Acts 18

Kamba (MBIVILIA ŨVOO MŨSEO)

← Chapter 17 Jump to: Chapter 19 →

1Ĩtina wa maũndũ asu, Vaũlo nĩwaumie Athene athi Kolintho.

2Kũu nĩwakomanie na Mũyuti ũmwe weetawa Akwila, mũndũ wasyaĩtwe nthĩ ya Vondo. We na mũka wake Vilisila maĩ manaumie nthĩ ya Italĩa, ĩtina wa Mũsumbĩ Kĩlaũndiasi kwĩa Ayuti onthe nĩmaume Loma. Vaũlo nĩwaendie kũmakethya,

3na aendeea kwĩkala na kũthũkũmaa namo nũndũ aĩ mũtumi wa maeema o ta mo.

4Kĩla mũthenya wa Savato Vaũlo nĩwaneenaa na kĩthing'ĩĩsyo e nyũmbanĩ ya Ayuti ya kũthaithĩa na kũmbanĩa, amanthĩte kũalyũla Ayuti na Akiliki matw'ĩke aĩkĩĩi.

5Yĩla Sila na Timotheo mavikie Kolintho maumĩte Masendonia, Vaũlo ambĩĩe kũtũmĩa ĩvinda yake yonthe kwa kũtavany'a na kũkũsĩĩa kwa Ayuti kana Yesũ nĩwe Klĩsto.

6Ĩndĩ yĩla Ayuti asu maleanile nake na mambĩĩa kũmũumanga, nĩwamavuunzĩie ngũa syake na amea atĩĩ, “Ethĩwa nĩmũkwaa methonĩ ma Ngai, manyai nĩ vandũ venyu, nyie vai mũndũ ũndũla mũtĩ. Kuma ũmũnthĩ kũthi na mbee, ngatavanasya kwa Andũ-ma-mbaĩ-ingĩ.”

7Kwoou Vaũlo nĩwaumie vau athi nyũmba kwa mũndũ ũmwe waĩ na kĩkĩo kya Ngai weetawa Tito Yusito, ũla nyũmba yake yakwatene na nyũmba ĩsu ya Ayuti ya kũthaithĩa na kũmbanĩa.

8Kĩlisivo ũla nĩwe waĩ mũtongoi wa nyũmba ĩsu ya Ayuti ya kũthaithĩa na kũmbanĩa, nĩwatw'ĩkie mũĩkĩĩi vamwe na andũ onthe ma mũsyĩ wake. O ta ũu, Akolintho aingĩ mamwĩthukĩĩsya Vaũlo nĩmamũĩkĩĩie Mwĩai na mavatiswa.

9Mũthenya ũmwe kwĩ ũtukũ, Mwĩai nĩwaneenie na Vaũlo nthĩnĩ wa woni amwĩa atĩĩ, “Ndũkakĩe, ĩndĩ endeea na kũtavany'a ũtekũeka,

10nũndũ nyie nĩ vamwe naku. Vai mũndũ o na ũmwe wĩtata ũkũvithũkĩa kana kũkwĩka naĩ, nũndũ nthĩnĩ wa ndũa ĩno ve andũ aingĩ mũno makwa.”

11Kwoou Vaũlo nĩwekalile kũu vandũ va mwaka ũmwe na nyusu akĩmanyĩsya andũ ndeto ya Ngai.

12Ĩndĩ ĩvindanĩ yĩla Ngalio waĩ ngavana wa kĩsio kya Akaia, Ayuti nĩmoombanie mamũkwata Vaũlo mamũtwaa kotinĩ.

13Nĩmaisye atĩĩ, “Mũndũ ũũ ealyũla andũ mathaithe Ngai ũndũ mĩao ĩtekwasya.”

