Philippians 4

Kamba (MBIVILIA ŨVOO MŨSEO)

← Chapter 3 Jump to:

1Kwoou ĩndĩ mbaitũ, nĩnĩmwendete mũno na nĩ na mea maingĩ ma kũmwona. Nĩmũndanĩthasya mũno na nĩnĩkathĩĩaa nenyu. Kwĩanana na maũndũ ala naweta, ũngamai na ũlũmu nthĩnĩ wa Mwĩai endwa makwa.

2Nĩngwĩsũva Euondia na Sinitike mew'ane ta masyaanĩw'e nthĩnĩ wa Mwĩai.

3Naku we mwana-a-asa tũthũkũmĩte ĩmwe nesa, nĩngũũkũlya ũtetheesye aka asu. Nĩmatethasya wĩa vamwe nakwa wa kũnyaĩĩkya Ũvoo Mũseo, o vamwe na Kĩlemendi na ala angĩ twathũkũmaa ĩmwe. Masyĩtwa moo me onthe maandĩkĩtwe ĩvukunĩ ya Ngai ya ala me thayũ.

4Tanaai nthĩnĩ wa Mwĩai mavinda onthe. O ĩngĩ nĩngwasya tanaai.

5Ĩthĩwai mwĩ auu kwa kĩla mũndũ; Mwĩai nĩwũkĩte mĩtũkĩ.

6Mũikemakĩe kwa ũndũ o na wĩva, ĩndĩ nthĩnĩ wa kĩla ũndũ, voyaai Ngai amũnenge kĩla mwĩ na vata nakyo, na mũimũvoyaa mwĩ na ngoo syĩ na mũvea.

7Naw'o mũuo wa Ngai ũla ũvĩtũkĩte ũmanyi w'onthe wa mũndũ, ũkasũvĩaa ngoo syenyu na ilĩko syenyu nthĩnĩ wa Klĩsto Yesũ.

8Kwa kũminũkĩlya mbaitũ, sũanĩaai maũndũ ala ma w'o na me na ndaĩa, ala maĩlu, matheu, ma kwendeesya na me na nguma nzeo; maũndũ o ala maseo na makathawa.

9Ĩkaai maũndũ ala mwĩmanyĩĩtye kana mũkwatĩte kuma vala nĩĩ, ala mwĩw'ĩte ngĩneena kana mwonete ngĩka. Nake Ngai ũla ũnenganae mũuo akeethĩawa vamwe nenyu.

10Nĩngũtana mũno nthĩnĩ wa Mwĩai nĩkwĩthĩwa yu nĩmwambĩĩe ĩngĩ kũnthĩnĩkĩa. Kwa w'o nĩmũnthĩnĩkĩaa, ĩndĩ mũineethĩawa na mwanya wa kwonany'a ũu.

11Ndikwasya ũu nũndũ wa kwĩthĩwa nĩ na thĩna; nyie nĩneemanyĩisye kwĩanĩwa nĩ kĩla nĩ nakyo.

12Nĩnĩsĩ ũndũ thĩna ũsamaa, na o ta ũu nĩnĩsĩ ũndũ kwĩthĩwa na syĩndũ mbingĩ o nakw'o kũsamaa. Nyie nĩneemanyĩisye kwĩanĩwa nĩ kĩla kyambũkĩa o na nĩva, ĩvindanĩ o na yĩva: Kwĩthĩwa mbũny'e kana ngĩw'a nzaa; kwĩthĩwa na syĩndũ mbingĩ kana kũnyivĩwa nĩ syĩndũ.

13Nĩndonya kũmĩanĩsya na kĩla ũndũ kumana na vinya ũla Klĩsto ũnengae.

14Ĩndĩ ũu wĩ o vo, nĩmũneekie nesa kũndetheesya mavatanĩ makwa.

15Inyw'ĩ Avilivi nĩmwĩsĩ nesa kana yĩla naumie Masendonia, mĩthenyanĩ ya mbee vyũ ya kũtavany'a Ũvoo Mũseo, vai ĩkanisa yĩngĩ yandethasya eka inyw'ĩ; no inyw'ĩ mwĩ oka mwaumasya ũtethyo wa mbesa na ngĩtĩkĩla kũsyosa.

16Mavinda maingĩ nĩ Thesalonika, yĩla neethĩwa na vata wa kĩndũ, nĩmwatũmanaa ngaetewe.

17Ti atĩ nĩenda nĩkwatae syĩndũ kuma vala mũĩ, ĩndĩ nĩenda mũkwatae moathimo maingĩ ala maumanaa na kũnengane syĩndũ.

18Kwoou nĩngwatĩte syĩndũ syonthe ila mũnenganĩte nĩetewe, o na nĩ mbingĩ kũthonoka vata wakwa! Yu nyie nĩmwĩanĩe vyũ ĩtina wa kũkwata mĩthĩnzĩo ĩla mũnatũmĩte Evavilotito andetee. Mĩthĩnzĩo ĩsu nĩ ta mũuke mũseo, nthembo yĩtĩkĩlĩtwe nĩ Ngai na ya kũmwendeesya.

19Nake Ngai wakwa akeanĩasya mavata menyu onthe, kumana na ũthwii wake mwingĩ kwĩsĩla kwa Klĩsto Yesũ.

20Kwa Ngai Asa waitũ, nĩkwĩthĩwe ũkumyo tene na tene. Ameni.

21Ngethesyei aĩkĩĩi onthe nthĩnĩ wa Klĩsto Yesũ. Ana-a-asa ala nĩ namo nĩmamũkethya.

22Aĩkĩĩi onthe kũũ nĩmamũkethya, na mũno mũno ala mathũkũmaa kwa Mũsumbĩ wa Loma.

23Mumo wa Mwĩai Yesũ Klĩsto nĩwĩthĩwe nenyu inyw'onthe.

← Chapter 3 Jump to: