Ruth 4

Kamba (Mbivilia) 1956

← Chapter 3 Jump to:

1Na ĩndĩ Mboasi ambata mbingĩlonĩ, na ekala nthĩ vau: na, sisya, mũndũ ũla wa mũvĩa wa vakuvĩ ũla Mboasi ũwetie avĩtĩla vo; nake amwĩa, Ti o we, ngan’ya! athũkĩla vaa wĩkale nthĩ. Na aathũkĩla, na ekala nthĩ.

2Na oosa andũ ĩkũmi katĩ wa atumĩa ma ndũa, na amea, Ĩkalai vaa nthĩ. Na mekala nthĩ.

3Na amwĩa ũla mũndũ wa mũvĩa wa vakuvĩ, Naomi, ũla ũnasyokie kuma nthĩ ya Moavi, nũnũkũthoosya kĩlungu kya nthĩ, kĩla kyaĩ kya mwana‐a‐ia waitũ Elimeleki:

4nakwa nĩnĩsũanĩie kũkumbũlĩla we, ngĩkwĩa, Kĩthooe aa mailyĩ vaa mene, na atumĩa ma andũ makwa mene. Ethĩwa ũkakyovosya, wĩkyovosya: ĩndĩ ethĩwa ndwĩkyovosya, ndavya ĩndĩ, nĩ kana nĩmanye; nũndũ vai ũngĩ wa ũkyovosya ate o we; nakwa nĩ ĩtina waku. Nake asya, Ngakyovosya.

5Nĩvo ĩndĩ Mboasi waisye, Mũthenya ũla wĩthooa mũũnda kw’okonĩ kwa Naomi, mũvaka ũkĩthooe o ta ũu kwa Luthi ũla Mũmoavi, kĩveti kya ũla mũkw’ũ, wũkĩlye syĩtwa ya ũsu mũkw’ũ ũtiĩwanĩ wake.

6Na mũndũ wa mũvĩa ũla wa vakuvĩ asya, Nditonya kũkyovosya kwondũ wakwa, ndikathũkye ũtiĩwa wakwa mwene: wĩyosee, we, kĩanda kyakwa kya kwovosya; nũndũ nditonya kũkyovosya.

7Na ĩndĩ ũũ nĩw’o waĩ kĩthĩo kwa Isilaeli mavinda ma tene ũndũ wa kwovosya na ũndũ wa kũkũan’ya, kwondũ wa kũlũlũmĩlya maũndũ onthe: mũndũ aumasya kĩatũ kyake, na aimũnenga mũtũi wake; na ũu nĩw’o waĩ mũthemba wa ũkũsĩ kwa Isilaeli.

8Kwondũ wa ũu wa ũu mũndũ wa mũvĩa wa vakuvĩ amwĩa Mboasi, Ĩthooee mwene. Na aumya kĩatũ kyake.

9Na Mboasi amea atumĩa, na andũ onthe, Inyw’ĩ mwĩ ngũsĩ mũnthĩ ũũ, kana nĩnathooa kyonthe kĩla kyaĩ kya Elimeleki, na kyonthe kĩla kyaĩ kya Kilioni na Maloni, kuma kw’okonĩ kwa Naomi.

10Na ĩngĩ Luthi ũla Mũmoavi, kĩveti kya Maloni, nĩnamũthooa atw’ĩke mũka wakwa, nũkĩlye syĩtwa ya ũla mũkw’ũ ũtiĩwanĩ wake, nĩ kana syĩtwa ya ũsu mũkw’ũ yĩikavetwe kuma katĩ wa ana‐a‐ĩthe make, na kuma mbingĩlonĩ ya vandũ vake: inyw’ĩ mwĩ ngũsĩ mũnthĩ ũũ.

11Na andũ onthe ala maĩ mbingĩlonĩ, na atumĩa, masya, Twĩ ngũsĩ. Yeova namũtw’ĩkĩthye mũndũ mũka ũla walika nyũmba kwaku o ta Lakeli na ta Lea, ala maakie me elĩ nyũmba ya Isilaeli: naku waĩle nthĩnĩ wa Evilatha, na ĩthĩwa na nguma Mbethi‐leemu:

12na nyũmba yaku yĩthĩwe ta nyũmba ya Velesi, ũla Tamali wamũsyaĩe Yuta, ya mbeũ ĩla Yeova wĩkũnenga ya mũndũ mũka ũũ wa mũika.

13Kwondũ wa ũu Mboasi amwosa Luthi, na atw’ĩka kĩveti kyake; na alika kwakyo, na Yeova akĩnenga kũya ĩvu, na kyasyaa mwana.

14Na iveti syamwĩa Naomi, Yeova nataĩwe, ũla ũtakũtia ũmũnthĩ ũte mũndũ wa mũvĩa wa vakuvĩ; na syĩtwa yake nĩyĩthĩwe na nguma nthĩnĩ wa Isilaeli.

15Na kwaku akeethĩwa mũtũngĩĩi wa thayũ, na mũei wa ũkũu waku; nũndũ mũka wa mwana waku, ũla ũkwendete, ũla mũseo kwaku kũvĩtũka ana mũonza, nĩwamũsyaa.

16Na Naomi oosa kana, na akaia kĩthũinĩ kyake, na atw’ĩka mũei wako.

17Na iveti, atũi make, syakatw’ĩa syĩtwa, ikyasya, Ve mwana ũsyaĩtwe kwa Naomi; na syamwĩta syĩtwa yake Oveti: nĩwe ĩthe wa Yese, ĩthe wa Ndaviti.

18Na ĩndĩ ii nĩsyo nzyawa sya Velesi: Velesi amũsyaie Esiloni,

19na Esiloni amũsyaa Lamu, na Lamu amũsyaa Aminatavu,

20na Aminatavu amũsyaa Nasoni, na Nasoni amũsyaa Salumoni,

21na Salumoni amũsyaa Mboasi, na Mboasi amũsyaa Oveti,

22na Oveti amũsyaa Yese, na Yese amũsyaa Ndaviti.

← Chapter 3 Jump to: