Acts 26

Kamba (MBIVILIA ŨVOO MŨSEO)

← Chapter 25 Jump to: Chapter 27 →

1Mũsumbĩ Akiliva nĩweeie Vaũlo atĩĩ, “Wĩna mwanya wa kwĩneenea yu.” Vaũlo nĩwatambũũkisye kw'oko kwake na eetetea ayasya:

2“Mũsumbĩ Akiliva, nĩngwĩw'a mũyo mũno nũndũ wa mwanya ũu nakwata nĩtetee nĩ mbee waku, ĩũlũ wa maũndũ onthe ala Ayuti manzikatĩe,

3nũndũ we nĩwĩsĩ nesa syĩthĩo syonthe sya Ayuti, na syĩndũ ila methĩawa na ngusanĩsyo ĩũlũ wasyo. Kwoou nĩngũkwĩsũva ũmbĩthukĩĩsye na wũmĩĩsyo.

4“Ayuti onthe nĩmesĩ ũndũ nĩkalĩte kuma nĩ mũnini, kuma mwambĩlĩĩlyo wa thayũ wakwa nĩ andũnĩ makwa na nĩ Yelũsalemu.

5Nĩmambĩsĩ mũno kuma tene, kana ndwĩe nĩ ũmwe wa kĩkundi kitũ kya ũthaithi kĩla kĩatĩĩaa maũndũ ma ũthaithi witũ mũno kũvĩtũka ila ingĩ, nakyo nĩ kya Avalisi. Mo kethĩwa nĩmaweta, no makũsĩĩe ũu.

6Yu nĩũngeme vaa nĩsilĩlwe nũndũ wa kwĩthĩwa na wĩkwatyo wathonĩ wathaniwe nĩ Ngai kwa aaũmae maitũ.

7Watho o ũsu now'o mbaĩ sitũ ĩkũmi na ilĩ syĩkwatasya kũũvikĩa, iimũthaitha Ngai na kĩthito ũtukũ na mũthenya. Atĩ nĩ kwondũ wa wĩkwatyo ũsu, we mũsumbĩ, nĩsikatĩtwe nĩ Ayuti!

8Nĩkĩ inyw'ĩ mwĩw'aa ve vinya kwĩtĩkĩla kana Ngai nũthayũũkasya andũ kuma kwa akw'ũ?

9“Nyie mwene nĩnaĩkĩĩaa kana nĩnaĩlĩte kwĩka w'onthe ũla ndonya, nĩleane na ĩsyĩtwa ya Yesũ kuma Nasaleti.

10Ũu nĩnawĩkie kũya Yelũsalemu. Nĩnavingĩie aĩkĩĩi aingĩ yela numĩtye ũkũmũ kwa athembi anene, na o na eka ũu, yĩla matw'ĩka nĩmoawe, nĩnakũnaa kula ya kwĩtĩkĩlana na ũndũ ũsu.

11Mavinda maingĩ nĩnamavũĩaa nyũmbanĩ sya Ayuti sya kũthaithĩa na kũmbanĩa, ngyenda kũmalasimĩthya malee mũĩkĩĩo woo. Nĩkwĩthĩwa nĩnamathatĩe mũno, nĩnaendaa kũmathĩnĩsya o na ndũanĩ sya nthĩ ingĩ.

12“Kwondũ wa kĩtumi kĩu, nĩnakwatie nzĩa nĩthi Ndamasikũ nĩnengetwe ũkũmũ na mwĩao nĩ athembi anene.

13Nayu mũsumbĩ, vaa saa sita sya mũthenya nĩ nzĩanĩ nĩnoonie kyeni kuma ĩtunĩ, kĩtisu mũno kũte syũa kĩmulĩkĩte ngalĩko syonthe vala naĩ na ala maendanĩtye nakwa.

14Ithyonthe nĩtwavalũkile nthĩ, na neew'a wasya kwa kĩthyomo kya Kĩevelania ũimbĩa atĩĩ, ‘Saũlo, Saũlo! Nĩkĩ ũũnthĩny'a? Wĩĩka o kwĩyĩũmĩsya ta nzaũ ĩitheela mũthya mũĩ wa mũtĩ wa ũla ũmĩingĩte.’

15Nakwa nakũlya, ‘Nue ũũ Mwĩai?’ Nake Mwĩai ambĩa, ‘Ninyie Yesũ ũla we ũũthĩny'a.

16Ĩndĩ ũkĩla ũũngame; nakumĩlĩĩla nũndũ wa kĩtumi kĩĩ: Ngũnyuve nĩ kana ũnthũkũme, na kũtavya andũ maũndũ makwa ala woona na ala ngakwony'a ĩvindanĩ yũkĩte.

