Colossians 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Nĩenda mũmanye ũndũ nĩmũthĩnĩkĩaa mũno wĩana vamwe na aĩkĩĩi ma Laondisia, na ala angĩ onthe mataambona.

2Kĩeleelo kyakwa nĩ kũmathangaasya nĩ kana methĩwe makwatanĩtw'e nĩ wendo, na mayĩthĩwa na ũthwii wa kĩlĩko kya kũmanya kĩmbithĩ kya Ngai nakyo nĩ Klĩsto mwene.

3Klĩsto nĩwe wĩ na ũĩ na ũmanyi w'onthe ũla wumaa kwa Ngai.

4Nĩmũtavya ũu nĩ kana mũiketĩkĩle kũkengwa nĩ mũndũ o na wĩva na ndeto syĩ mũyo sya mana.

5Nĩkwĩthĩwa o na kau nyie nĩ vaasa nenyu, nĩ vamwe nenyu kĩ-veva, ngĩtana nũndũ wa kwona mwĩkalo wenyu mũseo, na ũlũmu wenyu wa kũmũĩkĩĩa Klĩsto.

6Kwoou nũndũ nĩmwamwosie Klĩsto Yesũ ethĩwe Mwĩai wenyu, ĩkalaai mũimũĩkĩĩa.

7Ĩthĩwai mwĩ alũmu nthĩnĩ wake, na mwĩ na vinya mũĩkĩĩonĩ wenyu, kwĩanana na ũndũ mũmanyĩĩtw'e na kũtũngĩaa Ngai mũvea kĩla ĩvinda.

8Ĩsũvĩei ĩndĩ mũndũ o na wĩva ndakamũkwatye na ũĩ wa kĩ-mũndũ wa ũkengani, ũla wumanĩte na momanyĩsyo ma syĩthĩo sya andũ na angĩ maumanĩte na maveva ala masumbĩkĩte nthĩ ĩno, na ti kuma kwa Klĩsto.

9Nũndũ Klĩsto e na wĩanĩu w'onthe wa kĩ-ũngai wũmbonĩ wake ta mũndũ.

10Nenyu nĩmũnengetwe thayũ wa w'o kwa kũmũĩkĩĩa we ũla nĩwe ũsumbĩkĩte syĩndũ syonthe na ũtonyi.

11Kwa kwĩthĩwa mwĩ nthĩnĩ wa Klĩsto nĩmwaĩkiwe, ĩndĩ ti nzaĩko ĩla yaĩkawa nĩ andũ, nĩ nzaĩko ĩla yaĩkawa nĩ Klĩsto, ĩla ĩtumaa twĩthĩwa twĩ athasye kuma vinyanĩ wa naĩ.

12Nĩkwĩthĩwa ũvatisonĩ nĩmwathikiwe vamwe na Klĩsto, na o ta ũu nĩmwathayũũkiw'e vamwe nake kwondũ wa kũĩkĩĩa vinya wa Ngai, ũla wamũthayũũkisye kuma kwa akw'ũ.

13Mwaĩ akw'ũ kĩ-veva nũndũ wa naĩ ila mweekaa, na mwĩkalo wenyu wa kĩ-mũndũ ũla mwaĩ naw'o. Ĩndĩ kwĩsĩla ũthayũũkyonĩ wa Klĩsto, Ngai nĩwatũekeie naĩ sitũ syonthe na atũnenga thayũ wa w'o.

14Nĩwavutie mathiĩ maitũ o vamwe na mĩao ĩla yaendanĩtye namo, na amananga vyũ kwa kwambwa kwake ngelany'onĩ.

15Kwa kũkw'a ngelany'onĩ, Klĩsto nĩwasindie monene na mokũmũ, na amekĩĩthya nthoni kwa kũsinda kĩkw'ũ vinya.

16Kwoou mũiketĩkĩle mũndũ amumĩsye mĩao ĩũlũ wa kĩla mwaĩlĩte kũya kana kũnyw'a, kana ĩũlũ wa mĩthenya ya mboka, kana Mboka ya Kũtisa kwa Mwei, kana mũthenya wa Savato.

17Syĩndũ isu nĩ kyuu kya maũndũ ala makoka, na ũw'o wamo nĩ Klĩsto mwene.

18Mũiketĩkĩle mũndũ o na wĩva amũsiĩĩe kũkwata mũthĩnzĩo wenyu, mũndũ ũla ũtanĩaa kwĩnyivya kwa ũvũngũ na kũthaitha alaĩka. Mũndũ wa mũthemba ũsu aatĩĩa mũno maũndũ ma mawoni, na kwĩthĩwa na mĩkathĩĩo yumanĩte na mosũanĩo ma kĩ-mũndũ,

19na ndalũmanĩtye na Klĩsto ũla nĩwe mũtwe wa mwĩĩ. Kuma ũtongoinĩ wa Klĩsto mwĩĩ w'onthe nũĩthaw'a na kũkwatanw'a vamwe nĩ malenyũ na malangũ maw'o, na kwĩana o ũndũ Ngai ũkwenda wĩane.

20Inyw'ĩ nĩmwakwie vamwe na Klĩsto na mũi ungu wa maveva ala masumbĩkĩte nthĩ ĩno. Nĩkĩ ĩndĩ mwĩkalaa o ta mwĩ andũ ma nthĩ na kũatĩĩaa mĩao ta:

21“Mũikakwate kĩĩ,” “Mũikasame kĩya,” “Mũikakiite kĩĩ?”

22Mĩao ĩsu yonthe ĩneenete ĩũlũ wa syĩndũ itw'ĩkaa sya mana ĩtina wa kũtũmĩwa; ĩsu nĩ mĩao ĩseũvĩtw'e na kũmanyĩw'a nĩ andũ.

23Kwa w'o mĩao ĩsu yonekaa ta kĩndũ kya ũĩ, kwa kũthing'ĩĩsya andũ mathaithe kwĩanana na kwenda kwa mũndũ, kwĩnyivya kwa ũvũngũ na kũthĩny'a mwĩĩ, ĩndĩ ndĩtonya kũsiĩĩa mawendi ma mwĩĩ.

← Chapter 1 Jump to: Chapter 3 →