1 Peter 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1O ta ũu o nenyu iveti nĩmwaĩlĩte kwĩnyivĩasya aũme menyu, nĩ kana ethĩwa ve amwe moo mataĩkĩĩaa ndeto ya Ngai, mwĩkalo wenyu ũmakusye maĩkĩĩe o na mũteũmatavya ndeto o na ĩmwe.

2Nĩkwĩthĩwa makoona mwĩkalo wenyu wĩ mũtheu na mwĩ na kĩkĩo kya Ngai.

3Kwĩyanakavya kwenyu kũikethĩawe kwĩo kwa kwoneka kũũ nza, ta kũseũvya nzw'ĩĩ, kwĩkĩa syĩndũ sya wanake sya thaavu, kana kwĩkĩa ngũa mbanake.

4Ĩndĩ kwĩyanakavya kwenyu nĩkwĩthĩwe kwa ngoonĩ, kũla kũtonekaa, wanake ũla ũtathelaa wa veva wa wĩnyivyo na ũuu, ũla wĩ vata mũno kũla kwĩ Ngai.

5Ũu nĩw'o aka atheu ma tene ala meekwatĩtye Ngai mekalaa makĩyanakavya na kwĩnyivĩsya aũme moo.

6O ta Sala ũla weenyivĩasya Avalaamu na kũmwĩtaa mwĩai. Inyw'ĩ mwĩ nzyawa syake syaw'o ethĩwa mwĩkaa maũndũ ala maĩlu, mũte kũkĩa kĩndũ o na kĩva.

7O ta ũu nenyu aũme nĩmwaĩlĩte kwĩkalanasya na iveti syenyu kwa nzĩa nzeo. Manengaei ndaĩa ta atetheesya menyu, nĩkwĩthĩwa Ngai akamanenga o tenyu mũthĩnzĩo wa thayũ. Mweeka ũu vai kĩndũ kĩtuma Mwĩai ũtew'a mboya syenyu.

8Ngĩminũkĩlya, inyw'onthe ĩkalanasyai mwĩ na ngwatanĩo, mũyĩw'anĩaa tei na kwendanaa ta ana-a-asa; ĩthĩawai mũyĩw'anĩa ĩnee vamwe na kwĩnyivanĩsya ũmwe kwa ũla ũngĩ.

9Mũikaĩvanĩsye ũthũku kwa ũthũku, kana mwaumwa mũkeyĩumĩa; vandũ va kwĩka ũu maathimaei ala meũmwĩka naĩ, nũndũ ũu nĩw'o mweetĩwe, nĩ kana mũtonye kũkwata ũathimo.

10Maandĩko Matheu maĩtye, “Ũla ũkwenda kwĩthĩwa na thayũ wa ũtanu, na kwĩthĩawa na ĩvinda ĩseo, nĩaekane na ũneeni mũthũku, na kũeka kũneena ũvũngũ.

11O ta ũu nĩevathane na ũthũku, na kwĩkaa ũla waĩlu. Nĩethĩwe mũndũ wa mũuo, na kũendeea kwonany'a mũuo ũsu.

12Nũndũ Mwĩai nũmasũvĩaa ala mekaa kwenda kwake, na kwĩthũkĩĩsya mboya syoo; ĩndĩ ndendeeaw'a nĩ ala mekaa maũndũ mathũku.”

13Nũũ ũmwĩka ũndũ mũthũku ethĩwa mwĩthangaaĩa kwĩka maũndũ maseo?

14Ĩndĩ o na ethĩwa nĩmũtonya kũthĩnw'a kwondũ wa kwĩka maũndũ maseo, mwĩ aathime! Mũikakĩe mũndũ o na wĩva, kana kwĩtĩkĩlya ngoo syenyu ikwatwe nĩ kĩũũyũ.

15Ĩndĩ ĩthĩwai na kĩkĩo kya Klĩsto kuma ngoonĩ, na kũmũnenga ndaĩa ta we Mwĩai. Ĩthĩwai mwĩyũmbanĩtye kĩla ĩvinda kũsũngĩa, kwa kũmũnenga kĩtumi mũndũ o na wĩva ũla wĩmũkũlya ĩũlũ wa wĩkwatyo wenyu,

16ĩndĩ ĩkaai ũu mwĩ na wĩnyivyo na ndaĩa. Ĩkalaai na ngoo ntheu, nĩ kana yĩla mwaumwa, asu maneeneaa mwĩkalo wenyu mũseo wa Ũklĩsto naĩ matonye kũsonokw'a.

17Nũndũ nĩ kavaa kũthĩnw'a kwondũ wa kwĩka maũndũ maseo, ethĩwa kũu nĩkw'o kwenda kwa Ngai, kũte kũthĩnw'a nũndũ wa kwĩka maũndũ mathũku.

18Nĩkwĩthĩwa Klĩsto o nake nĩwakwie kwondũ wa naĩ sitũ atakakw'a ĩngĩ, we ũla mũlũngalu vandũ va ala mate alũngalu, nĩ kana atwĩw'anĩthye na Ngai. Akwie kĩkw'ũ kya kĩ-mwĩĩ, ĩndĩ eethĩwa thayũ kĩ-veva,

19na e nthĩnĩ wa thayũ ũsu, nĩwaendie kũtavany'a kwa maveva ala mavingĩĩtwe vala maveva ma ala akw'ũ mekalaa.

20Maveva asu nĩ ma andũ ala maleile kũmwĩw'a Ngai, yĩla weeteelile na wũmĩĩsyo ĩvindanĩ yĩla Noa waendee na kwaka ngalawa. Ngalawanĩ ĩsu no andũ nyanya ala matangĩiwe nĩ Ngai kwa kũmesĩlya kĩw'ũnĩ kĩu.

21Kwĩsĩlw'a kĩw'ũnĩ kũu nĩ ta ũvatiso, ũla nĩ ngelekany'o ya ũndũ Ngai yu ũmũtangĩĩaa. Ti kwa kũthambw'a kĩko kya mwĩĩnĩ, ĩndĩ nĩ kwa kũmwatha Ngai na wasya mũseo wa ngoo. Nĩmũtangĩĩawa kwĩsĩla ũthayũũkonĩ wa Yesũ Klĩsto.

22Yesũ Klĩsto yu ailyĩ ĩtunĩ ngalĩko ya kw'oko kwa aũme kwa Ngai, e na ũkũmũ ĩũlũ wa alaĩka, mokũmũ na motonyi.

← Chapter 2 Jump to: Chapter 4 →