1 Peter 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Kwoou ĩvetanei na ũthũku w'onthe: Ũkengani, mĩseũvyo, kĩwĩu kana kũumangana.

2Ĩthĩwai ta twana tũũkenge, mwĩ na waũni mũno wa ĩia ĩseo ya kĩ-veva, nĩ kana kwa kũyĩnyw'a mũendee na kwĩana ũtangĩĩonĩ wenyu.

3“Inyw'ĩ nĩmũminĩte kũmanya kana kwa w'o Mwĩai e tei.”

4Ũkai kwa Mwĩai ũla nĩ ĩvia yĩ thayũ yĩla yaleilwe nĩ andũ, ĩndĩ wanyuviwe nĩ Ngai na wĩ vata mũno kwake.

5Inyw'ĩ ta mavia me thayũ, ĩnenganei mũtũmĩwe nĩ Ngai kwaka ĩkalũ ya kĩ-veva, na mũithũkũmaa ta athembi atheu, mũthembae nthembo sya kĩ-veva ila syĩtĩkĩlĩkaa kwa Ngai kwĩsĩla kwa Yesũ Klĩsto.

6Maandĩko Matheu maĩtye, “Sisyai nĩngwia ĩvia nthĩnĩ wa Saioni, ĩvia yĩla ĩnyuve na ya vata mũno mwakonĩ, na ũla ũmũĩkĩĩaa ndakasonokw'a.”

7Ĩvia yĩĩ nĩ ya vata mũnene kwenyu inyw'ĩ ala mũĩkĩĩaa, ĩndĩ kwa ala mataĩkĩĩaa, “Ĩvia yĩla aki ma myako maleile, nĩyĩtw'ĩkĩte ĩvia yĩla ya vata mũno mwakonĩ.”

8Vandũ vangĩ Maandĩko Matheu maĩtye, “Ĩvia yĩu yĩkatulasya andũ, na ĩvia yĩu ĩnene yĩkatumaa mavalũka;” matulaw'a nũndũ nĩmaleaa kũĩkĩĩa ĩla ndeto, o tondũ mathĩĩwe kwĩka.

9Ĩndĩ inyw'ĩ mwĩ mbaĩ nyuve, athembi ma kĩ-ũsumbĩ, mbaĩ ntheu, andũ ma Ngai mwene, nĩ kana mũtavanasye maũndũ make ma ũseng'yo ala wĩkaa, ũla ũmwĩtĩte kuma maũndũnĩ ma kĩvindu mũlike kyeninĩ kyake kya kũseng'ya.

10Ĩvinda ya navu mbeenĩ mũyaĩ andũ ma Ngai, ĩndĩ yu mwĩ andũ make; o ta ũu mũyakwatĩte tei wa Ngai, ĩndĩ yu nĩmũkwatĩte tei wake.

11Nĩngũmwĩsũva endwa makwa ala mwĩkalaa ta mwĩ aeni kũũ ĩũlũ wa nthĩ, mũiketĩkĩle kũatĩĩa mawendi ma mwĩĩ ala ĩvinda yonthe mamũkitaa vevanĩ.

12Mwĩkalo wenyu wĩthĩawe wĩ mũseo katĩ wa andũ ala mate aĩkĩĩi, nĩ kana andũ mamũneenea naĩ monae meko menyu maseo, na mayĩthĩwa matonya kũmũkatha Ngai Mũthenyanĩ wa Ũsilĩlo.

13Kwondũ wa ndaĩa ya Mwĩai, ĩnyivĩsyei kĩla ũtongoi ũnengetwe andũ; kwa mũsumbĩ wa Loma ũla wĩ na ũkũmũ,

14kana kwa ngavana ũla ũtũmĩtwe nĩ mũsumbĩ ũsu asilĩle andũ ala mekaa mavĩtyo, na kũmakumya ala mekaa nesa.

15Kwenda kwa Ngai nĩ mwĩke meko maseo, nĩ kana mũvindĩthye andũ atumanu ala maneenaa ndeto sya mana.

16Ĩkalaai ta andũ me na ũthasyo, ĩndĩ mũikatũmĩe ũthasyo wenyu kwĩka naĩ; ĩkalaai ta athũkũmi ma Ngai.

17Nengaei kĩla mũndũ ndaĩa, endai aĩkĩĩi ala angĩ, mũkĩei Ngai na kũnenga mũsumbĩ wa Loma ndaĩa.

18Athũkũmi ĩnyivĩsyei anene menyu na kũmanenga ndaĩa ĩla ĩmaĩlĩte, na tyo ala me tei na auu me oka, ĩndĩ o na ala mamũthĩnasya.

19Ngai akamũathima kwondũ wa kũmĩĩsya mathĩna ala mũthĩnaa mũtaĩlĩte kũthĩna, nũndũ nĩmwĩkaa kwenda kwake.

20Ve ũtethyo mwaũ kwaku kũkũnwa kwondũ wa kwĩka naĩ? Ĩndĩ ethĩwa wĩũmĩĩsya kũthĩnw'a kwondũ wa kwĩka ũndũ ũla waĩlĩte, Ngai akakũathima kwondũ wa ũndũ ũsu.

21Ngai amwĩtie nũndũ wa kĩtumi kĩĩ, nĩkwĩthĩwa Klĩsto mwene nĩwathĩniw'e kwondũ wenyu, na amwony'a ngelekany'o ĩla mwaĩlĩte kũatĩĩa.

22We ndaaĩka naĩ, na ndaaneena ndeto ya ũvũngũ o na ĩmwe.

23Yĩla waumangiwe nĩ andũ, ndaaĩyĩumĩa; athĩnw'a nĩ andũ ndaamakandĩa, ĩndĩ amwĩkwatasya Ngai, ũla nĩwe mũsili mũlũngalu.

24Klĩsto we mwene nĩwakuie naĩ sitũ mwĩĩnĩ wake ngelany'onĩ, nĩ kana tũthaw'e kuma vinyanĩ wa naĩ na kwĩkalaa thayũ wa ũlũngalu. Kwĩsĩla itaunĩ syake nĩmũvoetw'e.

25Mwailyĩ ta malondu mau mekwanganga, ĩndĩ yu nĩmũtũngĩtwe kũla kwĩ Mũĩthi na Mũsũvĩi wa mathayũ menyu.

← Chapter 1 Jump to: Chapter 3 →