bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Acts 23
Acts 23
Kamba (MBIVILIA ŨVOO MŨSEO)
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 24 →
1
Vaũlo nĩwaketeeie andũ onthe ala maĩ nzamanĩ ĩsu na asya atĩĩ, “Mbaitũ, nyie ndwĩe nĩkalĩtye thayũ wakwa mbee wa Ngai, nĩ na wasya mũtheu wa ngoo kũka kũvika o na ũmũnthĩ.”
2
Nĩvo ĩndĩ Mũthembi Mũnene Anania wameaĩie andũ ala maũngeme vakuvĩ na Vaũlo, mamũmalĩkye ĩkovi ya mũnuka.
3
Nake Vaũlo eea Mũthembi Mũnene atĩĩ, “Ngai nake akakũmalĩkya oou, ũndũ ũkwona ũvw'ana ũkũta ũvakĩtwe langi mweũ! Ũtonya ata kwĩkala vau ũnzilĩle kwĩanana na Mĩao, na we mwene ũyamba kũtũla mĩao ĩsu kwa kwasya nĩnĩkũnwe?”
4
Andũ ala maũngeme vau nĩmamũkũlilye Vaũlo atĩĩ, “We wĩuma Mũthembi ũla Mũnene wa Ngai?”
5
Vaũlo asũngĩa asya atĩĩ, “Mbaitũ, nyie ndiũmanyaa kana ũsu nĩ Mũthembi ũla Mũnene. Maandĩko Matheu maĩtye, ‘Ndũkaaneene ũndũ mũthũku ĩũlũ wa mũnene wa andũ menyu.’ ”
6
Yĩla Vaũlo wamanyie kana andũ amwe ma nzama ĩsu nĩ Asatũkai na angĩ nĩ Avalisi, nĩwaneenie na wasya mũnene mbee wa nzama asya atĩĩ, “Mbaitũ, nyie nĩ Mũvalisi na mwana wa Mũvalisi. Atĩ nyie nĩsilĩlwa nũndũ wa kwĩkwatya kana kũkeethĩwa na ũthayũũkyo wa akw'ũ.”
7
Vaũlo amina kũneena ũu, nĩvookĩlile ngananĩo katĩ wa Avalisi na Asatũkai, na nzama ĩsu yaanĩka kũndũ kwĩlĩ.
8
Asatũkai maasya kana kũikethĩwa na ũthayũũkyo wa akw'ũ, na kũi alaĩka kana maveva. Ĩndĩ Avalisi maĩkĩĩaa kana syĩndũ isu syonthe syĩ vo.
9
Kwoou nĩkweethĩiwe na kĩlonzo kĩnene. Amanyĩsya amwe ma Mĩao ala maĩ ma nguthu ya Avalisi, nĩmaũngamie na mateta mayasya atĩĩ, “Ithyĩ tũikwona ũthũku wa mũndũ ũũ! Nokwĩthĩwa ve veva kana mũlaĩka ũneenie nake!”
10
Yĩla ngananĩo isu syongelekile weethĩa syatw'ĩka ta kaũ, ũla mũnene wa asikalĩ ngili nĩwakwatiwe nĩ w'ĩa ayona andũ asu ta matonya kũkusanĩsya Vaũlo makamwatũany'a, na kwoou eeaĩa asikalĩ mathee kũu makamũvenane kuma vala maĩ, mamũtũnge ũla mwakonĩ mũlũmu.
11
Ũtukũ ũsu Mwĩai nĩwaũngamie vakuvĩ na Vaũlo amwĩa atĩĩ, “Ndũkethĩwe na w'ĩa! O ũndũ ũnakũsĩĩie ĩũlũ wakwa vaa Yelũsalemu, no nginya ũkakũsĩĩe ĩũlũ wakwa Loma o nakw'o.”
12
Ũnĩ ũsu Ayuti nĩmaseũvisye mũvango kwa kwĩvĩta kana maiya kana kũnyw'a kĩndũ nginya moae Vaũlo.
13
Ayuti ala meevĩtie ũu maĩ mbee wa mĩongo ĩna.
14
Nĩmaendie kwa athembi anene na atumĩa na mamea atĩĩ, “Nĩtweevĩta vyũ kana tũiya kĩndũ nginya tũae Vaũlo.
15
Kwoou inyw'ĩ vamwe na nzama, tũmanai kwa mũnene wa asikalĩ ma Loma aete Vaũlo mbee wenyu, mwĩtw'ĩkĩthĩtye mwĩenda kũmanya nesa ĩũlũ wa kĩla ũsikatĩwe. Ithyĩ nĩtwĩyũmbanĩtye kũmũaa atanamba kũthengeea vala mũĩ.”
16
Mwanake wa mwĩĩtu-a-inyia wa Vaũlo nĩweewie mũvango ũsu wa kwenda kũmũaa Vaũlo, na athi ũla mwakonĩ mũlũmu amũtavya Vaũlo.
