Colossians 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala nĩĩ nyie Vaũlo mũtũmwa wa Yesũ Klĩsto kwa mũvango wa Ngai, na kuma kwa mwana-a-asa waitũ Timotheo.

2Valũa ũũ witũ nĩ kwenyu inyw'ĩ aĩkĩĩi ala mwĩ Kolosai, ala mwĩ ma kwĩkwatw'a nthĩnĩ wa Klĩsto Yesũ. Mumo na mũuo nĩsyĩthĩwe nenyu kuma kwa Ngai Asa waitũ.

3Ĩvinda yonthe nĩtũtũngaa mũvea kwa Ngai, Ĩthe wa Mwĩai waitũ Yesũ Klĩsto, yĩla tũũmũvoyea.

4Nũndũ nĩtwĩw'ĩte ĩũlũ wa mũĩkĩĩo wenyu nthĩnĩ wa Klĩsto Yesũ, na ĩũlũ wa wendo wenyu kwa aĩkĩĩi ala angĩ onthe.

5Mũĩkĩĩo na wendo wenyu syumanĩte na wĩkwatyo ũla wumaa ĩtunĩ. Naw'o wĩkwatyo ũsu mweethĩiwe naw'o yĩla mweewie ũtũmani ũla wa w'o wa Ũvoo Mũseo

6ũla mwataviw'e. Ũvoo Mũseo ũsu nũendee kwĩthĩwa na ũsyao, na kũnyaĩĩka kĩla vandũ ĩũlũ wa nthĩ, o tondũ wĩkĩte katĩ wenyu kuma mũthenya ũla mwawĩwie na mwaelewa nĩ ũndũ mumo wa Ngai ũilyĩ.

7Mweemanyĩisye ĩũlũ wa mumo ũsu wa Ngai kuma kwa Evavulasi, nake nĩ mũthũkũmi twendete ũthũkũmaa ĩmwe naitũ, na nĩ mũthũkũmi wa kwĩkwatw'a wa Klĩsto, ũla ũmũthũkũmaa inyw'ĩ vandũ vaitũ.

8O ta ũu nũtũtavĩtye ĩũlũ wa wendo ũla Veva Mũtheu ũmũnengete.

9Kwa kĩtumi kĩu kuma yĩla tweewie Ũvoo ũsu, twĩthĩĩtwe tũimũvoyea mavinda onthe. Tũvoyaa Ngai amũnenge kũmanya kwenda kwake, kwa nzĩa ya kũnengwa ũĩ na ũmanyi ila inenganawe nĩ Veva Mũtheu.

10Nĩvo ĩndĩ mwĩĩthĩwa mũtonya kwĩkala mwĩkalo waĩlĩte na wa kũmwendeesya Mwĩai. Mwĩkalo wenyu ũkeethĩwa na meko maseo ma kĩla mũthemba, na mũkaendeea kũmũmanya Ngai mbee na mbee.

11Ĩthĩwai na vinya kuma ũtonyinĩ mũnene wa Ngai, nĩ kana mwĩthĩwe mwĩ alũmu mũĩkĩĩonĩ, na mwĩ na wũmĩĩsyo na kwĩthĩawa na ũtanu,

12mũkĩmũtũngĩa mũvea Ngai Ĩthe waitũ, ũla ũmũnengete kwĩthĩwa amwe katĩ wa aĩkĩĩi, ala nĩmo meĩthĩwa na ũtiĩwa wa ũsumbĩ wa kyeni.

13Nĩkwĩthĩwa nũtũvonoketye kuma ũsumbĩnĩ wa kĩvindu kya ũthũku, na akatũlikya ũsumbĩnĩ wa Mwana wake mwendwa,

14ũla kwake nĩtũkwatĩte ũtangĩĩo, naw'o nĩ ũekeo wa naĩ.

15Klĩsto nĩwe mũvw'ano wa ũndũ Ngai ũla ũtonekaa na metho ũilyĩ; nĩwe waĩ Mwana wa mbee wa Ĩthe wake, na aĩ vo mbee wa syĩndũ itanamba kũmbwa.

