2 Timothy 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala nĩĩ nyie Vaũlo, mũtũmwa wa Klĩsto Yesũ kwendanĩ kwa Ngai, ndũmĩtwe ndavany'e ũla thayũ twathiwe, na twĩ naw'o kwĩsĩla vala ve Klĩsto Yesũ.

2Valũa ũũ wakwa nĩ kwaku we Timotheo, mwana wakwa mwendwa. Mumo, tei, na mũuo nĩsyĩthĩwe naku kuma kwa Ngai Asa, na Klĩsto Yesũ Mwĩai waitũ.

3Nĩnĩmũtũngĩaa Ngai mũvea, ũla nĩthũkũmaa nde na nzika ngoonĩ, o tondũ aaũmae makwa meekaa. Nĩmũtũngĩaa Ngai mũvea kĩla ĩvinda yĩla ngũũlilikana ũtukũ na mũthenya mboyanĩ syakwa.

4Nalilikana kũĩa kwaku, nĩngwatawa nĩ mea maingĩ ma kũkwona, nĩ kana nĩthĩwe na ũtanu mwingĩ.

5O ta ũu nĩnĩlilikanaa mũĩkĩĩo waku wa w'o, mũĩkĩĩo o ũla ũsũe waku Lũisi na inyia waku Yunisi maĩ naw'o. Nĩnĩsĩ nesa kana o na yu wĩ o na mũĩkĩĩo ũsu.

6Kwondũ wa kĩtumi kĩu nĩũlilikany'a wambĩĩe kũthũkũmĩthya mũthĩnzĩo ũla Ngai wakũnengie yĩla nakwilĩĩile moko makwa.

7Nũndũ Ngai ndatũnengete veva wa w'ĩa, ĩndĩ nĩ Veva wa ũtonyi, wendo, na wĩting'o.

8Kwoou ndũkew'e nthoni kũtavany'a ũvoo ĩũlũ wa Mwĩai waitũ, kana wĩw'e nthoni nũndũ wakwa nyie ũla novetwe yela nũndũ wa Mwĩai. Ĩndĩ ũmĩĩasya mathĩna kwondũ wa Ũvoo Mũseo, kwĩanana na ũtonyi ũla ũnengetwe nĩ Ngai.

9Nĩwatwovoisye na atwĩta twĩthĩwe andũ make, ti kwĩthĩwa ve ũndũ mũseo twĩkĩte, ĩndĩ nĩ kumana na kĩeleelo na mumo wake mwene. Atũnengie mumo ũsu kwĩsĩla kwa Klĩsto Yesũ ĩvindanĩ ya naku tene,

10ĩndĩ yu mumo ũsu nũvuanĩtw'e kwitũ kwĩsĩla kũka kwa Mũtangĩĩi waitũ Yesũ Klĩsto. We nĩwaanangie ũtonyi wa kĩkw'ũ, na kwĩsĩla Ũvoonĩ Mũseo avuany'a thayũ ũtakathela.

11Ngai nĩwanyuvie nĩthĩwe mũtũmwa na mũmanyĩsya wa kũtavany'a Ũvoo Mũseo,

12na nĩ kwondũ wa kĩtumi kĩu nĩlikĩte mathĩnanĩ aa nĩ namo. Ĩndĩ nyie ndi na w'ĩa nũndũ nĩnĩmwĩsĩ ũla nĩĩkĩĩaa, na nĩnĩsĩ vyũ kana we nũtonya kũsũvĩa kĩla wanengie nginya Mũthenyanĩ wa mũthya.

13Kwataa ũlũmĩtye momanyĩsyo ma w'o ala nakũmanyĩisye, methĩwe ngelekany'o yaku ya kũatĩĩa, na kwĩkalaa wĩ na mũĩkĩĩo na wendo ũla wĩ nthĩnĩ wa Klĩsto Yesũ.

14Maũndũ maseo ala ũnengetwe masũvĩe kwa ũtonyi wa Veva Mũtheu ũla ũtũaa nthĩnĩ waitũ.

15We nĩwĩsĩ kana andũ onthe ala me kũũ kĩsionĩ kya Asia nĩmandiĩte nĩ nyioka, Vingelũsi e o vo, o vamwe na Amongenesi.

16Mwĩai nĩew'ĩae mũsyĩ wa Onesivolasi tei, nĩkwĩthĩwa nũvuũkĩtye ngoo yakwa mavinda maingĩ, na ndaatata kwĩw'a nthoni nũndũ wakwa kwĩthĩwa nĩ mwove yela,

17ĩndĩ ĩvinda yĩla wookie Loma, nĩwamanthie na kĩthito nginya atia ambona.

18Mwĩai nĩakamwĩw'ĩa tei Mũthenyanĩ wa Ũsilĩlo. O naku we nĩwĩsĩ kana Onesivolasi nĩwathĩnĩkie mũno kwondũ wakwa kũya Eveso.

Jump to: Chapter 2 →