Philippians 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Kwa kũminũkĩlya mbaitũ, tanaai nthĩnĩ wa Mwĩai. Nyie ndinoa nĩkũtũngĩlĩĩla maũndũ o ala namũandĩkĩie navu mbeenĩ, nũndũ ũu wĩmũsiĩĩanĩa na mĩisyo mingĩ.

2Ĩsũvĩanei na andũ asu mekaa mothũku, ngitĩ isu, andũ maasya mamutha amwe ma mwĩĩ nĩmatilwe.

3Nithyĩ twaĩkĩtwe nzaĩko ĩla ya w'o na ti mo, nĩkwĩthĩwa ithyĩ tũmũthaithaa Ngai nthĩnĩ wa Veva, na twĩkathĩaa nthĩnĩ wa Klĩsto Yesũ, na tũyĩkathĩĩaa na maũndũ ala mekawa mĩĩnĩ yaitũ,

4o na kau nyie no ndonya kwĩkathĩĩa namo. Ethĩwa ve mũndũ ũkwĩw'a e na itumi sya kwĩkathĩĩa na maũndũ ala mekawa mwĩĩnĩ, nyie nĩ na mbingĩ kwĩ we.

5Nyie naĩkiwe nĩ na ũkũũ wa mĩthenya nyanya, nĩ Mũĩsilaeli kwa kũsyawa, wa mbaĩ ya Mbengyameni, na nĩ Mũevelania ũsyaĩtwe nĩ Aevelania. Maũndũnĩ ma kũatĩĩa Mĩao ya Ayuti, nyie nĩ Mũvalisi;

6ũndũnĩ wa kũmũthũkũma Ngai na kĩthito, nyie nĩnathĩnasya ĩkanisa, na ngalĩkonĩ ya mũndũ kwĩthĩwa mũlũngalu kwondũ wa kũkwata Mĩao, nyie ndyaĩ ĩvĩtyo o na yĩmwe.

7Ĩndĩ maũndũ asu onthe ala namosaa kwĩthĩwa ma vata kwakwa, yu nĩmosaa kwĩthĩwa wasyo kwondũ wa Klĩsto.

8O na eka maũndũ asu, nyie nosaa maũndũ onthe kwĩthĩwa wasyo namasianĩsya na ũseo mũnene wa kũmũmanya Klĩsto Yesũ Mwĩai wakwa. Nyie nĩnekisye maũndũ onthe ĩtheka kwondũ wake; nĩmatalaa onthe kwĩthĩwa mavuti, nĩ kana ndonye kũmũkwata Klĩsto,

9na kwĩthĩawa nĩ nthĩnĩ wake. Ndikwenda ĩngĩ kwĩthĩwa na ũlũngalu wakwa mwene ũla wumanaa na kũkwata Mĩao; yu nĩ na ũlũngalu ũla wonekaa kwĩsĩla kũmũĩkĩĩa Klĩsto, ũlũngalu ũla wumaa kwa Ngai na ũkwatĩkanaa kwondũ wa mũĩkĩĩo.

10Kĩla nyie ngwenda nĩ kũmũmanya Klĩsto na vinya wa kũthayũũka kwake, nĩkwatae mathĩna ala mamũkwatie na kũvw'ananw'a nake nthĩnĩ wa kĩkw'ũ kyake,

11nĩ na wĩkwatyo wa kana o nakwa mwene ngathayũũkw'a kuma kwa akw'ũ.

12Ndikwasya kana nyie nĩnĩkĩte maũndũ onthe ala naĩlĩte kwĩka na ngethĩwa nĩ mwĩanĩu. Nĩthing'ĩĩsye kũthi na mbee nĩkwate mũthĩnzĩo ũla watumie Klĩsto Yesũ angwata nĩtw'ĩke wake.

13Kwa w'o mbaitũ, ndikwĩyosa nyie ta nĩkwatĩte mũthĩnzĩo ũsu. Ĩndĩ ũndũ ũla nĩkaa nĩ ũmwe: Kũlwa nĩ maũndũ ala mavĩtu na kwĩthing'ĩĩsya nĩvikĩe ala me mbee.

14Nĩthing'ĩĩsye ngatw'e ĩkanda nĩ kana nĩsinde mũthĩnzĩo, naw'o nĩ wĩtano wa Ngai kwĩsĩla kwa Klĩsto Yesũ, nĩlike thayũnĩ wa tene na tene.

15Ithyonthe ala aima kĩ-veva twaĩlĩte kwĩthĩwa na woni ũilyĩ ũu. Ĩndĩ ethĩwa amwe menyu me na woni wĩ kĩvathũkany'o, Ngai akamavuanĩsya nesa ũndũ ũsu.

16Kĩla kĩ vo, nĩtũatĩĩei kĩla tũminĩte kũkwata kũka kũvika yu.

17Mbaitũ, atĩĩai ngelekany'o yakwa. Nĩtwamwonisye ngelekany'o nzeo, na kwoou atĩĩai ngelekany'o nzeo ya ala maatĩĩaa ngelekany'o ĩla mwoonie kwitũ.

18Kĩla ngũmũtavya yu nĩnĩmũtavĩtye kaingĩ, na nĩngũkĩtũngĩlĩĩla yu o ĩngĩ nĩ na kĩĩo: Ve andũ aingĩ mĩkalo yoo ĩmatw'ĩte amaitha ma kĩkw'ũ kya Klĩsto ngelany'onĩ.

19Mũminũkĩlyo woo nĩ kũminwa, nũndũ ngai yoo nĩ ĩvu. Mekathĩĩaa na syĩndũ ila maĩlĩte kwĩw'a nthoni nũndũ wasyo, na masũanĩaa tũ o maũndũ ma nthĩ ĩno.

20Ĩndĩ ithyĩ kwitũ nĩ ĩtunĩ, na tweteelete Mũtangĩĩi waitũ oke kuma vo, nake nĩ Mwĩai Yesũ Klĩsto.

21Akaalyũla mĩĩ ĩno yaitũ ĩkusaa amĩvw'anany'e na ũla wake mũkumye, aitũmĩa vinya ũla ũmũtonyethasya kwia syĩndũ syonthe ungu wa ũsumbĩko wake.

← Chapter 2 Jump to: Chapter 4 →