1 Peter 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala nĩĩ nyie Vetelo mũtũmwa wa Yesũ Klĩsto; valũa ũũ nĩ kwenyu inyw'ĩ andũ anyuve ma Ngai ala mwĩkalaa ta aeni mũnyaĩĩkĩe kĩla vandũ isionĩ ila syĩtawa Vondo, Akalatia, Kavandosia, Asia na Mbithinia.

2Nĩmũnyuvĩtwe kwĩanana na kĩeleelo kya Ngai Ĩthe waitũ, na mũkathew'a nĩ Veva Mũtheu wake, nĩ kana mũmwĩw'e Yesũ Klĩsto na kũthew'a nĩ nthakame yake. Mumo na mũuo wa Ngai nĩsyĩthĩwe nenyu kwa wingĩ.

3Mũvea nĩ kwa Ngai Ĩthe wa Mwĩai waitũ Yesũ Klĩsto, nũndũ kwa tei wake mũnene, nĩwatũnengie thayũ mweũ kwa kũmũthayũũkya Yesũ Klĩsto kuma kwa akw'ũ. Ũndũ ũsu nũtumaa twĩthĩwa na wĩkwatyo wĩ thayũ.

4Kwoou twĩ na wĩkwatyo mũlũmu kana tũkakwata ũathimo mwingĩ ũla Ngai wiĩe andũ make ĩtunĩ, vala ũtatonya kwoa, kana kwanangĩka, kana kũalyũka.

5Inyw'ĩ nenyu kwĩsĩla mũĩkĩĩonĩ wenyu, nĩmũsũvĩawa nĩ ũtonyi wa Ngai nginya ĩvinda ya ũtangĩĩo, yĩla yĩkaumĩlw'a mũthenyanĩ wa mũminũkĩlyo.

6Tanai ũndũnĩ ũsu o na kau nĩmũtonya kwĩthĩwa na kĩmako kwa kavinda kakuvĩ, nũndũ wa matatwa maingĩ me kĩvathũkany'o ala mamũkwataa.

7Kĩeleelo kya matatwa asu nĩ kũĩkĩĩthya kana mwĩ alũmu mũĩkĩĩonĩ. O na thaavu, ũla ũtonya kwanangĩka, nũsiaw'a kwa kũvĩvw'a na mwaki; o ta ũu no nginya mũkatatwa mũĩkĩĩonĩ wenyu, ũla wĩ vata mũno mbee wa thaavu. Nĩvo ĩndĩ mwĩkwata nguma, ngatho, na ndaĩa Mũthenyanĩ wa kũka ĩngĩ kwa Yesũ Klĩsto.

8O na kau mũyaamwona nĩmũmwendete na nĩmũmũĩkĩĩaa o na kau yu mũiũmwona. Na kwoou nĩmũtanaa na ũtanu mũnene wĩ na ngatho na ũtaweteka.

9Kwa kĩtumi kĩu mũendee na kũkwata ũtangĩĩo wa mathayũ menyu, kĩla nĩkyo kĩeleelo kyenyu kya kwĩthĩwa na mũĩkĩĩo.

10Ũtangĩĩo ũũ nĩw'o athani mamanthaa na kĩthito, na kwathana ĩũlũ wa mumo wa ũtangĩĩo ũsu Ngai wĩmũnenga.

11Nĩmatatie kũmantha ũndũ ĩvinda yĩu yĩkethĩwa yĩilyĩ na yĩkooka ata. Ĩvinda yĩĩ nĩyo Veva wa Klĩsto ũla waĩ nthĩnĩ woo wawetaa, yĩla mathanaa mathĩna ala Klĩsto ũkomĩĩsya na ũkumyo ũla wĩĩthĩwa ĩtina.