17
Vaũlo nĩweetie mũnene ũmwe wa asikalĩ ĩana amwĩa atĩĩ, “Osa mwanake ũũ ũmũtwae kwa mũnene wa asikalĩ ngili, e na ũndũ ũkwenda kũmũtavya.”
18
Mũnene ũsu wa asikalĩ ĩana nĩwoosie mwanake ũsu amũtwaa kwa mũnene wa asikalĩ ngili, na eea mũnene ũsu atĩĩ, “Ũla mwovwa wĩtawa Vaũlo ambĩta angũlya nĩete mwanake ũũ vala ũĩ, nũndũ e na ũndũ ũkwenda ũkũtavya.”
19
Mũnene ũsu wa asikalĩ ngili nĩwakwatie mwanake ũsu kw'oko, mathi vandũ ũtee me oka na amũkũlya atĩĩ, “Wĩenda kũmbĩa ata?”
20
Mwanake ũsu nĩwamwĩie atĩĩ, “Atongoi ma Ayuti meew'ana makũkũlye ũtheesye Vaũlo nzamanĩ ũnĩ, metw'ĩkĩthĩtye meenda kũmanya nesa kĩla ũsikatĩwe.
21
Ndũkatate kũmethukĩĩsya nũndũ ve andũ mbee wa mĩongo ĩna makethĩwa mevithĩte vandũ mamwoveesye. Andũ asu mevĩtĩte maikaye kana kũnyw'a kĩndũ nginya mamũae, na oyu tũĩ mo nĩmeyũmbanĩtye meteelete ũtw'ĩo waku.”
22
Mũnene ũsu wa asikalĩ ngili amwĩa atĩĩ, “Ndũkatate kũtavya mũndũ kana nĩwandavya ũvoo ũsu.”
23
Nĩvo ĩndĩ ũla mũnene wa asikalĩ ma Loma weetie anene elĩ ma asikalĩ ĩana na amea atĩĩ, “Ũmbany'ai asikalĩ maana elĩ vamwe na angĩ mĩongo mũonza ma ala maendaa na mbalasi, na angĩ maana elĩ ma ala mokitaa na matumo mathi Kaisalea. Ĩyũmbany'ei mume vaa saa itatũ sya ũtukũ.
24
O ta ũu ũmbany'ai mbalasi syiana ũndũ mũna kwondũ wa Vaũlo, na mũimũtwaa mũmũsũvĩĩte avike nesa kwa Velisi, ũla ngavana.”
25
Nĩvo ĩndĩ mũnene ũsu wa asikalĩ ma Loma waandĩkie valũa ũkwasya ũũ:
26
“Nyie Kĩlaũndiasi Lisiasi, nĩkũandĩkĩa we Mũkumye ngavana Velisi, na mbee nĩ ngethi.
27
Mũndũ ũsu anakwatiwe nĩ Ayuti na anaĩ vakuvĩ kũawa nĩmo, ĩndĩ nathi vo nĩ na asikalĩ twamũtaany'a ĩtina wa kũmanya kana nĩ Mũlomi.
28
Nĩnendie kũmanya mamũsikatĩe kyaũ, na kwoou namũtwaa mbee wa nzama yoo.
29
Nĩneethĩie asikatĩwe maũndũ makonetye mĩao yoo, ĩndĩ vai ũndũ ĩũlũ wake ũnaĩ ũtuma atw'ĩĩwa kũawa kana kwovwa.
30
Yĩla natavw'a kana ve mũvango ũseũvĩtw'e oawe, navanga kũmũete kwaku mĩtũkĩ ũndũ vatonyeka, na o ta ũu neea ala mamũsikatĩte moke maneene mbee waku kĩla mamũsikatĩe.”
31
Kwoou asikalĩ maatĩĩe ũndũ meeaĩwa, nĩmoosie Vaũlo na mamũtwaa na ũtukũ nginya Andivatili.
32
Ũnĩ ũsu, asikalĩ ala maendete na maũũ, nĩmasyokie ũla mwakonĩ mũlũmu matia asikalĩ ala maendete na mbalasi maendee na kyalo me na Vaũlo.
33
Mavika Kaisalea nĩmanengie ngavana ũla valũa, na masyoka manengane Vaũlo kũla ũĩ.
34
Ngavana ũsu nĩwasomie valũa ũsu na akũlya Vaũlo kĩsio kĩla wumĩte. Yĩla wataviw'e kana aumĩte kĩsionĩ kya Silisia,
35
ngavana nĩwaisye atĩĩ, “Ngeethukĩĩsya ĩkoani yaku andũ ala makũsikatĩte mavika.” Nĩvo ĩndĩ waumisye mwĩao Vaũlo asungwe e nyũmbanĩ nene ĩla yaakiwe nĩ Elote.
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 24 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28