Ruth 3

Kamba (Mbivilia) 1956

← Chapter 2 Jump to: Chapter 4 →

1Na Naomi inyia wa mũũme amũkũlya, Mwĩĩtu wakwa, ndikakũmanthĩe ũthũmũo, nĩ kana kwĩthĩwe ũseo kwaku?

2Na ĩndĩ Mboasi ti mũndũ wa mũvĩa witũ, ũla wĩĩ na athũkũmi make eĩtu? Sisya, ũtukũ ũũ wa ũmũnthĩ eũlũkĩlya mbaale kĩvũĩonĩ.

3Kwondũ wa ũu thamba, na ũyĩvaka mauta, na ũkĩkĩa ngũa syaku, na ũitheea kĩvũĩonĩ; ĩndĩ ndũkemanyĩthe ũ mũndũ, mũvaka yĩla wĩĩthĩwa anaya na kũnyw’a.

4Na kũkeethĩwa, yĩla wĩkoma, nĩvo wĩsisya vandũ vala wĩkoma, na wĩlika, na ũivw’ĩkũa nyaĩĩ syake, na ũikoma; na akaũtavya ũndũ ũla wĩĩka.

5Nake amwĩa, Ũu w’onthe waneena ngawĩka.

6Na atheea kĩvũĩonĩ, na eeka kwĩanana na ũndũ w’onthe ũla inyia wa mũũme ũmwĩaĩie.

7Na yĩla Mboasi waĩ anaya na kũnyw’a, na ngoo yake yaĩ ndanu, athi kũkoma mũthyanĩ wa kĩvumbu kya lĩu wa mbaa ngetha: nake ooka kavola, na amũvw’ĩkũa nyaĩĩ, na akoma.

8Na kweethĩwa ũtukũ katĩ, mũndũ ũsu atĩsa, na eethyũũa; na, sisya, mũndũ mũka akomete nyaĩĩnĩ syake.

9Na akũlya, Nue ũũ? Na amũsũngĩa, Ninyie Luthi mũthũkũmi waku mwĩĩtu: kwondũ wa ũu tambũũkya mũthya wa ngũa syaku ĩũlũ wa mũthũkũmi waku mwĩĩtu; nũndũ nue mũndu wa mũvĩa wa vakuvĩ.

10Nake asya, Wĩthĩwe wĩ mũathime nĩ Yeova, mwĩĩtu wakwa: nĩwonan’ya ũseo mũminũkĩlyonĩ kwĩ yĩla ya mbee, nũndũ ndwaaatĩĩa anake, o na me ngya kana athwii.

11Na yu, mwĩĩtu wakwa, ndũkakĩe; ngakwĩka w’onthe ũla ũkwasya; nĩkwĩthĩwa ndũa yonthe ya andũ makwa nĩyĩsĩ kana wĩ mũndũ mũka mwaĩlu.

12Na ĩndĩ nĩ w’o kana ninyie mũndũ wa mũvĩa wa vakuvĩ; ĩndĩ ve mũndũ wa mũvĩa wa vakuvangĩ kwĩ nyie.

13Ĩkala ũtukũ ũũ, na kĩoko kũkeethĩwa, kana ethĩwa akeanĩĩsya vala ũĩ ũndũ waĩle mũndũ wa mũvĩa, nĩ ũseo; nĩeke ũndũ waĩle mũndũ wa mũvĩa: ĩndĩ alea kwĩka kwaku ũndũ waĩle mũndũ wa mũvĩa, nĩvo ĩndĩ, o tondũ Yeova wĩ thayũ, nĩkwĩka ũndũ waĩle mũndũ wa mũvĩa: koma kũvika kĩoko.

14Na akoma nyaĩĩnĩ syake kũvika masangya: na ookĩla mbee wa mũndũ atatonya kũmanya ũngĩ. Nũndũ aisye, Kũikamanyĩke kana mũndũ mũka nĩwokie kĩvũĩonĩ.

15Na amwĩa, Ete suka ũla wĩvw’ĩkĩte, na ũiũkwata; na ookwata; nake athima ithimi thanthatũ sya mbaale, na amwaĩkya: na athi ndũanĩ.

16Na yĩla wavikie kwa inyia wa mũũme, amũkũlya, Nue ũũ, mwĩĩtu wakwa? Nake amũtavya ũndũ w’onthe ũla mũndũ ũmwĩkie.

17Na asya, Ithimi ii thanthatũ sya mbaale nĩwe wanenga; nũndũ ambĩie, Ndũkathi wĩ mũthei kũla kwĩ inyia wa mũemeu.

18Na ĩndĩ amwĩa, Ĩkala wĩkilĩlye, mwĩĩtu wakwa, kũvika ũmanye ũndũ maũndũ meĩkĩka; nũndũ ũ mũndũ ndethũmũa, ataminĩte ũndũ ũũ mũnthĩ ũũ.

← Chapter 2 Jump to: Chapter 4 →