Ruth 2

Kamba (Mbivilia) 1956

← Chapter 1 Jump to: Chapter 3 →

1Na Naomi aĩ na mũndũ wa mbaĩ ya a mũũme wa mũvĩa wa Elimeleki, mũndũ mũthwii wĩ nguma, na syĩtwa yake eetawa Mboasi.

2Na Luthi Mũmoavi amwĩa Naomi, Eka nĩthi yuyu mũũndanĩ ngekolanĩlye iia sya mbaale ĩtina wa ũla wĩmbonea ũseo. Na amwĩa, Thi, mwĩĩtu wakwa.

3Na athi, na avika na akolan’ya mũũndanĩ ĩtina wa akethi: na esa kũwĩla kĩlungu kya mũũnda kĩla kyaĩ kya Mboasi, ũla waĩ wa mũvĩa wa Elimeleki.

4Na, sisya, Mboasi auma Mbethi‐leemu, na amea akethi, Yeova nĩethĩwe vamwe nenyu. Namo mamũsũngĩa, Yeova nakũathime.

5Nĩvo ĩndĩ Mboasi wamũkũlilye ũla mũthũkũmi wake wamwiĩte kũũngamĩa akethi, Mwĩĩtu ũũ nĩ waũ?

6Na mũthũkũmi ũsu waiĩtwe kũũngamĩa akethi asũngĩa na amwĩa, Nĩ ũla mwĩĩtu Mũmoavi wokie na Naomi kuma nthĩ ya Moavi:

7nake asya, Nĩngũkwĩsũva, nenga mwanya nĩkolanĩlye nũmban’ye ĩtina wa akethi katĩ wa syove. Na ĩndĩ ooka, na atindie kuma kĩoko kũvika o na yu, ate o ĩvinda ĩvũthũ wekalangile nyũmbanĩ.

8Nĩvo ĩndĩ Mboasi wamwĩie Luthi, Ndũkwĩw’a, mwĩĩtu wakwa? Ndũkathi kũkolan’ya mũũndanĩ ũngĩ, o na ndũkaume vaa, ĩndĩ ĩkala vaa vakuvĩ na athũkũmi makwa eĩtu.

9Metho maku nĩmasisye mũũnda o ũla meũketha, naku ũmaatĩĩe: ndimatavisye anake asu maikakũkiite? Naku weew’a waũni thi vala ve ĩkuu ũnyw’e kĩla anake matavĩte.

10Nĩvo ĩndĩ wavalũkile na ũthyũ wake, na kwĩkunamya nthĩ, na amwĩa, Nũndũ wa kĩ nyie noona ũseo vala ũĩ, na wamanya nyie, nakwa nĩ mũndũ wa nthĩ ĩngĩ?

11Na Mboasi amũsũngĩa, na amwĩa, Nĩnonetw’e vyũ onthe ala wamwĩkie inyia wa mũemeu kuma mũemeu akw’a; na ũndũ ũtiĩte au na mwenyu na nthĩ ĩla wasyaĩwe, na wũkĩte kwa andũ ala ũtamesĩ o na ĩndĩĩ.

12Yeova nakũĩve wĩa waku, na ĩtuvi yĩanĩu wĩnengwa nĩ Yeova, Ngai wa Isilaeli, ũla wũkĩte kwĩvitha nthwaunĩ syake.

13Nĩvo ĩndĩ waisye, Nĩnone ũseo vala ũĩ, mwĩaĩi wakwa; nũndũ nĩwangiakisya, na nĩwaneena nesa na mũthũkũmi waku mwĩĩtu, o na ndiilyĩ ta ũmwe wa athũkũmi maku eĩtu.

14Na ĩvinda ya kũya lĩu Mboasi amwĩa Luthi, Ũka vaa, ũye lĩu, noivoka kalungu kaku ka kĩmũtũ na siki. Nake ekala nthĩ vakuvĩ na akethi; na mamũnenga lĩu wa mbaa ngetha mũkaange, na aya, na avũna, na atialya.

15Na yĩla wokĩlile akolan’ye, Mboasi ameaĩa anake make, akĩmea, Mũekei akolan’ye o syovenĩ, na mũikamũsonokye.

16Na ĩngĩ mũsũmũlĩlei syovenĩ, na mũekei akolan’ye, na mũikamũkan’ye.

17Na ĩndĩ akolan’ya mũũndanĩ ũsu kũvika wĩoo; na avũa ila wakolanasya, na syaĩ ta eva ya mbaale.

18Na eeyaĩkya, na athi ndũanĩ; na inyia wa mũũme oona ila ũkolanilye: na aumya na amũnenga lĩu ũla ũtialilye ĩtina wa avũna.

19Na inyia wa mũũme amũkũlya, Wĩkolanasya va ũmũnthĩ? Na wĩtethasya wĩa va? Naathimwe ũla ũkũmanyie. Nake amũmanyĩthya inyia wa mũũme kwa ũla ũnũũtethasya wĩa kwake, na amwĩa, Mũndũ ũsu ngũtethasya wĩa kwake ũmũnthĩ syĩtwa yake nĩ Mboasi.

20Na Naomi amwĩa mũka‐a‐mwana, Naathimwe nĩ Yeova, ũsu ũtaaeka kũmeka nesa ala me thayũ na ala makwie. Na Naomi amwĩa, Mũndũ ũsu nĩ waitũ, ũmwe wa mũvĩa witũ ũla wa vakuvĩ naitũ.

21Na Luthi Mũmoavi asya, Ĩĩ, nũndavisye, Ĩkalaa vakuvĩ na anake makwa, mũvaka o yĩla makamina ngetha yakwa yonthe.

22Na Naomi amwĩa Luthi mũka‐a‐mwana, Nĩ ũseo, mwĩĩtu wakwa, ũatĩanĩae na athũkũmi make eĩtu, o na maikakwĩthĩe mũũndanĩ ũngĩ o na wĩva.

23Na ĩndĩ ekalaa vakuvĩ na athũkũmi asu eĩtu ma Mboasi, aikolan’ya kũvika mũminũkĩlyo wa ngetha ya mbaale na ngetha ya nganũ; na atũa na inyia wa mũũme.

← Chapter 1 Jump to: Chapter 3 →