũtũmane na anyaĩĩkya Nineva kw’onthe kwa ũtw’ĩo wa mũsumbĩ na anene make me ndaĩa, akyasya, Kũtikasamwe kĩndũ o na kĩmwe nĩ mũndũ kana indo, ndĩthya ya ng’ombe kana ya mbũi na malondu; kũtikaĩwe, kana kũnyuwa kĩw’ũ;

8ĩndĩ nĩkwĩvw’ĩkwe makunia, mũndũ o na indo, na nĩkwĩkaĩlwe Ngai na vinya: ĩĩ, nĩmethyũũe kĩla ũmwe kuma mũendelenĩ wake mũthũku, na kuma ũng’endunĩ ũla wĩ mokonĩ make.

9Nũũ wĩsĩ ethĩwa Ngai ndeĩthyũũa na kwĩtũnga, na kwĩthyũũa aeke ũthatu wake mwai kana tũtikae?

10Na Ngai oona mawĩa moo, kana nĩmeethyũũie kuma mũendelenĩ woo mũthũku; na Ngai eetũnga aeka ũthũku ũla waĩtye akameka; na ndaawĩka.

← Chapter 2 Jump to: Chapter 4 →