Philippians 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala tũĩ nyie Vaũlo vamwe na Timotheo, athũkũmi ma Klĩsto Yesũ; valũa ũũ witũ nĩ kwenyu inyw'ĩ aĩkĩĩi onthe ma Klĩsto Yesũ ala me Vilivi, o vamwe na atongoi na atetheesya ma ĩkanisa.

2Mumo nĩwĩthĩwe nenyu na mũuo kuma kwa Ngai Asa waitũ, na kwa Mwĩai Yesũ Klĩsto.

3Nĩnĩmũtũngĩaa Ngai wakwa mũvea kĩla ĩvinda namũlilikana,

4na kĩla ĩvinda ngũmũvoyea inyw'onthe, nĩmũvoyeaa nĩ na ũtanu,

5nũndũ nĩmwandetheeisye maũndũnĩ ma Ũvoo Mũseo, kuma mũthenya ũla wa mbee o na kũka kũvika yu.

6Nĩnĩsĩ nesa kana Ngai ũla wambĩĩie wĩa ũũ mũseo nthĩnĩ wenyu, nũkũwũendeesya kũvika wĩumya mũthya Mũthenyanĩ wa kũka ĩngĩ kwa Klĩsto Yesũ.

7Nĩwaĩlu kwakwa kwĩthĩwa ngĩw'a ũu ngwĩw'a kwondũ wenyu inyw'onthe, nĩkwĩthĩwa mũtũaa ngoonĩ yakwa. Nũndũ inyw'onthe nĩmũtetheanĩasya nakwa nthĩnĩ wa mumo ũũ Ngai ũnengete, wa kũtetea na kũlũlũmĩĩlya Ũvoo Mũseo, o na ĩvindanĩ yĩĩ nĩ yela.

8Ngai nĩ ngũsĩ kana nĩneena w'o, yĩla ngwasya kana mea makwa kwenyu inyw'onthe maumaa wendonĩ wa Yesũ Klĩsto.

9Nĩ mboya syakwa kana wendo wenyu nũkũendeea na kwongeleka mbee na mbee, vamwe na ũmanyi na ũĩ wa kĩla mũthemba,

10nĩ kana mwĩthĩawe mũtonya kũnyuva kĩla kĩseo vyũ na mwĩthĩwe mwĩ atheu, na vate ũndũ mũthũku mũwetanĩw'a naw'o Mũthenyanĩ wa kũka ĩngĩ kwa Klĩsto.

11Mwĩkalo wenyu ũkeethĩwa wusũĩte maũndũ maseo ala monekaa kwĩsĩla kwa Yesũ Klĩsto, nĩ kana Ngai akumw'e na kũkathwa.

12Mbaitũ, nĩenda mũmanye kana kĩla kĩkĩkĩte kwakwa, kwa w'o nĩkĩtumĩte Ũvoo Mũseo ũendeea na mbee,

13ũkethĩa o na asikalĩ onthe ala masungaa nyũmba ya mũsumbĩ, na andũ ala angĩ onthe kũũ nĩmamanyĩte vyũ kana novetwe kwondũ wa kũmũthũkũma Klĩsto.

14O ta ũu kumana na kwovwa kwakwa, ana-a-asa aingĩ nĩmalũlũmĩĩlw'e nthĩnĩ wa Mwĩai, na makethĩwa na ũkũmbaũ mwingĩ wa kũtavany'a ndeto ya Ngai mate na w'ĩa.

15Kwa w'o, amwe moo memũtavany'a Klĩsto nĩkwĩthĩwa me na kĩwĩu na nĩ andũ ma ĩteta, ĩndĩ angĩ memũtavany'a me na kĩeleelo kĩseo.

16Aa naweta ĩtina mekaa ũu nũndũ wa wendo, nĩkwĩthĩwa nĩmesĩ kana niĩtwe vaa kwondũ wa kũtetea Ũvoo Mũseo.

17Namo asu angĩ maiũmũtavany'a Klĩsto na ngoo ntheu; memũtavany'a kwondũ wa itumi syoo ene, maisũanĩa kũmbongeleela mathĩna nĩ kũũ yela.

18Ĩndĩ twĩasya ata? Ũndũ ũla wa vata nĩ kana Klĩsto nũkũtavanw'a, o na ethĩwa andũ memũtavany'a me na kĩeleelo kĩthũku kana o kĩseo, na kwa kĩtumi kĩu nyie nĩngwĩw'a mũyo.

19Ĩĩ, na nĩngũendeea kwĩw'a mũyo, nũndũ nĩnĩsĩ kana kwa mboya syenyu na kwa ũtethyo wa Veva wa Yesũ Klĩsto, ngathaw'a.

20Wendi wakwa mũnene na wĩkwatyo wakwa nĩ kana ndikaasonokw'a ũthũkũminĩ wakwa, ĩndĩ nĩĩthĩwa na ũkũmbaũ mwingĩ nĩ kana o ta mavindanĩ ala angĩ, ĩvindanĩ yĩĩ Klĩsto ataĩwe nthĩnĩ wakwa, o na ethĩwa nĩngũkw'a kana nĩngũvĩta.

21Nũndũ kwakwa nyie kwĩthĩwa thayũ nĩ kwondũ wa Klĩsto, na kĩkw'ũ kwakwa nĩ ũunĩko.

22Ĩndĩ ethĩwa kwa kũendeea kwĩthĩwa thayũ ngongela kũtethya wĩa mũseo, yu ndiũmanya naĩlĩte kũnyuva kyaũ.

23Maũndũnĩ asu elĩ nĩĩw'a nĩmũsaanĩsye: Nĩngwenda mũno nume kũũ nthĩ nĩthi ngethĩwe na Klĩsto, nũndũ ũu nĩ ũndũ mũseo mbee.

24Ĩndĩ kwondũ wenyu ve vata mũnene kwakwa kũendeea kwĩthĩwa thayũ.

25Nĩna wĩkwatyo ũsu, nĩnĩsĩ kana nĩngũendeea kwĩthĩwa thayũ, na kwĩkala nenyu inyw'onthe nĩmũtetheesye kwĩana na kwĩthĩwa na ũtanu mũĩkĩĩonĩ wenyu.

26Kwoou neethĩwa nenyu ĩngĩ, mũkeethĩwa na kĩtumi kĩseo kya kwĩkathĩĩa nakwa nthĩnĩ wa Klĩsto Yesũ.

27Ĩndĩ ũu wĩ o vo, ũndũ ũla wa vata nĩ kana nĩmwaĩlĩte kwĩkala mwĩkalo ũkwosana na Ũvoo Mũseo wa Klĩsto, nĩ kana nooka kũmwona kana o na naema kũka, nĩw'ae mũũngamĩte na ũlũmu mwĩ na veva ũmwe, na kana mwĩũkitĩa mũĩkĩĩo wa Ũvoo Mũseo mwĩ kĩndũ kĩmwe.

28Mũikakĩe amaitha menyu ũndũnĩ o na wĩva; mavinda onthe ĩthĩawai na ũkũmbaũ, na ũu ũkamony'a nesa kana mo nĩmekũsindwa, nenyu nĩmũkũsinda nũndũ Ngai nĩwe ũtumaa mũsinda.

29Nũndũ inyw'ĩ nĩmũnengetwe kũmũthũkũma Klĩsto, na tyo kwa kũmũĩkĩĩa kw'oka, ĩndĩ o na kwa kũthĩnw'a kwondũ wake.

30Inyw'ĩ o nenyu mũendee na kaũ ũla mwoonie nĩ na w'o, na mũkwĩw'a nĩendee na kũwũkita o na yu.

Jump to: Chapter 2 →