Colossians 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Nĩmwathayũũkiw'e vamwe na Klĩsto, na kwoou manthaai maũndũ ala me ĩtunĩ, vala nĩvo Klĩsto ũĩ, ailyĩ nthĩ ngalĩko ya kw'oko kwa aũme kwa Ngai.

2Sũanĩaai ĩũlũ wa maũndũ asu ma ĩtunĩ, na ti ala ma kũũ nthĩ.

3Nĩkwĩthĩwa inyw'ĩ nĩmwakwie, na thayũ wenyu yu ũvithĩtwe vamwe na Klĩsto nthĩnĩ wa Ngai.

4Thayũ wenyu ũla wa w'o nĩ Klĩsto, na yĩla wĩumĩla ĩngĩ, nĩvo ĩndĩ inyw'ĩ o nenyu mwĩumĩla mwĩ nake nthĩnĩ wa ũkumyo wake!

5Kwoou ĩndĩ no nginya mwanange vyũ mawendi ma nthĩ ala me nthĩnĩ wenyu namo nĩ: Mwĩkalo mũthũku wa ũlaalai, ũvuku, mĩmeo mĩthũku, mawendi mathũku na ĩtomo; nĩkwĩthĩwa ĩtomo nĩ mũthemba wa kũthaitha mĩvw'anano.

6Nũndũ wa maũndũ asu, ũthatu wa Ngai nĩwũkaa ĩũlũ wa andũ ala matamwĩw'aa.

7Ve ĩvinda yĩmwe inyw'ĩ mwekalaa mũtongoew'e nĩ mawendi asu, ĩvinda yĩla mamũsumbĩkĩte.

8Ĩndĩ yu no nginya mũekane na maũndũ aa onthe: Mĩthato, kwĩw'anĩa woo, kũmenana, kũumangana na kũneenanĩa naĩ.

9Mũikakengane inyw'ĩ kwa inyw'ĩ, nĩkwĩthĩwa nĩmumĩtye wũmbo wa tene na mĩkĩle yaw'o,

10na mũkekĩa wũmbo mweũ. Wũmbo ũũ mweũ nĩw'o ũla Ngai, Mũmbi waw'o, ũendeeaa na kũwũmba ĩngĩ na ĩngĩ mũvw'anane nake, nĩ kana mũvikĩe kũmũmanya vyũ.

11Ũndũnĩ ũsu vai kũvathũkany'a Mũkiliki na Mũyuti, mũndũ mwaĩke na ũte mwaĩke; mũndũ wĩ na ũmanyi na ũte na ũmanyi, ngombo na mũndũ ũte ngombo. Ĩndĩ Klĩsto nĩwe kĩla kĩndũ na e nthĩnĩ wa onthe.

12Nayu ta mwĩ andũ anyuve ma Ngai atheu na ũmwendete, ĩthĩwai mwĩ na ngoo yĩ ĩnee, tei, wĩnyivyo na wũmĩĩsyo.

13Ũmĩanĩasyaai ũmwe kwa ũla ũngĩ, na kũekeanĩaa yĩla ũmwe wenyu weethĩwa na ũndũ na ũngĩ. Ekeanĩaai o ũndũ Mwĩai wamũekeie.

14Ĩũlũ wa maũndũ asu onthe, ĩthĩwai na wendo, ũla nĩw'o ũtũngĩanĩaa syĩndũ isu syonthe ikatw'ĩka kĩndũ kĩmwe kĩthĩanu.

15Mũuo wa Klĩsto nũsumbĩke ngoonĩ syenyu, nĩkwĩthĩwa Ngai amwĩtie mũtw'ĩke mwĩĩ ũmwe, nĩ kana mwĩkalae na mũuo. O ta ũu tũngĩaai Ngai mũvea.

16Ũvoo wa Klĩsto vamwe na ũthwii wa w'o syĩkalae nthĩnĩ wenyu. Tũmĩaai ũĩ wenyu w'onthe kũmanyĩany'a na kũtaana. O ta ũu mwĩ na mũvea ngoonĩ syenyu mũkumasyei Ngai na Savulĩ, na mbathi kuma Maandĩkonĩ Matheu, mbathi sya kũmũtaĩa Ngai, na mbathi sya veva.

17Ũndũ w'onthe ũla mũkwĩka kana kũneena, wĩkaei ĩsyĩtwanĩ ya Mwĩai Yesũ, na kũtũngĩaa Ngai Asa mũvea kwĩsĩla kwake.

18Iveti ĩnyivĩsyei aũme menyu, nũndũ ũu nĩw'o mwaĩlĩte kwĩka ta mwĩ Aklĩsto.

19Aũme endai iveti syenyu na mũikasyĩw'ĩthye woo.

20Syana mew'ei asyai menyu mavinda onthe, nĩkwĩthĩwa ũu nĩw'o ũmwendeeasya Mwĩai.

21Asyai mũikathatye syana syenyu iikakw'e ngoo.

22Athũkũmi ĩthĩawai mwĩ ewi kwa anene menyu ma kũũ nthĩ kĩla ũndũnĩ, na tyo yĩla mamũsyaĩĩsye mũyenda kwĩyendeesya kũla maĩ, ĩndĩ thũkũmaai na ngoo nthalĩku mũimũkĩa Mwĩai.

23Ũndũ o na wĩva ũla mũkwĩka, wĩkaei na ngoo ya kwenda ta mũũthũkũma Mwĩai mwene na ti mũndũ.

24Lilikanai kana Mwĩai akamũnenga mũthĩnzĩo ũla ũmathĩte aĩkĩĩi make, nĩkwĩthĩwa Klĩsto nĩwe Mũnene wenyu ũla inyw'ĩ mũthũkũmaa.

25Namo andũ ala mekaa mothũku makaĩvwa kwĩanana na ũthũku ũla mekaa, nĩkwĩthĩwa Ngai asilĩlaa andũ ate na wendeesyo.

← Chapter 2 Jump to: Chapter 4 →