16Nũndũ kwĩsĩla kwake Ngai nĩwoombie syĩndũ syonthe ila syĩ ĩtunĩ na ila syĩ kũũ nthĩ; syonekaa na itonekaa, o vamwe na ivĩla sya kĩ-ũsumbĩ kũũ nthĩ vamwe na ala masyĩkalĩlaa, mokũmũ na motonyi. Nĩwe woombie syĩndũ syonthe syĩthĩawe ungu wa ũkũmũ wake.

17We aĩ kw'o mbee wa syĩndũ syonthe, na nĩwe ũtumaa kĩla kĩndũ kĩkala vandũnĩ vakyo.

18We nĩ mũtwe wa ĩkanisa yĩla nĩ mwĩĩ wake; aĩ kw'o mwambĩlĩĩlyonĩ na nĩwe wa mbee kũthayũũka kuma kwa akw'ũ, nĩ kana ethĩwe na ũkũmũ ĩũlũ wa syĩndũ syonthe.

19Nũndũ Ngai nĩwendeeiw'e nĩ kana we ethĩwe ailyĩ take vyũ maũndũnĩ onthe ma kĩ-ũngai.

20Kwĩsĩla kĩkw'ũnĩ kya Mwana wake, Ngai nũetete mũuo andũnĩ kwa kũmew'anĩthya nake mwene, ala me ĩtunĩ na angĩ me kũũ nthĩ.

21Navu mbeenĩ mwaĩ vaasa na Ngai, nũndũ wa mosũanĩo na meko menyu mathũku.

22Ĩndĩ yu Ngai nũmwĩw'ĩthanĩtye nake mwene kwĩsĩla mathĩnanĩ na kĩkw'ũnĩ kya Mwana wake, nĩ kana amũthesye mwĩthĩwe mwĩ atheu mathayũnĩ menyu, mũtaweteka ũndũ mũthũku na mũte na mavĩtyo mbee wa Ngai.

23Ĩndĩ no nginya nenyu mũkaendeeaa kwĩkala mwĩ alũmu na mwĩ na vinya mũĩkĩĩonĩ ũla wa w'o, na mũikaeke kwĩthĩwa na wĩkwatyo ũla mwakwatie yĩla mweewie Ũvoo Mũseo. Ũvoo Mũseo ũũ nĩw'o ũtavanaw'a kĩla vandũ ĩũlũ wa nthĩ, na nĩw'o nyie Vaũlo natw'ĩkie mũthũkũmi waw'o.

24Kwoou nĩ na ũtanu kwondũ wa kũthĩna kwakwa nũndũ wenyu, nĩkwĩthĩwa kwĩsĩla mathĩnanĩ makwa ta mũndũ kũũ ĩũlũ wa nthĩ, nĩendeeaa na kũmina kĩla kĩtiele mathĩnanĩ ma Klĩsto, ala matialĩte kwondũ wa mwĩĩ wake, nayo nĩ ĩkanisa.

25Natw'ĩkie mũthũkũmi wa ĩkanisa kwĩanana na mũvango wa Ngai nĩ kana nĩmũtetheesye, kwa kũtavany'a ũtũmani w'onthe wa ndeto yake.

26Ũũ nĩ mũvango wa Ngai wa kĩmbithĩ kĩnene, ũla ũtwĩe aũvithanĩtye kwa andũ onthe vandũ va ĩvinda ĩasa, ĩndĩ yu nũmavuanĩsye aĩkĩĩi.

27Mũvango wake waĩ amavuanĩsye Andũ-ma-mbaĩ-ingĩ mothwii ma ũkumyo ũla wĩ nthĩnĩ wa kĩmbithĩ kĩu. Kĩmbithĩ kĩu nĩ kana Klĩsto atwĩe nthĩnĩ wenyu, nake nĩwe ũmũnengae wĩkwatyo wa kũnengwa ũkumyo nĩ Ngai.

28Kwoou ithyĩ tũtavasya kĩla mũndũ ũvoo ĩũlũ wa Klĩsto ũsu, tũitũmĩa ũĩ witũ w'onthe tũkany'e andũ onthe na kũmamanyĩsya, nĩ kana methĩwe me andũ aima mwĩkalonĩ woo ta Aklĩsto.

29Kĩu nĩkĩtumaa nĩtethya wĩa mũito ndekũnoa, na kũtũmĩa vinya mũnene ũla Klĩsto ũnengae.

Jump to: Chapter 2 →