2 Corinthians 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Kwoou tũitethya wĩa vamwe na Ngai, nĩtũũmwĩsũva mũiketĩkĩle mumo ũla mũkwatĩte kuma kwa Ngai wae mana.

2Nĩkwĩthĩwa Ngai nũneenete akasya: “Yĩla ĩvinda yakwa ya kũkwĩka nesa yavikie, nĩnakwĩthukĩĩisye. Na yĩla mũthenya wa kũtangĩĩwa wavikie, nĩnakũtetheeisye.” Sisya, yĩĩ nĩyo ĩvinda ya kwĩkwa nesa nĩ Ngai; ũmũnthĩ nĩw'o mũthenya wa kũtangĩĩwa.

3Tũikwenda ũthũkũmi witũ wumw'e mavĩtyo, na kwoou nĩtũtataa ũndũ vatonyeka tũikatw'ĩke kĩsiĩĩi kwa mũndũ o na wĩva.

4Ĩndĩ maũndũnĩ onthe nĩtwonanasya kwĩthĩwa twĩ athũkũmi ma Ngai kwa kũmĩĩsya maũndũ maingĩ: Thĩna, mawũmũ, monyamao,

5kũvũwa, kwovwa yela, mawĩa maito, too na nzaa.

6O ta ũu nĩtwonanasya twĩ athũkũmi ma Ngai kwa kwĩthĩwa na ũtheu wa ngoo, ũmanyi, wũmĩĩsyo, ĩnee, Veva Mũtheu, na wendo wa w'o,

7kwa kũneenaa ũla w'o na kwa vinya wa Ngai. Twĩ na ũlũngalu ta w'o mũio witũ wa kaũ wa kũkitaa na wa kwĩseseeaa naw'o.

8Nĩtũnengawe ndaĩa na ĩngĩ tũkavũthĩĩw'a; nĩtũneeneawa naĩ na ĩngĩ tũkawetwa nesa. Nĩtwosawa ta twĩ akengani, ĩndĩ tũneenaa ũw'o;

9tũkoswa ta tũtesĩkĩe ĩndĩ vai mũndũ ũtatwĩsĩ; tũkoswa ta tũũkw'a, ĩndĩ o tondũ mwene twĩ o thayũ; o na kau nĩtũvũawa mũno, tũyũaawa,

10na o na kau nĩtwĩw'ĩthaw'a woo, twĩkalaa saa syonthe twĩ atanu. Twosawa ta twĩ ngya, ĩndĩ nĩtũthuasya andũ aingĩ, na twosawa ta tũte kĩndũ, ĩndĩ twĩ na syĩndũ syonthe.

11Inyw'ĩ andũ ma Kolintho, twĩneena nenyu tũteũmũvithany'a kĩndũ; ngoonĩ sitũ ve ũthei wenyu.

12Ti ithyĩ tũtonanasya wendo witũ kwenyu, ĩndĩ nĩ inyw'ĩ mũtonanasya wendo wenyu kwitũ.

13Nayu nĩneena nenyu ta ngũneena na syana syakwa; o nenyu ĩthĩwai na ũthei witũ ngoonĩ syenyu.

14Mũikovanĩw'e ĩsokinĩ yĩmwe na andũ ala mate aĩkĩĩi. Nĩkũlya, ũseo na ũthũku syaaendany'a? Kana kyeni na kĩvindu syaavulana?

15Nĩ wĩw'ano mwaũ Klĩsto wĩthĩwa naw'o na Satani? Kana mũĩkĩĩi ethĩwa mũamba ũndũnĩ mwaũ na mũndũ ũte mũĩkĩĩi?

16Ĩkalũ ya Ngai yĩthĩwa na ngwatanĩo myaũ na ngai sya mĩvw'anano? Ithyĩ twĩ ĩkalũ ya Ngai ũla wĩ thayũ, o tondũ Ngai mwene ũneenete akasya atĩĩ, “Ngekalaa nthĩnĩ woo, na ngaendanasya namo; ngeethĩwa Ngai woo, namo makeethĩwa andũ makwa.”

17Kwoou Mwĩai nake etavya andũ make atĩĩ, “Umai katĩ woo, na ĩvathanei namo. Mũikatate kũkiita kĩndũ kĩvuku, nakwa ngamũthokya.

18Ngatw'ĩka ĩthe wenyu, nenyu mũkatw'ĩka syana syakwa sya aũme na sya eĩtu. Nĩasya ũu nyie Mwĩai Ngai Mwene Ũtonyi W'onthe.”

← Chapter 5 Jump to: Chapter 7 →