17Ũkatavany'a maũndũ asu kwa andũ ma mbaĩ yaku, na kwa Andũ-ma-mbaĩ-ingĩ ala ngũũtũma kwoo.

18Nĩkũtũma kwoo ũkamavingũe metho maume kĩvindunĩ malike kyeninĩ, na mayuma vinyanĩ wa Satani moke kwa Ngai, nĩ kana maekewe naĩ syoo na maikwata mwanya katĩ wa andũ ala matw'ĩtwe atheu, kwa kwĩthĩwa na mũĩkĩĩo nthĩnĩ wakwa.’

19“Kwoou Mũsumbĩ Akiliva, nyie ndyaaleana na woni ũsu waumie ĩtunĩ.

20Nĩnambĩĩie kũtavany'a mbee kwa andũ ma Ndamasikũ, ma Yelũsalemu, na nthĩ yonthe ya Yutia, na ĩndĩ kwa Andũ-ma-mbaĩ-ingĩ o namo. Nĩnakũlasya andũ melile kwondũ wa naĩ syoo na maimũsyokea Ngai, na kwonany'a kwa meko kana nĩmelilĩte w'o kwondũ wa naĩ syoo.

21Kĩu nĩkyo kĩtumi Ayuti manangwatĩie Ĩkalũnĩ na menda kũmbũaa.

22Ĩndĩ kũka kũvika ũmũnthĩ nĩnĩtethetw'e nĩ Ngai, na kwoou nĩũngeme vaa ngyumya ũkũsĩ kwenyu inyw'onthe andũ anene na anini vamwe. Kĩla ngũneena no kĩla athani na Mwose maisye kĩkekĩka,

23kana Klĩsto ndatĩa kũthĩnw'a, na nũndũ akeethĩwa wa mbee kũthayũũka kuma kwa akw'ũ, akatavany'a kyeni kya ũtangĩĩo kwa andũ ma mbaĩ yaitũ na kwa Andũ-ma-mbaĩ-ingĩ.”

24Vaũlo aendee na kwĩtetea, Vesitasi nĩwaneenie na wasya mũnene amwĩa atĩĩ, “We Vaũlo wĩ na ndũũka! Kĩsomo kyaku kingĩ nĩkĩũkwatĩtye ndũũka.”

25Ĩndĩ Vaũlo amũsũngĩa amwĩa, “Nyie ndi na ndũũka, mũkumye Vesitasi, kĩla ngũneena nĩ kya w'o na nĩneena nĩ na kĩlĩko kĩseo.

26We mũsumbĩ nĩwĩsĩ maũndũ aa onthe, na nyie nĩneena naku ndeũkũvitha kĩndũ nũndũ nĩnĩsĩ nesa kana vai ũmwe wamo ũtesĩ, nĩkwĩthĩwa mayeekĩawa vandũ ũtee mavithĩtwe.

27“We Mũsumbĩ Akiliva nũĩkĩaa Athani? Nĩnĩsĩ nũmaĩkĩĩaa.”

28Akiliva nĩwakũlilye Vaũlo atĩĩ, “Wĩona ĩtina wa ĩvinda yĩkuvĩvĩte ũu ta ũtonya kũngalyũla ngatw'ĩka Mũklĩsto?”

29Vaũlo amũsũngĩa amwĩa atĩĩ, “Ĩvinda yĩ ĩkuvĩ kana yĩ o yĩasa, nĩvoya Ngai nĩ kana o na eka we, andũ onthe ala mambĩthukĩĩsye ũmũnthĩ methĩwe mailyĩ takwa, eka kwovwa kũũ novetwe na nyololo.”

30Nĩvo ĩndĩ mũsumbĩ wookĩlile vamwe na ngavana na Mbanisi, na andũ ala mailyĩ namo,

31na mamina kuma vau meeana mo ene, “Mũndũ ũũ nde ũndũ wĩkĩte ũtuma atw'ĩĩwa kũawa kana kwovwa yela.”

32Kwoou Mũsumbĩ Akiliva nĩweeie Vesitasi atĩĩ, “Mũndũ ũũ kethĩwa ndeekũlĩtye ĩkoani yake yĩkethukĩĩw'e nĩ mũsumbĩ wa Loma, ethĩwa athaw'a.”

← Chapter 25 Jump to: Chapter 27 →

Recommended Reading

Commentary Acts Commentaries → Devotional Acts Devotional Guide → Get This Bible Kamba (MBIVILIA ŨVOO MŨSEO) Study Bible →