Colossians 4

Kamba (MBIVILIA ŨVOO MŨSEO)

← Chapter 3 Jump to:

1Anene ĩkalanasyai na athũkũmi menyu kwa nzĩa ĩla yaĩlĩte na yaw'o, nũndũ nĩmwĩsĩ kana o nenyu mwĩ na Mũnene wĩ ĩtunĩ.

2Ĩkalaai mboyanĩ na kũtũngĩaa Ngai mũvea yĩla mũũvoya.

3O ta ũu tũvoyeaei o naitũ, nĩ kana Ngai atũvingũĩe nzĩa sya kũtavany'a ndeto yake ĩũlũ wa kĩmbithĩ kya Klĩsto. Kũtavany'a ndeto ĩsu nĩkw'o kũtumĩte novwa yela.

4O ta ũu mboyeaei nĩ kana nĩmĩtavanasye ĩkĩeleeka, o tondũ naĩlĩte kwĩka.

5Ĩthĩawai mwĩ oĩ mũyĩkalany'a na ala mate aĩkĩĩi, na kũtũmĩaa kamwanya kau mwĩ nako nesa.

6Yĩla mũũneena ndeto syenyu syĩthĩawe syĩ nzeo na sya kwendeesya mavinda onthe, na kũsũngĩaa kĩla ũmwe na ndeto ila syaĩlĩte.

7Mwana-a-asa waitũ mwendwa Tikikasi, ũla nĩ mũthũkũmi wa kwĩkwatw'a tũthũkũmaa vamwe nake wĩa wa Mwĩai, nũkũmũtavya maũndũ onthe ĩũlũ wakwa.

8Nĩmũtũmie kwenyu nĩ kana amũtavye ũndũ tũendee na akĩmũthangaasya mũĩkĩĩonĩ.

9Akookany'a na mwana-a-asa waitũ mwendwa na wa kwĩkwatw'a Onesimasi, ũla nĩ ũmwe wenyu. Me elĩ makamũtavya maũndũ onthe ala maendee kũũ.

10Alisitaliko ũla twovetwe ĩmwe nĩwamũkethya; o ta ũu nĩmwakethw'a nĩ Maliko, mwana-a-asa wa Valanava. (Inyw'ĩ nĩmwĩaĩwe kũmũthokya ethĩwa akooka kwenyu.)

11Yesũ, ũla wĩtawa kwa ĩsyĩtwa yĩngĩ Yasitasi, o nake nĩwamũkethya. Andũ aa me atatũ nomo Ayuti ala maĩkĩĩaa Klĩsto, na matetheanĩasya wĩa nakwa wa ũsumbĩ wa Ngai, na nĩmethĩĩtwe me ũtethyo mũnene kwakwa.

12Evavilasi, ũla nĩ ũmwe wenyu na mũthũkũmi wa Klĩsto Yesũ nĩwamũkethya. Mavinda onthe nũmũvoyeaa na kĩthing'ĩĩsyo kwa Ngai, nĩ kana mwĩthĩwe mwĩ alũmu mũĩkĩĩonĩ, mũte na nzika o na vanini ĩũlũ wa kwĩka kwenda kwa Ngai.

13Nyie nĩ na ũkũsĩ mwĩanĩu kana Evavilasi nũtethetye wĩa na kĩthito kwondũ wenyu, na kwondũ wa aĩkĩĩi ala angĩ ma Laondisia na ma Ielavolisi.

14Lũka, ũla ndakĩtalĩ waitũ mwendwa me na Ndema, nĩmamũkethya.

15Ngethesyei aĩkĩĩi ma Laondisia na mũingethesya Niva, vamwe na aĩkĩĩi ala mombanĩaa nyũmba kwake.

16Mwamina kũsomewa valũa ũũ, ũtwaei ũkasomwe o ta ũu ĩkanisanĩ ya Laondisia. Nenyu manthai ũndũ mũtonya kũsoma valũa ũla wĩ na aĩkĩĩi ma Laondisia.

17Mwĩei Akivasi nĩatate mũno aminũkĩlye ũthũkũmi ũla ũnengetwe nĩ Mwĩai.

18Ninyie Vaũlo mwene ngũandĩka ngethi ĩno na kw'oko kwakwa: Kethekai. Lilikanai kana nĩnovetwe yela! Mumo wa Ngai nĩwĩthĩwe nenyu.

← Chapter 3 Jump to: