2 Timothy 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Ĩkalaa wĩsĩ kana kũkeethĩwa ĩvinda yũmũ mũno mĩthenyanĩ ya mũminũkĩlyo.

2Andũ makeethĩwa makĩyenda ene, me na ĩtomo ya mbesa, me na mĩkathĩĩo na me na mĩyono; makeethĩwa mayĩumangana, matekwĩw'a asyai, mate na mũvea na me avuku.

3O ta ũu makeethĩwa mate na wendo, mate tei, andũ maneeneaa ala angĩ naĩ, athe, me ngũlũ, na matendete ũseo.

4Makeethĩwa andũ ma kũthoosya ala angĩ, mate ngũlyo, na me na mĩtũlyo mingĩ; makeethĩwa mayenda maũndũ ma nthĩ ĩno vandũ va kũmwenda Ngai.

5Makoonekaa mailyĩ ta athaithi maw'o, ĩndĩ mwĩkalo woo ũyĩthĩwa ũte kwonany'a ũw'o ũsu. Ĩvathane vyũ na andũ ma mũthemba ũsu.

6Amwe moo maendaa makalika mĩsyĩnĩ ya andũ, na mayĩthĩwa na ũkũmũ ĩũlũ wa aka ala onzu maemeleelwe nĩ naĩ syoo, na matongoeaw'a nĩ mawendi mathũku ma mĩthemba yonthe.

7Aka asu nĩmatataa kwĩmanyĩsya kĩla ĩvinda, ĩndĩ maitonya kwĩsa kũvikĩa kũmanya ũla w'o.

8O tondũ Yane na Yambale mamũkananĩisye Mwose, now'o andũ aa o namo makananĩasya ũla w'o; me mosũanĩo mathũku na nĩ avalũku mũĩkĩĩonĩ.

9Ĩndĩ maikaendeea mbee wa vau, nĩkwĩthĩwa ũtumanu woo ũkooneka nĩ kĩla mũndũ, o tondũ wa andũ asu elĩ woonekie.

10Ĩndĩ we nũatĩĩe momanyĩsyo makwa, mwĩkalo, na kĩeleelo kyakwa, mũĩkĩĩo wakwa, wũmĩĩsyo wakwa, wendo wakwa, ũlũmu wakwa,

11kũthĩnw'a kwakwa, na mathĩna makwa. We nĩwĩsĩ maũndũ onthe ala meekĩkie kwakwa na kũthĩnw'a kw'onthe kũla nathĩnĩiw'e Andiokia, Ĩkoniamu na Lisitela, ĩndĩ Mwĩai nĩwambonokisye kuma mathĩnanĩ asu onthe.

12Kwa w'o mũndũ ũla ũkwenda kwĩkala thayũ mũtheu wa kũmũĩkĩĩa Klĩsto Yesũ akathĩnw'a nĩ andũ,

13namo andũ ala athũku na akengani makaendeea kũthũka na kũthũkĩĩa, maikenga andũ angĩ namo maikengwa.

14Ĩndĩ ngalĩkonĩ ĩla yaku, endeea tũ na kũkwata momanyĩsyo ala wamanyĩiw'e, na ũyĩkaa ũndũ mekwasya wĩ na mũĩkĩĩo mũlũmu. Nĩwĩsĩ ala makũmanyĩisye momanyĩsyo asu naaũ,

15na nũlilikene kana kuma wĩ mũnini nũmanyĩĩtw'e Maandĩko Matheu, ala makũnengae ũĩ wa kũmanya ũndũ ũtonya kũkwata ũtangĩĩo, kwa nzĩa ya kũmũĩkĩĩa Klĩsto Yesũ.

16Maandĩko Matheu onthe maandĩkiwe ũtongoinĩ wa Ngai, na nĩmaĩlu kwa kũmanyĩsya ũla w'o, kũkany'a andũ, kumya andũ mavĩtyonĩ, na kũmanyĩsya andũ kwĩthĩwa na mwĩkalo mwaĩlu,

17nĩ kana mũndũ ũla ũthũkũmaa Ngai ethĩwe e mwĩanĩu vyũ, na eyũmbanĩtye nesa kwĩka maũndũ onthe ala maseo.

← Chapter 2 Jump to: Chapter 4 →