12Ngai nĩwamavuanĩisye athani aa kana wĩa woo ndwaĩ wa kũmatethya mo ene, ĩndĩ nĩ kwondũ wenyu, nũndũ mo maneenaa ĩũlũ wa maũndũ ala yu mwĩw'ĩte kuma kwa ala matũmĩtwe kũtavany'a Ũvoo Mũseo vinyanĩ wa Veva Mũtheu, ũla watũmĩtwe kuma ĩtunĩ. Maũndũ asu nĩmo o na alaĩka mendaa kũmanya.

13Ĩthĩawai mwĩyũmbanĩtye ilĩkonĩ syenyu kũthũkũma. Ĩthĩwai na wĩting'o na kwia wĩkwatyo wenyu w'onthe mumonĩ ũla mwĩnengwa yĩla Yesũ Klĩsto wĩumĩla.

14Ta mwĩ syana mbĩwi sya Ngai, mũiketĩkĩle kwĩthĩwa na mwĩkalo ũtongoew'e nĩ mawendi mathũku ma mwĩĩ, o tondũ mwailyĩ mũtanamba kũtw'ĩka aĩkĩĩi.

15Ĩndĩ nũndũ Ngai ũla wamwĩtie nĩ mũtheu, o nenyu ĩthĩwai mwĩ atheu.

16O tondũ Maandĩko Matheu maĩtye, “Ĩthĩwai mwĩ atheu nũndũ nyie nĩ mũtheu.”

17Inyw'ĩ mũmwĩtaa Asa, yĩla mũũvoya Ngai ũsu ũsilĩlaa andũ onthe kwĩanana na meko moo atekwendeesya amwe; kwoou ta mwĩ aeni kũũ ĩũlũ wa nthĩ, ĩkalaai mwĩ na kĩkĩo kya Ngai ĩvinda yonthe ya thayũ wenyu.

18Nĩmwĩsĩ kĩla kyaĩviwe nĩ kana mwovow'e kuma mwĩkalonĩ ũtaĩlĩte, ũla wumanĩte na aaũmae menyu. Wovosyo ũsu ndumanĩte na kĩndũ kĩtonya kwanangĩka ta silĩva kana thaavu,

19ĩndĩ wumanĩte na nthembo ya thooa mũnene mũno ya Klĩsto, ũla wailyĩ ta katena ka ĩlondu kate kĩema kana ĩlanga.

20Nĩwanyuvĩtwe nĩ Ngai mbee wa nthĩ ĩtanamba kũmbwa, nayu nĩwonanĩtw'e mĩthenyanĩ ĩno ya mũthya kwondũ wenyu.

21Kwĩsĩla kwa Klĩsto nĩmũkũĩkĩĩa Ngai, ũla wamũthayũũkisye kuma kwa akw'ũ na amũnenga ũkumyo nĩ kana mũĩkĩĩe na kũmwĩkwatya Ngai.

22Nũndũ wa kwĩthĩwa nĩmũatĩĩaa ũla ũw'o, nĩmũtheetw'e ngoonĩ syenyu mũkethĩwa mwĩ na wendo wa w'o kwa aĩkĩĩi ala angĩ, na kwoou endanaai ũmwe kwa ũla ũngĩ na ngoo yonthe.

23Kwĩsĩla ndetonĩ ya Ngai ĩla yĩ thayũ na yĩkalaa tene na tene, nĩmũsyaĩtwe ĩngĩ, ti ta syana sya mũsyai ũla ũkusaa, ĩndĩ ũla ũtakusaa.

24O tondũ Maandĩko Matheu maĩtye, “Andũ onthe mailyĩ ta nyeki, na nguma yoo ĩilyĩ ta malaa ma kĩthekanĩ. Nyeki nĩyũmaa, namo malaa nĩmavovaa maketĩka,

25ĩndĩ ndeto ya Mwĩai yĩkalaa tene na tene.” Ndeto ĩsu nĩyo Ũvoo Mũseo ũla watavaniw'e kwenyu.

Jump to: Chapter 2 →