2 Corinthians 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala nĩĩ nyie Vaũlo mũtũmwa wa Yesũ Klĩsto kwondũ wa kwenda kwa Ngai, na kuma kwa mwana-a-asa waitũ Timotheo. Valũa ũũ nĩ kwenyu ĩkanisa ya Ngai yĩla yĩ Kolintho, na kwa aĩkĩĩi onthe kĩla vandũ nthĩ ya Akaia.

2Mumo na mũuo nĩsyĩthĩwe nenyu kuma kwa Ngai Asa waitũ, na kwa Mwĩai Yesũ Klĩsto.

3Nakathwe Ngai, Ĩthe wa Mwĩai waitũ Yesũ Klĩsto, Asa wĩ tei na Ngai ũla ũnenganae ũkiakisyo w'onthe.

4Nĩwe ũtũkiakiasya ithyĩ mathĩnanĩ maitũ onthe, nĩ kana twĩthĩwe tũtonya kũkiakisya ala me thĩnanĩ o na wĩva, tũitũmĩa ũkiakisyo ũla ithyĩ tũkiakiĩtw'e naw'o nĩ Ngai.

5Nĩkwĩthĩwa o tondũ twĩ mũamba na Klĩsto mathĩnanĩ make maingĩ, now'o tũkwataa ũkiakisyo wingĩvĩte kwĩsĩla kwa Klĩsto.

6Yĩla tũũthĩna, twĩthĩna kwondũ wenyu mũkiakiw'e na kũtangĩĩwa, na yĩla tũũkiakiw'a nĩvo o nenyu mũkwataa ũkiakisyo, ũla ũtumaa mwĩthĩwa na wũmĩĩsyo wa kũmĩĩsya mathĩna o ala ithyĩ tũthĩnaa.

7Wĩkwatyo witũ vala mũĩ nĩ mũlũmu vyũ, nũndũ nĩtwĩsĩ kana o ũndũ mwĩ mũamba naitũ mathĩnanĩ maitũ, now'o mũkwataa ũkiakisyo ũla tũnengawe.

8Mbaitũ, nĩtũkwenda kũmũmanyĩthya mathĩna ala twakwatie twĩ nthĩ ya Asia. Mathĩna asu matũvinyĩĩie mũno, kũvikĩa wĩkwatyo wa kũendeea kwĩthĩwa thayũ wathela vyũ.

9Kwa w'o tweewie ĩvinda yitũ ya kũkw'a ta ĩviku. Ĩndĩ ũu w'onthe weekĩkie nĩ kana tũikekwatye vinya witũ ene, ĩndĩ tũmwĩkwatye Ngai ũla ũthayũũkasya andũ kuma kwa akw'ũ.

10Nĩwatũvonokisye kuma mũisyonĩ ũsu mũnene wa kĩkw'ũ, na nũendeeaa na kũtũvonokya; nĩtũkwĩkwatya kana akatũvonokya o ĩngĩ,

11nenyu mũyĩendeea na kũtũtw'ĩĩka na mboya. Nĩvo ĩndĩ andũ aingĩ memũtũngĩa Ngai mũvea kwondũ witũ, kwa moathimo ala tũkwatĩte kumana na kũsũngĩwa kwa mboya sya andũ aingĩ.

12Nĩtũkwĩkathĩĩa ũndũnĩ ũũ, kana wasya witũ wa ngoo nũũtũĩkĩĩthya kana twĩkalĩte kũũ nthĩ, na mũno katĩ wenyu, twĩ na ũtheu na ũw'o kuma kwa Ngai, na ti kwondũ wa ũĩ wa kĩ-mũndũ, ĩndĩ kwondũ wa mumo wa Ngai.

13Tũiũmũandĩkĩa maũndũ angĩ eka o ala mũtonya kũsoma mũkamaelewa. Nĩ wĩkwatyo wakwa kana mũkatũelewa vyũ,

14o na kau oyu mũtũeleetwe nyusu. Nĩvo ĩndĩ Mũthenyanĩ wa kũsyoka kwa Mwĩai Yesũ mũkethĩwa mũtonya kwĩkathĩĩa naitũ, o tondũ naitũ tũkethĩwa tũtonya kwĩkathĩĩa nenyu.

15Nũndũ wa kwĩthĩwa nĩneesĩ ũu nesa, nĩnavangĩte kũmũthokea na vu mbeenĩ nĩ kana mũathimĩke kelĩ.

16Navangĩte kũmũthokea nĩendete Masendonia, na ngĩsyokela ĩngĩ kwenyu numĩte Masendonia, nĩ kana mũndetheesye nĩthi Yutia.

17Ko mũkwona ta naĩ wa kũalyũkanga ngĩvanga kĩu? Yĩla ngũvanga maũndũ makwa, ko nĩmavangaa ta mũndũ wa nthĩ ngyasya, “Ĩĩ,” na saanĩ o ũsu ngyasya, “Aiee?”

18O tondũ Ngai wĩthĩawa wa kũĩkĩĩwa, ithyĩ tũyaaĩthĩwa na makanyw'a elĩ kwenyu tũkasya, “Ĩĩ,” na saanĩ o ũsu tũyasya, “Aiee.”

19Nũndũ Yesũ Klĩsto Mwana wa Ngai ũla twatavanisye kwenyu, nyie nĩna Sila na Timotheo, ndaĩ mũndũ wa, “Ĩĩ,” “Aiee.” We saa syonthe aĩ wa, “Ĩĩ.”

20Nĩkwĩthĩwa nĩwe waĩ, “Ĩĩ” ya maũndũ onthe ala Ngai waathana. Kĩu nĩkyo kĩtumi twaasya, “Ameni,” kwĩsĩla kwake nĩ kana tũmũkumye Ngai.

21Ĩndĩ Ngai mwene nĩwe ũtũlũlũmĩĩlasya ithyĩ vamwe nenyu nthĩnĩ wa Klĩsto Yesũ, na nowe ũtũvathĩte kwondũ wa ũthũkũmi wake,

22akatwĩkĩa ũvano wake na kũtũnenga Veva Mũtheu ngoonĩ sitũ, ta ngwatĩlĩĩlyo ya kĩla tũkakwata.

23Ngai nĩ ngũsĩ, nyie natĩie kũka Kolintho nũndũ wa kwenda kũmũsũvĩa.

24Vata witũ ti kũmũsumbĩka na kũmũtavasya kĩla mwaĩlĩte kũĩkĩĩa; twĩenda kũthũkũma vamwe nenyu mwĩthĩwe mwĩ atanu, nũndũ mwĩ alũmu mũĩkĩĩonĩ.

Jump to: Chapter 2 →