Ruth 1

Kamba (Mbivilia) 1956

Jump to: Chapter 2 →

1Na kweethĩwa mĩthenya ĩla asili masilanasya, kwaĩ yũa nthĩ ĩsu. Na mũndũ ũmwe wa Mbethi‐leemu‐yuta athi akekale ũeni nthĩ ya Moavi, we, na mũka, na ana make elĩ.

2Na syĩtwa ya mũndũ ũsu eetawa Elimeleki, na syĩtwa ya mũka eetawa Naomi, na masyĩtwa ma ana make elĩ maĩ Maloni na Kilioni, namo maĩ Aevilathi ma Mbethi‐leemu‐yuta. Namo mavika nthĩ ya Moavi, na mekala kw’o.

3Na Elimeleki, mũũme wa Naomi, akw’a; na atiwa, o na ana make elĩ.

4Namo matwaa aka ma ku Moavi; syĩtwa ya ũmwe eetawa Oliva, na syĩtwa ya ũla ũngĩ eetawa Luthi: namo mekala kw’o ta myaka ĩkũmi.

5Namo elĩ, Maloni na Kilioni, makw’a: na mũndũ mũka ũsu akw’ĩĩwa nĩ ana make elĩ na mũũme.

6Nĩvo ĩndĩ wokĩlile vamwe na aka ma ana make, asyoke kuma nthĩ ĩsu ya Moavi: nũndũ nĩwew’ĩte e ku nthĩ ya Moavi ũndũ Yeova ũmokĩe andũ make ũndũnĩ wa kũmanenga lĩu.

7Nake auma vandũ vau waĩ, vamwe na aka ma ana make elĩ; namo makwata nzĩa nĩ kana masyoke nthĩ ya Yuta.

8Na Naomi amea aka ma ana make elĩ, Endai, mũsyoke kĩla ũmwe nyũmba ya inyia wake: Yeova amwĩke nesa, o tondũ inyw’ĩ mwamekie ala makwie, o nakwa.

9Yeova amũnenge kwona ũthũmũo, kĩla ũmwe nyũmbanĩ kwa mũũme wake. Nĩvo ĩndĩ wamamumunyie, namo mookĩlya wasya woo, na maĩa.

10Na mamwĩa, Aiee, ĩndĩ ithyĩ twĩsyoka vamwe naku kwa andũ maku.

11Na Naomi amea, Syokai, eĩtu makwa: mwĩendan’ya nakwa nĩkĩ? nĩ na ana angĩ ĩvunĩ yakwa, matonya kwĩthĩwa aũme menyu?

12Syokai, eĩtu makwa, endai kwenyu; nũndũ nyie nĩ mũtumĩu, nditonya kwĩthĩwa na mũũme ĩngĩ. O na ethĩwa nĩngwasya, Nĩ na wĩkwatyo, o na ngethĩwa na mũũme ũtukũ ũũ wa ũmũnthĩ, o na kũsyaa tũvĩsĩ;

13mwĩsa o kweteela mũvaka tweana? mwĩsa o kũmĩĩsya mũte na aũme? aiee, eĩtu makwa; nũndũ nĩngwĩw’a woo mwingĩ kwondũ wenyu, nĩkwĩthĩwa kw’oko kwa Yeova nĩkumĩte ĩũlũ wakwa.

14Namo mookĩlya wasya woo, na maĩa ĩngĩ: na Oliva amumunya inyia wa mũũme; ĩndĩ Luthi alũman’ya nake.

15Na amwĩa, Sisya, mũka wa mwana‐a‐inyia wa mũemeu nĩwasyoka kwa andũ make, na kwa ngai yake: syoka naku ũmũvikĩle mũka wa mwana‐a‐inyia wa mũemeu.

16Na Luthi amwĩa, Eka ũnthing’ĩĩsya ngũtie, nĩthyũũe nĩeke ũkũvikĩla; nũndũ vala wĩthi, ngathi; na vala wĩĩkala, ngekala; andũ maku makeethĩwa andũ makwa, na Ngai waku Ngai wakwa;

17vala wĩkw’ĩa, novo nĩkw’ĩa, na novo nĩthikwa: Yeova nambĩke ũu, o na mbee, ethĩwa ũndũ ũkandaan’ya naku ate o kĩkw’ũ.

18Na yĩla wonie kana nĩweyũmbanĩtye ki kũthi nake, aeka kũneena nake.

19Na ĩndĩ mathi me elĩ mũvaka mavika Mbethi‐leemu. Na kweethĩwa, mavika Mbethi‐leemu, ndũa yonthe yamaka kwondũ woo, na aka masya, Ũũ nĩ Naomi?

20Nake amea, Mũikambĩte Naomi, mbĩtei Mala; nũndũ Mwene Vinya W’onthe nũmbĩkĩte maũndũ me ũũ mũno.

21Nĩnaumie vaa nusũĩte, na Yeova nũndũngĩte ĩngĩ kwitũ nĩ mũthei; mwĩmbĩta Naomi nĩkĩ, nũndũ Yeova nũngũsĩĩe, na Mwene Vinya W’onthe nũnthĩnĩtye?

22Na ĩndĩ Naomi asyoka, na Luthi Mũmoavi, mũka‐wa‐mwana, e vamwe nake, ũla waumie nthĩ ya Moavi; namo mavika Mbethi‐leemu wambĩlĩlyonĩ wa kũketha mbaale.

Jump to: Chapter 2 →