Jonah 2

Kamba (Mbivilia) 1956

← Chapter 1 Jump to: Chapter 3 →

1Nĩvo ĩndĩ Yona wavoyie Yeova Ngai wake e ĩvunĩ ya ĩkũyũ.

2Nake asya, Nĩnĩkaĩlile Yeova kwondũ wa thĩna wakwa, Nake anzũngĩa; Nakaya nĩ nda ya Seoli, Naku weew’a wasya wakwa.

3Nũndũ nũmbĩkĩtye kyũngũnĩ, katĩ wa maũkanga nthĩnĩ, Na kĩw’ũ kingĩ nĩkinthyũlũlũkĩte; Itulumo syaku syonthe, na mĩkĩndo yaku ya manzĩ nivĩtĩle ĩũlũ wakwa.

4Nakwa nasya, Nĩmbetetwe mbee wa metho maku; Ĩndĩ ngasisya ĩngĩ kwelekela ĩkalu yaku ĩtheu.

5Manzĩ nĩmanthyũlũlũkĩte ngalĩ syonthe, o na kũvika ngoonĩ; Manzĩ ma syũngũ nene nĩmanthyũlũlũkĩte; Malula nĩmendingĩlĩte mũtwe.

6Nĩnĩlikĩte ĩtheo kũvika myambĩlĩlyo ya iĩma; Nthĩ nĩyĩĩmbingĩĩte na ivingo syayo tene na tene: Ĩndĩ nĩwumĩtye thayũ wakwa ĩimanĩ, ame Yeova Ngai wakwa.

7Yĩla ngoo yakwa ĩnĩũthelekelaa nthĩnĩ wakwa, nĩnĩmũlilikanile Yeova; Na mboya yakwa nĩyũkie kwaku, ĩkalũnĩ yaku ĩtheu.

8Ala mendaa maũndũ ma mana ma ũvũngũ Meimaa tei woo ene.

9Ĩndĩ ngakũthembea vamwe na wasya wa mũvea; Ũndũ nĩvĩtĩte ngeanĩsya. Ũtangĩĩo nĩ wa Yeova.

10Na Yeova aneena na ĩkũyũ, nayo yamũtavĩka Yona nthĩ nyũmũ.

← Chapter 1 Jump to: Chapter 3 →