1 Peter 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Kwoou nũndũ Klĩsto athĩnie mwĩĩnĩ wake, nenyu o ta ũu ĩkalaai mwĩyũmbanĩtye kũthĩna o take, nũndũ ũla ũthĩnaa mwĩĩnĩ nũekanĩte na naĩ.

2Kuma yu mwaĩlĩte kwĩkala matukũ menyu ala matiele ĩũlũ wa nthĩ, mũtongoew'e nĩ kwenda kwa Ngai na ti mawendi ma mwĩĩ.

3Nĩmwatũmĩie ĩvinda yingĩ navu mbeenĩ mũyĩka maũndũ ala andũ ma nthĩ mekaa, namo nĩ kũtanĩa maũndũ mathũku ma nthĩ ĩno, mawendi mathũku, ũthengi, kũenda mbokanĩ itaĩlĩte na syathĩnĩ sya ũnywi, na ũthaithi ũtaĩlĩte wa ngai sya mĩvw'anano.

4Andũ ma nthĩ yu nĩmeũseng'wa ninyw'ĩ, moona mũte ngwatanĩo namo maũndũnĩ asu ma kwĩka naĩ, na kwoou mayambĩĩa kũmũumanga.

5Ĩndĩ namo makamũnenga Ngai ũtalo wa maũndũ ala meekie, nũndũ we nĩwĩyũmbanĩtye kũsilĩla ala me thayũ na ala akw'ũ.

6Kĩu nĩkyo kĩtumi kya Ũvoo Mũseo kũtavanw'a kwa akw'ũ o namo, nĩ kana methĩwe me thayũ nthĩnĩ wa Veva o tondũ Ngai ũilyĩ, o na kau maĩ asilĩle yĩla maĩ kũũ ĩũlũ wa nthĩ o tondũ andũ onthe masilĩlawa.

7Mũminũkĩlyo wa maũndũ onthe nũthengee. Kwoou ĩthĩwai mwĩ na wĩting'o na kwĩkalaa mwĩyũmbanĩtye, nĩ kana mwĩthĩwe mũtonya kũvoya.

8Mbee wa maũndũ asu onthe endanaai ũmwe kwa ũla ũngĩ na wendo wa w'o, nũndũ wendo nũtumaa mũndũ aekea ala angĩ mavĩtyo moo.

9Thokasyai andũ mĩsyĩnĩ kwenyu na ũtanu mũte kũnyungunyĩsya.

10Kĩla ũmwe wenyu nĩwaĩlĩte kũtũmĩa mũthĩnzĩo ũla ũnengetwe athũkũme andũ ala angĩ, na ayĩthĩwa e mũĩkĩĩku kwa Ngai aitũmĩa mũthĩnzĩo ũsu.

11Ethĩwa mũndũ nĩ mũtavany'a, nĩatavany'e maũndũ kuma kwa Ngai. Ũla ũkũthũkũma andũ ala angĩ, amathũkũmae na vinya w'onthe ũla ũnengetwe nĩ Ngai, nĩ kana maũndũnĩ onthe Ngai akumw'e kwĩsĩla kwa Yesũ Klĩsto. Kwake nĩkwĩthĩwe ũkumyo na ũsumbĩko tene na tene. Ameni.

12Endwa makwa, mũikaseng'we nĩ motato me vinya ala mamũkwatĩte, ta kĩndũ kya kũtelemya kĩkĩkĩte kwenyu.

13Ĩndĩ tanai nĩkwĩthĩwa mwĩ ngwatanĩo na Klĩsto mathĩnanĩ make, nĩ kana mwĩĩthĩwa na ũtanu mwingĩ yĩla ũkumyo wake wĩumĩlw'a.

14Mwĩ aathime ethĩwa nĩmũkũumangwa nĩkwĩthĩwa mwĩ ma Klĩsto, nũndũ Veva wa Ngai na ũkumyo wake nĩwĩkalaa nthĩnĩ wenyu.

15Ethĩwa ve ũmwe wenyu wĩthĩnw'a, ndakaathĩnw'e nĩkwĩthĩwa nĩ mũaani, kana kĩng'ei, kana mũndũ mwathe kana mũndũ wĩlikasya maũndũnĩ mate make.

16O vamwe na ũu, ethĩwa mũndũ akathĩnw'a nũndũ nĩ Mũklĩsto, ndakatate kwĩw'a nthoni, ĩndĩ nĩ atũngĩe Ngai mũvea nĩkwĩthĩwa ewetanĩw'a na ĩsyĩtwa ya Klĩsto.

17Ĩvinda ya Ngai ya kũsilĩla andũ nĩ ĩviku, na eambĩĩa na ala make mwene. Na ethĩwa Ngai eambĩĩa naitũ, ũndũ ũsu ũkeethĩwa ũilyĩ ata kwa ala mataĩkĩĩa Ũvoo Mũseo wa Ngai?

18Maandĩko Matheu maĩtye, “Ethĩwa ve vinya kwa mũndũ mũlũngalu kũvonoka, kũkeethĩwa kũilyĩ ata kwa ala mate na kĩkĩo kya Ngai na mekaa naĩ?”

19Kwoou ala mathĩnaw'a nũndũ nĩ kwenda kwa Ngai mathĩnw'e, nĩmaendee na kwĩka ũla waĩlu na kwĩnenganae kwa Mũmbi woo, ũla nĩ wa kũĩkĩĩwa.

← Chapter 3 Jump to: Chapter 5 →