2 Timothy 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Ngalĩkonĩ ĩla yaku we mwana wakwa, ĩthĩwa wĩ na vinya kwĩsĩla mumonĩ ũla wĩ nthĩnĩ wa Klĩsto Yesũ.

2Manyĩsya andũ angĩ ma kwĩkwatw'a, ala o namo matonya kũmanyĩsya andũ angĩ, momanyĩsyo ala weew'aa ngĩmanyĩsya mbee wa ngũsĩ mbingĩ.

3Ũmĩĩasya mathĩna ta wĩ mũsikalĩ mũseo wa Klĩsto Yesũ.

4Mũsikalĩ ũla wĩ kaũnĩ endaa kwendeesya mũnene wa kĩkundi kyake, na kwoou ndalikanaa na maũndũ angĩ mate ma ũsikalĩ.

5Mũthaũki wa ĩthaũ ya kũsemba ndatonya kũsemba akakwata mũthĩnzĩo, ate o aatĩĩa mĩao ya ĩthaũ yĩu.

6Mũĩmi ũla ũtethasya wĩa na kĩthito, nĩwe wĩthĩawa wa mbee vyũ kũkwata kĩlungu kya mbee kya ngetha.

7Sũanĩaa maũndũ aa ngũũtavya, nĩkwĩthĩwa Mwĩai nake akakũnengae kũmanya kĩla ũndũ w'onthe.

8Mosũanĩonĩ maku lilikanaa Yesũ Klĩsto, ũla wathayũũkie kuma kwa akw'ũ, na waĩ nzyawa ya Ndeviti kwĩanana na ũmanyĩsyo wa Ũvoo Mũseo ũla nĩtavanasya.

9Kũtavany'a kũu kwakwa kwa Ũvoo Mũseo nĩkw'o kũũtuma nĩthĩnw'a, na kwovanw'a na nyololo ta nĩ mũndũ mũthũku. Ĩndĩ ndeto ya Ngai ndyovanĩtw'e na nyololo.

10Kwoou nũmĩĩasya maũndũ onthe kwondũ wa anyuve ma Ngai, nĩ kana o namo matonye kũkwata ũtangĩĩo kuma kwa Klĩsto Yesũ, naw'o ũetae ũkumyo wa tene na tene.

11Ndeto ii nĩ sya w'o: “Ethĩwa nĩtwakwie vamwe nake, o ta ũu tũkeethĩwa thayũ vamwe nake.

12Ethĩwa tũkekala twĩ na wũmĩĩsyo, o ta ũu tũkasumbĩka vamwe nake. Ethĩwa tũkamũkaĩa we, o ta ũu o nake akatũkaĩa.

13Ethĩwa tũi aĩkĩĩku, we ekalaa e mũĩkĩĩku, nũndũ we ndatonya kwĩkaĩa mwene.”

14Ĩkalaa ũililikany'a andũ maũndũ aa. Meaĩe mbee wa Ngai maikethĩwe na ngananĩo sya ndeto, nũndũ ũndũ ũsu ndwĩ vata, na wanangaa andũ ala meũwĩthukĩĩsya.

15Tata ũndũ vatonyeka wĩtĩkĩlwe nĩ Ngai ta mũthũkũmi ũte na nthoni wĩanĩ wake, na ũmanyĩasya kwa nzĩa mbaĩlu ũmanyĩsyo ũla wa w'o wa Ngai.

16Ĩvathane na ndeto ite sya kĩkĩo kya Ngai, nĩkwĩthĩwa nitumaa andũ maendeea kwĩthĩwa vaasa na Ngai.

17Momanyĩsyo ma mũthemba ũsu mailyĩ ta kĩtau kĩnene kyenekee, kĩla kĩendeeaa na kũneneva. Andũ elĩ katĩ wa ala methĩĩtwe maimanyĩsya maũndũ ma mũthemba ũsu nĩ Aimenaũsi na Viletasi.

18Nĩmaekete kũĩkĩĩa ũla w'o, na makananga mũĩkĩĩo wa andũ amwe, kwa kũmanyĩsya kana ũthayũũkyo wa andũ kuma kwa akw'ũ nũminĩte kwĩkĩka.

19Ĩndĩ wambĩlĩĩlyo ũla Ngai weekĩie wa ĩkanisa nĩ mũlũmu na ndũthingithĩka. Naw'o wĩ na ndeto ii: “Mwĩai nũmesĩ ala make. Kwoou kĩla ũmwe waasya kana nũmũĩkĩĩaa Mwĩai, nĩaeke kwĩka maũndũ mathũku.”

20Nthĩnĩ wa nyũmba nene nĩvethĩawa na mĩio ya kũĩĩa na mĩio ĩngĩ ya kĩla mũthemba: Ĩmwe ĩseũvĩtw'e na silĩva na thaavu, ĩngĩ ĩkaseũvw'a na mĩtĩ na ĩngĩ na yũmba. Ĩmwe ĩtũmĩawa mavindanĩ ala kwĩ na syathĩ sya mwanya, ĩla ĩngĩ ĩkĩtũmĩwa mavindanĩ ala angĩ.

21Ethĩwa mũndũ o na wĩva akeevathana na maũndũ asu mavuku, akatũmĩawa ũthũkũminĩ wa mwanya, nũndũ nĩmũthesye na akanyuvwa na e vata kwa mũnene wake, na nĩwĩyũmbanĩtye kwĩka maũndũ onthe ala maseo.

22Ekana na mawendi mathũku ma mũndũ wa mũika, na kũtataa wĩthĩwe na ũlũngalu, mũĩkĩĩo, wendo na mũuo, wĩ vamwe na andũ ala angĩ mathaithaa Ngai na ngoo ntheu.

23O ta ũu tiana na ngananĩo sya mana na sya ũtumanu; we nĩwĩsĩ kana ngananĩo isu nitumaa andũ mambĩĩa kũtetany'a.

24Mũthũkũmi wa Mwĩai ndaĩlĩte kwĩthĩwa na ĩteta. Nĩwaĩlĩte kwĩthĩwa e tei kwa andũ onthe, e mũmanyĩsya mũseo, na e na wũmĩĩsyo.

25Aĩlĩte kwĩthĩwa na wĩnyivyo yĩla ũkwony'a ala mamũkananĩasya mavĩtyo moo, nũndũ nĩkũtonyeka Ngai akamony'a nzĩa makelila na kũmanya ũla w'o.

26Nĩvo ĩndĩ makavindũka na kũvonoka kuma mũteonĩ wa Satani, ũla ũmakwatĩtye naw'o na kũtuma meka kwenda kwake.

← Chapter 1 Jump to: Chapter 3 →