14Vaũlo atanamba kwathamya aneene ũndũ, Ngalio nĩwameie Ayuti asu atĩĩ, “Ĩthukĩĩsyei inyw'ĩ Ayuti! Kethĩwa mwooka vaa kũsikata mũndũ ũũ nũndũ wa ũndũ ũthũku kana ĩvĩtyo wĩkĩte, nĩthĩwa nĩ na kĩtumi kĩseo kya kũmwĩthukĩĩsya,

15ĩndĩ nũndũ wa kwĩthĩwa kĩla kĩ vaa nĩ ũvoo wa ndeto, na masyĩtwa na mĩao yenyu, inyw'ĩ ene silai kĩu. Nyie ndikwenda kwĩthĩwa mũsilany'a ũndũnĩ ũsu!”

16Nĩwamakuthũie mauma vau kotinĩ.

17Nĩvo ĩndĩ onthe mamũthyũũkĩie Sosithene, ũla waĩ mũtongoi wa nyũmba ya Ayuti ya kũthaithĩa na kũmbanĩa, na mamũvũĩa vau mbee wa koti. Ĩndĩ Ngalio ndaatĩanĩa na maũndũ asu.

18Ĩtina wa maũndũ asu, Vaũlo nĩwaendeeie kwĩkala Kolintho vandũ va mĩthenya ĩngĩ mingĩ, na ĩndĩ ataanĩsya na aĩkĩĩi alika melinĩ athi Silia e vamwe na Akwila na Vilisila. E Kengelea nĩweenziwe nũndũ wa wĩvĩto weevĩtĩte mbee wa Ngai.

19Nĩmavikie Eveso vala Vaũlo watiĩlile Vilisila na Akwila. We nĩwaendie nyũmbanĩ ya Ayuti ya kũthaithĩa na kũmbanĩa, na ambĩĩa kũneenany'a na Ayuti.

20Ayuti asu nĩmamũkũlilye Vaũlo ekalange namo, ĩndĩ alea.

21Nĩwataanĩisye namo na amea atĩĩ, “Ngooka ĩngĩ Ngai enda.” Nĩwalikile melinĩ auma Eveso.

22Avika Kaisalea nĩwambatie Yelũsalemu akakethye ĩkanisa, na ĩndĩ atheea Andiokia.

23Ĩtina wa Vaũlo kwĩkala Andiokia vandũ va ĩvinda yĩana ũndũ mũna, nĩwaumie kũu athi kũndũ na kũndũ kĩsionĩ kya Kalatia na kya Vilikia akĩlũlũmĩĩlya aĩkĩĩi.

24Ĩvindanĩ yĩu Mũyuti ũmwe weetawa Avolo wasyaĩtwe Alekisandĩlĩa nĩwavikie Eveso. Avolo aĩ mũndũ waneenaa ateũthitathita na waĩ na ũmanyi mũseo wa Maandĩko Matheu.

25Nĩwamanyĩĩtw'e mũno ĩũlũ wa ĩla Nzĩa Mwĩai woonanisye, na e na kĩthing'ĩĩsyo kingĩ, nĩwatavanasya na kũmanyĩsya nesa ĩũlũ wa Yesũ o na kau eesĩ ũtavany'a wa Yoana ĩũlũ wa ũvatiso w'oka.

26Nĩwambĩĩie kũmanyĩsya na ũkũmbaũ nyũmbanĩ ya Ayuti ya kũthaithĩa na kũmbanĩa. Yĩla Vilisila na Akwila mamwĩwie akĩneena, nĩmamũthokisye mũsyĩ kwoo na mamũelesya mbeange ĩũlũ wa ĩla Nzĩa Mwĩai woonanisye.

27Yĩla Avolo wendie kũinga athi kĩsionĩ kya Akaia, nĩmamũthangaaisye na maandĩkĩa aĩkĩĩi kũu mamũthokye. Avika kũu nĩwatetheeisye mũno andũ ala kwa mumo wa Ngai maĩ matw'ĩkĩte aĩkĩĩi,

28nũndũ nĩwavindĩthisye Ayuti ki mbee wa andũ kwa kũmony'a kwĩsĩla Maandĩko Matheu kana kwa w'o Yesũ nĩwe Klĩsto.

← Chapter 17 Jump to: Chapter 19 →